ရန်ကုန်၊ဇူလိုင်၂၉ ။ ။ ရန်ကုန်တိုင်းဒေသကြီးသင်္ဃန်းကျွန်းမြို့နယ်ရှိ ကျောင်းများတွင် H1N1နှင့်ပတ်သက်၍ အသိပညာပေးမှုများဆောင်ရွက်နေကြောင်း ရန်ကုန်တိုင်းဒေသကြီး သင်္ဃန်းကျွန်းမြို့နယ် မဲဆန္ဒနယ်အမှတ်(၁)၏ လွှတ်တော်အမတ် ဦးနေဘုန်းလတ်က ဆိုသည်။
"အစိုးရအဖွဲ့ကတော့ ကုသရေးလုပ်လိမ့်မယ် ။ ကျွန်တော်တို့ကတော့ ပိုစတာ ပေါ့နော် ။ H1N1နဲ့ပတ်သက်ပြီး ကာကွယ်ရမဲ့ ပိုစတာလေးတွေ ကျောင်းတွေမှာ လိုက်ကပ်တယ် ။ လူစည်ကားတဲ့နေရာတွေမှာ လိုက်ကပ်တာပေါ့နော် ။ Mask ကတော့ လုံလုံလောက်လောက်တော့ မဝေနိုင်ဘူး။ အများကြီးမရှိတော့ ကျောင်းတွေပဲ အဓိကထားဝေပေးနေတယ်"ဟု ရန်ကုန်တိုင်းဒေသကြီး သင်္ဃန်းကျွန်းမြို့နယ်မဲဆန္ဒနယ်အမှတ်(၁)၏ လွှတ်တော်အမတ် ဦးနေဘုန်းလတ်က ပြောသည်။
သင်္ဃန်းကျွန်းမြို့နယ်ရှိကျောင်းများအားလုံးတွင် H1N1ကာကွယ်ရေး ပိုစတာများ ကပ်ခြင်း၊ Mask များဝေပေးခြင်းများကို ပြုလုပ်နေခြင်း ဖြစ်သည်။
"Mask က အဓိကပြဿနာက တစ်ခါသုံးဖြစ်တယ်ပေါ့နော် ။ သုံးပြီးတာနဲ့တစ်ခါတည်းလွှတ်ပစ်ဖို့လိုတယ်။ ပိတ်စနဲ့လုပ်ထားတဲ့ Mask တွေဆိုရင်လည်း တစ်နေ့သုံးပြီးတာနဲ့ ပြန်ပြီးရေနွေးနဲ့ပြုတ်ပြီးလျှော်ပြီးတော့မှပြန်သုံးသင့်တယ်ပေါ့ နော် ။ Mask ကို ကိုင်တွယ်တဲ့အခါမှာလည်း ကြိုးကနေ ကိုင်တွယ်ဖို့၊ ဒါမျိုးတွေတော့ ကျွန်တော်တို့ပြောနေတယ်ပေါ့နော်"ဟု လွှတ်တော်အမတ် ဦးနေဘုန်းလတ်က ပြောသည်။
ပိုစတာနှင့် Mask ဝေခြင်းပြီးလျှင် လက်ဆေးဆပ်ပြာများ ဝေပေးရန် အစီစဉ်ရှိကြောင်း သူကဆက်ပြောသည်။
အဆိုပါပညာပေးလုပ်ငန်းကို ကြက်ခြေနီအဖွဲ့၊ မြို့နယ်ကျန်းမာရေးအဖွဲ့၊ ၈၈ငြိမ်းချမ်းရေးနှင့်ပွင့်လင်း လူ့အဖွဲ့အစည်းနှင့် စည်ပင်တို့မှ ပါဝင်ဆောင်ရွက်နေသည်။
ဇူလိုင်လ ၂၉ ရက် ယနေ့ နေ့လည်အထိ H1N1ရောဂါဖြင့် ကူးစက်သူ ၃၅ ဦး ရှိနေပြီး သေဆုံးသူ ၆ ဦး ရှိကြောင်း ကျန်းမာရေးဝန်ကြီးဌာနမှ ထုတ်ပြန်ထားသည်။