ရန်ကုန်၊ ဇူလိုင် ၂၉ ။ ။ ရန်ကုန်တိုင်းဒေသကြီး မရမ်းကုန်းမြို့နယ်ရှိ ကြက်ခြံတစ်ခု ရှိကြက်အချို့တွင် ကြက်ငှက်တုပ်ကွေး H5N1 ဖြစ်ပွားနေသည်ကိုတွေ့ရှိခဲ့ရသည်ဟု မရမ်းကုန်းမြို့နယ် ရဲစခန်းမှ တာဝန်ကျရဲအရာရှိတစ်ဦးက အတည်ပြုပြောသည်။
“ ကျန်းမာရေးဌာနက ပြန်ကြားစာပေါ့နော်။ H5N1 လို့ပြန်ကြားထားပါတယ် “ ဟု၄င်းကပြောဆိုသည်။
ယမန်နေ့ ဇူလိုင် ၂၈ ရက်နေ့၊ နေ့လည် ၁ နာရီခွဲခန့်က မရမ်းကုန်းမြို့နယ် ၆ ရပ်ကွက်၊ ဇာတိမာန်လမ်း ရှိကြက်ခြံတစ်ခြံမှ သေဆုံးနေသည့် ကြက် အချို့တွေ့ရှိခဲ့ခြင်းဖြစ်ကြောင်း သိရသည်။
အဆိုပါ ကြက်ခြံမှ ကြက် ၃ ကောင်သေဆုံးခဲ့ပြီး တစ်ကောင်ကို မြုပ်နှံလိုက်ကြောင်း မရမ်းကုန်းရဲစခန်း မှသိရသည်။
ကျန်ရှိသည့် ကြက်နှစ်ကောင်ကို အင်းစိန်တိရိစ္ဆာန်ကုသရေးဌာန မှ စစ်ဆေး တွေ့ရှိခဲ့ပြီး H5N1 ရှိကြောင်း ဇူလိုင် ၂၇ ရက် ညနေ ၄ နာရီခန့်တွင် ပြန်ကြားခဲ့ခြင်းဖြစ်ကြာင်း မရမ်းကုန်းမြို့နယ်၊တိုင်းဒေသကြီး လွှတ်တော်ကိုယ်စားလှယ် ဒေါ်မိုးမိုးစုကြည်ကပြောသည်။
“ အဲ့အဖြေထွက်လာတဲ့အပေါ်မှာ အစ်မတို့ကို ကျန်းမာရေးဌာနက H5N1 ဆိုတာတော့ ဟုတ်ပါတယ်။ ဒါပေမယ့် ကျန်းမာရေးဌာနအနေနဲ့ သတင်းထုတ်ပြန်ပေးနိုင်ခြင်းမရှိသေးပါဘူးတဲ့။ ဘာကြောင့်လဲဆိုရင် ဒါသည်အရေးပေါ် စစ်ဆေးရတာဖြစ်တယ်တဲ့ ။ နောက်တစ်ခုက ဒီရောဂါမျိုးက ချက်ချင်းအခုစစ်ပြီးအခုပြန်ကြားရတဲ့ရောဂါမျိုးလည်းမဟုတ်ဘူးလေ။ သူတို့ ချက်ချင်းစစ်လာပြီး ထွက်လာတဲ့အဖြေပေါ်မှာတော့ သူတို့ ကျန်းမာရေးဌာနအနေနဲ့ သတင်းထုတ်ပြန်ဖို့ မလုပ်နိုင်သေးဘူးပေါ့နော် သူတို့ ဆက်လက်စစ်ဆေးပြီး သတင်းထုတ်ပြန်လာရင်တော့ အတည်ဖြစ်မှာပေါ့“ ဟု ဒေါ်မိုးမိုးစုကြည်ကပြောသည်။
အဆိုပါ H5N1 တွေ့့ရှိခဲ့သည့် ကြက်ခြံကို ဆေးဖျန်းခြင်းနှင့် ထုံးဖြူးခြင်းကဲ့သို့ ကာကွယ်ရေးလုပ်ဆောင်မှုများပြုလုပ်နေသည်ဟု သိရသည်။
သို့သော် လူများကို ကူးစက်သည်ကိုတော့ မတွေ့ရှိရသေးဟု တိုင်းဒေသကြီး လွှတ်တော်ကိုယ်စားလှယ် ဒေါ်မိုးမိုးစုကြည် ပြောကြားချက်အရ သိရသည်။
