လူငယ်လေးတွေပဲ ပါ၀င်တဲ့၊ ကောင်မလေးတွေ သည်းသည်းလှုပ် အားပေးကြတဲ့ Project K အဖွဲ့နဲ့ တွေ့ဆုံပြီး သူတို့အကြောင်း မဇ္ဈိမကနေ မေးမြန်းတင်ဆက်ထားပါတယ်။

မေး။ Project K မင်္ဂလာပါခင်ဗျ။

Project K - ဟုတ်ကဲ့ မင်္ဂလာပါ။

မဇ္ဈိမ - ကျွန်တော်တို့ Mizzima Exclusive Interview အစီအစဉ်ကနေ အခုဆို Project K နဲ့ တွေ့ဆုံခဲ့ပါတယ်။ Project K တည်ရှိလာတာ ဆိုတာလည်း အခုဆို တစ်နှစ်ကျော်သွားပြီ။ အရင်ဆုံး မေးချင်တာက Project K စတင်ဖြစ်ပေါ်လာပုံပေါ့နော်။

ဝီလျံထွန်း - ကျွန်တော်တို့ Project K စဖြစ်တာက ပြီးခဲ့တဲ့ ဇွန်လ ၂၄ ရက်နေ့က တစ်နှစ် ပြည့်သွားပြီ ပေါ့နော်။ ဘယ်လိုစဖြစ်လဲဆိုရင် လူစုမိရာကနေ စဖြစ်လာတာပေါ့ (အားလုံးရယ်လျက်)။ အဓိက,ကတော့ ဂျင်မီပေါ့။ ဂျင်မီကိုကို ကျွန်တော်တို့ရဲ့မန်နေဂျာ။ Myanmar’s Got Talent Season 3 Winner ပေါ့နော်။ သူက ပြိုင်ပွဲတွေ သွားပြိုင်တယ်။ ဘန်ကောက်တို့ ဘာတို့မှာ သွားပြိုင်တော့ တခြား နိုင်ငံခြား Street Dancer တွေ ဘာတွေနဲ့ ခင်သွားပြီးတော့ ကိုရီးယားက ပွဲလုပ်တဲ့ Organizer သူ့ သူငယ်ချင်းနဲ့ စကားစပ်မိသွားတယ်။ သူတို့ဆီမှာ Cover Dance ပြိုင်ပွဲ ဒီပွဲရှိတယ်။ မြန်မာနိုင်ငံက တစ်ခါမှ မလာဘူးပေါ့။ ပြိုင်ပါလားပေါ့ အကြံပေးတော့ သူကလည်း အကြံဉာဏ်ရပြီးတော့ ပြိုင်မယ် ဆိုပြီးတော့ မေးကြည့်တာ။ ကျွန်တော်တို့ကိုပဲ ဂျင်မီနဲ့ ကျွန်တော်တို့က ခင်တယ်လေ။ ခင်နေတော့ စပ်မိပြီးတော့ ဖိုးချမ်းတို့ အားလုံး ပြိုင်ပွဲရှိတယ်။ ပြိုင်မယ်ဆိုပြီးတော့ လူစုမိသွားတာပေါ့။

မဇ္ဈိမ - နောက်တစ်ခုကတော့ ချမ်းမြေ့ဦးပေါ့နော်။ ချမ်းမြေ့ဦးက အရင်က Jade Dragon ကဆိုတော့ Jade Dragon ကနေ ဒီ Project K ကို ဘယ်လိုပုံစံမျိုးနဲ့ ဝင်လာဖြစ်တာလဲ။ Jade Dragon ကိုရော လုံးဝ စွန့်လွှတ်လိုက်တာမျိုးလား။

ချမ်းမြေ့ဦး - အဲ့လိုရယ်တော့မဟုတ်ပါဘူး။ ကျွန်တော်တို့ ကိုရီးယားမှာ သွားပြိုင်တည်းက အားလုံးက အလုပ်တွေ ကိုယ်စီကိုယ်စီ ရှိကြတယ်ဗျာ။ ရှိကြတော့ အားလုံးသဘောတူထားတာကလည်း ဒီကိုရီးယားပြိုင်ပွဲ အတွက်ပဲပေါ့နော်။ သွားပြိုင်မယ် ပြိုင်ပြီးရင် အားလုံး ကိုယ်စီကိုယ်စီ ကိုယ့်အလုပ်တွေ ပြန်လုပ်ကြမယ်။ အဲဒီလိုလုပ်ထားပေမယ့် တကယ့်တကယ် ဟိုမှာပြိုင်ပြီး ပြန်လာတော့ ပရိသတ်တွေက ဒီအဖွဲ့လေးကို အရမ်းအားပေးကြတယ်။ ဒီအဖွဲ့ကိုလည်း ဆက်ပြီး ရှိစေချင်ကြတယ်။ အဲဒါနဲ့ပဲ ကျွန်တော်တို့ လုပ်ရင်းလုပ်ရင်းနဲ့ ဒီအဖွဲ့က လုံးဝ အတည်ကြီး ဖြစ်သွားတာပေါ့။ ပြီးတော့ အခုအချိန်မှာကြတော့လည်း ကျွန်တော် Jade Dragon ကနေ ထွက်လိုက်တာလည်း မဟုတ်ဘူး။ ပြီးတော့ မန်ဘာမဟုတ်တော့တာလည်း မဟုတ်ဘူးပေါ့နော်။ ဘာလို့လဲဆိုတော့ Jade Dragon ကြတော့ ကျွန်တော်ကိုယ်တိုင် ထူထောင်ခဲ့တာဆိုတော့ ဒီမှာကလည်း အမြဲတမ်း မန်ဘာဝင်ပဲ။ အခုအချိန်ထိလည်း ကျွန်တော် Jade Dragon အတွက်ကို အကတွေ ထွင်ပေးတယ်။ တစ်ချို့အရာလေးတွေဆို ကျွန်တော် Arrangement လေးတွေ လုပ်ပေးတယ်။ ကိုယ်တိုင်သာ ဝင်မကဖြစ်ပေမယ့် Jade Dragon အတွက်ကတော့ အမြဲလုပ်ပေးဖြစ်နေတုန်းပါ။

မဇ္ဈိမ - နောက်တစ်ခုကတော့ ဒီကိုရီးယားမှာ Cover Dance သွားပြိုင်ဖြစ်တာကရော ဘယ်လိုပုံစံမျိုးနဲ့ သွားပြိုင်ဖြစ်တာလဲ။ ဘယ်သီချင်းတွေပြင်သွားလဲ။ ဆုရခဲ့တော့ရော ဘယ်လိုမျိုးတွေ ခံစားရလဲ။

ဘုန်းနေမင်း - ကျွန်တေ်ာတို့ပြိုင်မယ်ဆိုပြီးတော့ အားလုံးတိုင်ပင်ကြတယ်။ K Pop ဆိုတော့ K Pop သီချင်းပဲ ကျွန်တော်တို့ရွေးချယ်ဖြစ်တယ်။ ဒါပေမယ့်ရှေ့မှာ Private Song ပေါ့နော်။ Traditional Dance လေး ထည့်ချင်တယ်ပေါ့။ သူများနိုင်ငံမှာ သွားပြိုင်တယ် ဆိုတော့ ကိုယ့်မြန်မာနိုင်ငံရဲ့ ရိုးရာကို ချပြချင်တယ်ဆိုပြီးတော့ ကျွန်တော်တို့ ကိုတင်မောင်ဆန်းမင်းဝင်းနဲ့ အချိန်ပေးပြီးတော့ သွားသင်ဖြစ်ပါတယ်။ အဲဒီမြန်မာအကလေးနဲ့ ရောပြီးတော့ ကျွန်တော်တို့ဟိုမှာ K Pop နဲ့ ရောပြီးတော့ ဖျော်ဖြေဖြစ်တယ်ခင်ဗျ။

မဇ္ဈိမ - ပြိုင်ပွဲမှာ ဒုတိယဆုရလာတာနော်။ အဲဒီဆုရတော့ရော ဘယ်လိုမျိုးတွေခံစားခဲ့ရလဲ။

ဘုန်းနေလင်း - အဲဒီတုန်းက အားလုံးက ထခုန်ကြတာပေါ့။ ကိုယ့်အဖွဲ့ နာမည်ခေါ်လိုက်တယ်ဆို

ဝီလျံထွန်း - မန်နေဂျာဆို ကိုယ့်မြန်မာနိုင်ငံအလံကြီး ကိုင်ပြီးတော့ လျောက်ပြေးနေတာ။

ဘုန်းနေလင်း - ဟုတ်တယ် လျောက်ပြေးနေတာ။ မှတ်မှတ်ရရ အရမ်းပျော်ပြီးတော့ အာရှ ရ နိုင်ငံလည်း ရှိတာကိုး။ အဲဒီမှာ ကိုယ့်နိုင်ငံက ဒုတိယဆိုတော့ အရမ်းပျော်ပါတယ်။ ခုနကပြောသလို မန်နေဂျာဆို စင်ပေါ်မှာ မြန်မာနိုင်ငံအလံကြီး ကိုင်ပြီးတော့ လျောက်ပတ်ပြေးနေတာ။ အကုန်လုံးလည်း ပျော်နေကြတာ။ အဲဒီပီတိကတော့ ဘာနဲ့မှလဲလို့မရဘူးပေါ့နော်။

မဇ္ဈိမ - နောက်တစ်ခုကတော့ Project K ဆိုတာ အဲဒီ Cover Dance ပြိုင်ပွဲပြီးမှ ဖြစ်တည်လာတယ်လို့ ပြောလို့ရလား။

ဘုန်းနေလင်း - ရပါတယ် ကျွန်တော်တို့ Project K က ကျွန်တော်တို့ဆိုလည်း Triplex သူတို့ဆိုလည်း Jade Dragon ပေါ့နော်။ အဲဒီလိုမျိုး အဖွဲ့ အဖွဲ့ ကိုယ်စီကနေ ပေါင်းပြီးတော့ ဒီပြိုင်ပွဲလေးပြိုင်မယ်ပေါ့။ ဒါပေမယ့် ပြိုင်ပွဲက ပြန်လာတော့ အားလုံးရဲ့ တောင်းဆိုမှု ပရိသတ်တွေရဲ့ တောင်းဆိုမှု ဆက်ဖြစ်စေချင်တယ် ဆိုတော့ သူတို့ရဲ့ တောင်းဆိုမှုကြောင့်ပဲ ဒီအဖွဲ့လေး ဖြစ်လာတာပါ။

မဇ္ဈိမ - နောက်တစ်ခုကတော့ အဖွဲ့သားအချင်းချင်း စိတ်သဘောထားချင်း မတိုင်ဆိုင်တာမျိ်ုးတွေ ထသတ်တာမျိုးတွေရှိရင်ရော ဘယ်လိုတွေဖြေရှင်းလေ့ရှိလဲ။

ဟိန်းရာ - အင်း တော်တော်များများတော့ မဖြစ်ကြပါဘူး။ ဒါပေမယ့် လူငယ်သဘာဝ နည်းနည်းပါးပါး စိတ်ထဲမှာတော့ ရှိကြတာပေါ့။

ဝီလျံထွန်း - ထိုးတာ ဓါးတွေနဲ့။ အိပ်နေတဲ့အချိန် ဆံပင်ဆွဲနှုတ်တာတို့ ဘာတို့။

ဟိန်းရာ - အဆင်ပြေပါတယ်။ အဓိက,ကတော့ ကျွန်တော်တို့ Target က အောင်မြင်မှုဆိုတော့လေ။

ချမ်းမြေ့ဦး - အဆင်ပြေပါတယ် ဓါးရာတွေနဲ့။

ဟိန်းရာ - ညှိယူရတာပေါ့။ အရမ်း ဟိုလိုမျိုးတော့ မဖြစ်ပါဘူး။ ခုထက်ထိပေါ့နော် အဟဲ။ အဆင်ပြေပါတယ်။

မဇ္ဈိမ -  အခု Project K ကလည်း တစ်နှစ်ကျော်လာပြီဆိုတော့ ဒီ Project K တစ်နှစ်ပြည့် Fan Meeting မှာရော အားပေးတဲ့ ပရိသတ်အပေါ် ကျေနပ်မှုရှိလား။ ဘယ်သူဖြေပေးမလဲ။

မင်းခန့်ဟိန်း - ကျေနပ်မှုကတော့ တကယ် အတိုင်းထက်အလွန်ပဲ။ (အားလုံးရယ်လျက်) တကယ်ပါ အရမ်းပဲ Project K ဆိုတာ ကျွန်တော်တို့တွေ အားပေးတဲ့သူတွေကြောင့်ပဲ နေရာတစ်နေရာထိ ရောက်လာခဲ့ကြတာလေ။ အရမ်းပဲကျေနပ်မိတယ်။ အရမ်းပဲကြည်နူးမိတယ်။ ဒီလောက်ထိ ပံ့ပိုးပေးလိမ့်မယ် ဒီလောက်ထိ ကျွန်တော်တို့ဘက်မှာ ရှိနေလိမ့်မယ်လို့လည်း မမျော်မှန်းထားခဲ့ဘူး။ အဲဒီနေ့ပွဲလေးမှာ လူအတိုးခံ အပင်ပန်းခံ တစ်ချို့တွေဆို ဖုန်းတွေပျောက် ပိုက်ဆံအိတ်တွေပျောက် အဲဒီ်ကြားထဲက အဆူခံပြီးတော့ကို အခုထက်ထိ အားပေးကြတာ အရမ်းပဲကျေနပ်ဖို့ကောင်းတယ်။ ကြည်နူးဖို့လည်းကောင်းတယ်။

မဇ္ဈိမ - နှစ်တိုင်း နှစ်တိုင်းရော ဒီလိုမျိုး Anniversary တွေဆိုရင် Fan Meeting တွေလုပ်သွားဖို့ အစီအစဉ်တွေရှိလား။

ဝီလျံထွန်း - ဟုတ်။ ကျွန်တော်တို့ပြောနေကြတာပေါ့နော်။ အဲဒီလိုမျိုးတွေလုပ်သွားဖို့ အစီအစဉ်တွေလည်း ရှိပါတယ်။ Mini Concept လိုမျိုးပဲဖြစ်ဖြစ် Fan Meeting လိုမျိုးပဲဖြစ်ဖြစ် သူတို့အတွက် အမှတ်တရလေးတွေနဲ့ တစ်နှစ်တစ်ခါ လုပ်သွားပေးဖို့ အစီအစဉ်ရှိပါတယ်။

မဇ္ဈိမ - နောက်တစ်ခုကတော့ Project K တစ်ဖွဲ့လုံးမှာမှ တစ်ယောက်ချင်းဆီက ကိုယ်အားကျတဲ့သူရှိလား။

ဟိန်းရာ - ပြည်တွင်းမှာလား ပြည်ပမှာလား?

မဇ္ဈိမ - မဟုတ်ဘူး။ အဖွဲ့သားအချင်းချင်းမှာပဲ ကိုယ်အားကျတဲ့သူက ဘယ်သူဖြစ်မလဲ။ တစ်ယောက်ချင်းစီ ပြောပြပေးပါဦး။

ဟိန်းရာ - အားမကျဘူး (ရယ်သံဖြင့် အားလုံးရယ်လျက်။) အားကျပါတယ်။ တစ်ယောက်နဲ့တစ်ယောက် မတူကြဘူးပေါ့နော်။ တစ်ယောက်ဒါတော်ရင်လည်း တစ်ယောက်က ဒါမတော်ဘူး။ ဥပမာ ပိစိဆိုရင် အကတော်တယ်။ သူ့ဟာနဲ့ သူပေါ့။ အဆင်ပြေပါတယ်။ အဲဒါကြောင့်လည်း ဖွဲ့ဖြစ်တာပေါ့နော်။ ကျွန်တော့်ကိုယ်ကျွန်တော်ဆိုရင်တော့ ကျွန်တော် အကုန်အားကျတယ်ဗျာ။ (အားလုံးရယ်လျက်) အငယ်ဆုံးလေးကရော။

မင်းခန့်ဟိန်း - တစ်ယောက်ချင်းစီတိုင်းကို အားကျတယ်။ ကျွန်တော့်အစ်ကိုတွေကို တစ်ယောက်ချင်းစီရဲ့ အားသာချက်တွေက အတုယူစရာပဲပေါ့။ ကိုထက်ဘုန်းနိုင်ဆိုလည်း ဖျော်ဖြေရေး အပိုင်းတွေမှာ စဉ်းစားတွေးခေါ်မှုတွေ အရမ်းကောင်းတယ်။

မင်းခန့်ဟိန်း - အာ့အတိုင်းပဲ အလုပ်လုပ်တဲ့အခါ အရမ်းအားကြိုးမာန်တက် ရှိတယ်။ ကိုအငယ်ဆိုရင်လည်း ဘယ်လိုပြောမလဲ တစ်ယောက်ချင်းဆီတိုင်းမှာ အတုယူစရာတွေရှိတယ်ပေါ့။

ဝီလျံထွန်း - သူတို့ပြောတဲ့ အတိုင်းပါပဲလို့။ အကုန်လုံးကတော့ အားသာချက် အားနည်းချက်တွေနဲ့ ဒီအတိုင်းပဲ အားနည်းတာကို အားသာတာနဲ့ဖြည့်ပေး အပြန်အလှန်ပေါ့။ အကုန်လုံးမှာလည်း အားသာချက်တွေ ရှိတယ်ဆိုတော့ အပြန်အလှန် Respect ပေါ့။

ဘုန်းနေမင်း -  ဘာပြောရမှန်း မသိတော့ဘူး။ လူတိုင်းက ပြည့်စုံတယ်လို့တော့မရှိပါဘူး။ အားနည်းချက် အားသာချက်တွေက ရှိတုန်းပါပဲ။ အားကျတာကတော့ အားလုံးရဲ့ အားသာချက်တွေကိုပါ။ အားနည်းချက်တွေ ကျတော့လည်း တစ်ယောက်နဲ့တစ်ယောက် ဖေးမ,ပြီးကူညီတယ်။ တစ်ယောက်နဲ့တစ်ယောက် လက်တွဲခေါ်ကြတယ်ပေါ့။

ဘုန်းနေလင်း - တော်တော်များများက စုံနေပြီ။ သူတို့လေးယောက်ပြောနဲ့တင်။ တော်တော်စုံနေပြီ။ အကုန်လုံးကို အားကျတယ် အကုန်လုံးကို ချစ်တယ် ဒါပါပဲ။

ချမ်းမြေ့ဦး - အဖွဲ့သားအချင်းချင်းအနေနဲ့ အားကျတယ်ဆိုတာထက် အပြင်လူတစ်ယောက်အနေနဲ့ဆို ကျွန်တော် Project K ခုနှစ်ယောက်စလုံးကို အားကျတယ်။ ဘာဖြစ်လို့လဲဆိုတော့ အပြင်လူတစ်ယောက် အနေနဲ့ ဝင်ခံစားကြည့်မယ်ဆိုရင် အကုန်လုံးကိုကြည့်ရတာ အရမ်းပျော်ဖို့ ကောင်းမယ်ထင်တယ်။ အကုန်လုံးက စစနောက်နောက်နဲ့။ ပြီးတော့ ဟိတ်တွေဟန်တွေလည်းမရှိဘူး။ ပြီးရင် တကယ့် ညီအကိုတွေလိုပဲဗျာ။

ချမ်းမြေ့ဦး - ခုနှစ်ယောက်စလုံးမှာလည်း သူ့ဟာနဲ့သူ အားနည်းချက်တွေရှိတယ်။ အားသာချက်တွေရှိတယ်။ ဒါပေမယ့် အားနည်းချက်ကိုလည်း တစ်ယောက်နဲ့ တစ်ယောက်က ဖိပြီး မပြောကြဘူး။ အကုန်လုံးကို ဆွဲခေါ်တယ်ဗျာ။ အဲဒီလိုကြောင့်လည်း ကျွန်တော်တို့အဖွဲ့က အချိန်တိုတိုအတွင်းမှာ အောင်မြင်မှုရတာလို့ ထင်တယ်။

မဇ္ဈိမ - ဟုတ်ပါတယ်။ ဒါဆိုရင် ကိုယ်ကိုယ်တိုင် ကိုယ့်ကိုယ်ကို အားရတဲ့ အပိုင်းဆိုရင်ရော ဘယ်အပိုင်းဖြစ်မလဲ။ ဖိုးချမ်းကပဲ စပြီးပြောပြပေးပါဦး။

ချမ်းမြေ့ဦး - ကျွန်တော့်ကိုကျွန်တော် အားရတာဆိုရင်တော့ ကျွန်တော့်ဦးနှောက်ကို ပိုကြိုက်တယ်။ ကျွန်တော် အလုပ်တစ်ခုကိုပဲ အာရုံစူးစိုက်တတ်တယ်။ ပြဿနာတစ်ခုဆိုလည်း အဖြေမထွက်မချင်း အရမ်းစဉ်းစားတယ်။ ပွဲတစ်ခုခုဆိုလည်း ဦးနှောက်က အလိုလိုနေရင်းနဲ့ အိုင်ဒီယာတွေက ထွက်လာတယ်။ အလုပ်နဲ့ ပတ်သက်လာရင် ဦးနှောက်ကို ပိုသဘောကျတယ်.. ကိုယ့်ကိုယ်ကို။

မဇ္ဈိမ - ကိုယ့်ကိုယ်ကို အားရတဲ့ အပိုင်းဆို ဘယ်အပိုင်းဖြစ်မလဲ။

ဘုန်းနေမင်း - အဲဒီလိုလည်းမဟုတ်ပါဘူး။ ကျွန်တော် ကိုယ့်ကိုယ်ကို ပြန်သုံးသပ်ရင် အားနည်းချက်တွေ အများကြီးပါပဲ။ အရာရာတိုင်းကို ကျွန်တော် Changing ပြန်လုပ်နေတယ်။ အားလုံးပေါ့နော်။ အားသာချက်ရယ်လို့ စိတ်တိုင်းကျတယ်လို့တော့ မရှိသေးပါဘူး။ ဒါပေမယ့် အရာရာတိုင်းကို အကောင်းဆုံးဖြစ်အောင် ကြိုးစားပြီး ပြင်နေတယ်ဗျ။

ဘုန်းနေလင်း - ကျွန်တော်လည်း အတူတူပါပဲ။ အရာရာတိုင်းကို ကြိုးစားပြီး ပြင်နေတယ်ဗျ။ အရမ်းကြီး အားရတယ်တော့ မဟုတ်ဘူး။ တစ်ခုတော့ရှိတာပေါ့။ ကိုယ့်ဇွဲကိုတော့ အခုအချိန်ထိ အားရတယ်။ တက်တူး ဇွဲ။ ရင်ဘတ်မှာ ရင်ဘတ်မှာ။ (ရယ်လျက်) ငယ်ငယ်တည်းက ဒီအလုပ်ကိုပဲ တစိုက်မက်မက်ပေါ့။ ဒီမြို့ခံလည်းမဟုတ်ဘူး။ နယ်ကပဲလာတယ်။ ပြီးတော့ အနုပညာ အသိုင်းအဝိုင်းလည်း ဘာမှမရှိဘူး။ ကိုယ့်ဟာကိုယ်ပဲ အားပေးရတာပေါ့။ ပေးဆပ်ရတာပေါ့။ မိသားစု အချိန်တွေရော။ ပြီးတော့ မိသားစုအားလုံးနဲ့ ခွဲခွာပြီးတော့ လာနေရတယ်။ ပေးဆပ်တယ် ဇွဲကိုပေါ့ ပေးဆပ်တယ်။

ဘုန်းနေမင်း - ကိုဇွဲလေ ဟဲ ဟဲ။ မနောက်နဲ့ မနောက်နဲ့။ ကိုယ့်ကိုယ်ကိုယ် အားရတာက ဇွဲရှိတယ်ပေါ့။

ဝီလျံထွန်း - ကိုယ့်ကိုယ်ကိုယ် အားရတာတော့ သိပ်မရှိဘူး။ အားနည်းချက်တွေချည်းပဲပေါ့နော်။ ဒါပေမယ့် ကျွန်တော့်အားနည်းချက်။ သိသာတဲ့ အားနည်းချက်ကတော့ ရုပ်ချောပြီး စိတ်ရင်းကောင်းတာပါပဲ။ (အားလုံးဝိုင်းရယ်ပြီး အဲဒီကဒ်ဖြတ်ပေးပါ)

မင်းခန့်ဟိန်း - ကျွန်တော်အားရတာထက် အားမရတာပိုများတယ်။ ဒါပေမယ့် အဲဒီထဲကမှ ခြံုကြည့်မယ်ဆိုရင်တော့ ကျွန်တော်က ငယ်ငယ်တည်းက အကလည်း အရမ်းဝါသနာပါတယ်။ အဲဒီတော့ အကအနေနဲ့ ဆိုရင်တော့ ကိုယ့်ကိုယ်ကို အားရတယ်။

ဟိန်းရာ - ကျွန်တော်က အားကစားသမားဆိုတော့ Physical နဲ့ ပတ်သက်တာတွေ လုပ်နိုင်တယ်ပေါ့နော် သူများထက်စာရင်။ သူများမနိုင်တဲ့ ဟာတွေဆိုရင် ဘယ်လိုပြောရမလဲ Physical နဲ့ ပတ်သက်တာတွေ အားရတယ်ပေါ့နော်။

ချမ်းမြေ့ဦး - ပြင်နေတုန်းပါပဲ အရင်ကလုပ်ခဲ့တာတွေရော လိုအပ်တဲ့ဟာတွေ လိုက်ပြင်နေတုန်းပါပဲ။

အပိုင်း ၂ ကို ဆက်လက်တင်ဆက်ပေးပါမည် ...