နိုင်ငံတကာ အိုလံပစ်ကော်မတီဟာ ၂၀၂၈ ပြိုင်ပွဲကို လော့စ်အိန်ဂျယ်လိစ်မြို့မှ အိမ်ရှင်အဖြစ် လက်ခံကျင်းပရန် သဘောတူညီမှု ရရှိခဲ့တာကြောင့် ၂၀၂၄ အိုလံပစ်ပြိုင်ပွဲအတွက် ပဲရစ်က လက်ခံကျင်းပရန် သေချာသွားပြီဖြစ်ပါတယ်။
"ဒါဟာ လော့စ်အိန်ဂျယ်လိစ်၊ အမေရိကန်နှင့် ကမ္ဘာတဝှမ်း အိုပစ်လှုပ်ရှားမှုများအတွက် သမိုင်းဝင်နေ့တနေ့ဖြစ်ပါတယ်။"လို့ လော့စ်အိန်ဂျယ်လိစ်မြို့တော်ဝန် အဲရစ် ဂါစီတီက ကြေညာချက်ထဲမှာ ပြောပါတယ်။
၂၀၂၄ အိုလံပစ်ပြိုင်ပွဲ အိမ်ရှင်အတွက် ဟမ်းဘတ်၊ ရောမနှင့် ဘူဒါပက်မြို့တွေက နောက်ဆုတ်သွားပြီးနောက် ပဲရစ်နှင့် လော့စ်အိန်ဂျယ်လိစ် မြို့နှစ်မြို့သာ အိမ်ရှင်အဖြစ် လက်ခံကျင်းပဖို့ အိုလံပစ်ကော်မတီက ဇွန်လက ရွေးချယ်ထားပါတယ်။ ဒါပေမယ့် ဘယ်မြို့က ဘယ်နှစ်မှာ လက်ခံကျင်းပမယ်ဆိုတာတော့ မသိရသေးပါဘူး။
အဆိုပါမြို့နှစ်မြို့လုံးဟာ ၂၀၂၄ အိုလံပစ်ပြိုင်ပွဲကို အိမ်ရှင်အဖြစ် လက်ခံကျင်းပလိုကြပါတယ်။
"ဒီနေ့ ကျနော်တို့ဟာ မျိုးဆက်တစ်ဆက်အတွင်းမှာ ပထမဦးဆုံးအကြိမ်အဖြစ် ဒီကစားပွဲကို ကျနော်တို့ မြို့တော်ဆီ ပြန်လည်သယ်ဆောင်နိုင်တဲ့ အဓိက ခြေလှမ်းတစ်လှမ်းကို ယူဆောင်လာပြီး လော့စ်အိန်ဂျယ်လိစ်ရဲ့ ထာဝရ အိုလံပစ်ပုံပြင်ထဲမှာ အခန်းကြီးသစ်တစ်ခု စတင်ပါပြီ။"လို့ သူက ဆက်ပြောပါတယ်။
အမေရိကန်အိုလံပစ်ကော်မတီနှင့် လော့စ်အိန်ဂျယ်လိစ်မြို့တော်ကောင်စီတို့မှ အတည်ပြုခံရဖို့ ကျန်နေပေမယ့် အဆိုပါသဘောတူညီကို သမ္မတထရမ့်က ထောက်ခံခဲ့ပြီး IOC မှ အထောက်အပံ့အဖြစ် ဒေါ်လာ ၁.၈ ဘီလီယံ ပေးသွားမှာဖြစ်ပါတယ်။
Ref; EFE_EPA