ဇွန် ၁၃ ။ ။ ယနေ့နံနက် ၁၀ နာရီခွဲအထိ တပ်မတော်ပျက်ကျလေယာဉ်မှ စုစုပေါင်း ၈၆ လောင်း ရှာဖွေတွေ့ရှိခဲ့ပြီး ဖြစ်၍ လိုက်ပါလာသူများအနက် သုံးပုံ ၂ ပုံခန့်အထိ ရုပ်အလောင်းများ တွေ့ရှိရခြင်းဖြစ်သည်။
မောင်းမကန်-မရင်းကြီး ကမ်းခြေတစ်လျှောက် ရှာဖွေရေးလုပ်ဆောင်နေသည့် မြေပြင်တပ်များက အမျိုးသားရုပ်အလောင်း ၁ လောင်း ထပ်မံရှာဖွေတွေ့ရှိခဲ့သဖြင့် ယခုအချိန်အထိ စုစုပေါင်းရုပ်အလောင်း ၈၆ လောင်း ရှာဖွေတွေ့ရှိပြီးဖြစ်သည်ဟု တပ်မတော်ကာကွယ်ရေးဦးစီးချုပ်ရုံးမှ ထုတ်ပြန်သည်။
တပ်မတော်သားမိသားစုဝင်တွေ လိုက်ပါလာသော စုစုပေါင်း လူ ၁၂၂ ဦးလိုက်ပါလာသော တပ်မတော်ပို့ဆောင်ရေးလေယာဉ်သည် ဇွန်လ ၇ ရက်က ပင်လယ်ထဲ ပျက်ကျခဲ့ခြင်းဖြစ်သည်။
လက်ရှိ ရှာဖွေတွေ့ရှိရသော ရုပ်အလောင်းများထဲတွင် ကလေးရုပ်အလောင်း ၁၅ လောင်း၊ အမျိုးသမီးရုပ်အလောင်း ၂၀ လောင်း၊ အမျိုးသားရုပ်အလောင်း ၃၈ လောင်း ရှာဖွေတွေ့ရှိခဲ့ပြီး တပ်မတော်အရာရှိ ၄ ဦးနှင့် စစ်သည် ၉ ဦး ပါဝင်ကြောင်း ဂလိုဘယ်နယူးစ်လိုက်ဖ်အော့ဖ်မြန်မာသတင်းစာတွင် ဖော်ပြထားကာ ကျား၊မ အမျိုးအမည်ခွဲခြားမရသော ရုပ်အလောင်း ၂ လောင်းပါဝင်သည်ဟု သိရသည်။
ယမန်နေ့ ဇွန်လ ၁၂ ရက်အထိ တွေ့ရှိရသော ရုပ်အလောင်းများထဲမှ ရုပ်အလောင်း ၃၅ လောင်းအား မီးသဂြိုဟ်ခဲ့ပြီး ဖြစ်သည်။
လေယာဉ်ပျက်ကျခဲ့သည့် နေရာတစ်ဝိုက်၌ တပ်မတော်(ရေ)မှ စစ်ရေယာဉ်များ၊ ကျွမ်းကျင်ရေငုပ်စစ်သည်များ၊ တပ်မတော်(လေ)မှ လေယာဉ်၊ ရဟတ်ယာဉ်များ၊ ဒေသခံငါးဖမ်းစက်လှေများဖြင့် ရှာဖွေကယ်ဆယ်ရေး လုပ်ငန်းများအား ဆက်လက်လုပ်ဆောင်လျက်ရှိကြောင်း သိရသည်။
လက်ရှိအချိန်ထိ အသက်ရှင်ကျန်ရစ်သူ ရှာဖွေတွေ့ရှိခြင်း မရှိသေးပေ။
