ဇွန် ၁၂ ။ ။ နေပြည်တော်၊ ဒက္ခိဏသီရိမြို့နယ်၊ ဒက္ခိဏသီရိဈေးအနီးတွင် ဇွန်လ ၁၂ ရက်နေ့ နံနက်(၇) နာရီ(၅၀)မိနစ်ခန့်က မန္တလာမင်း ခရီးသည်တင်ယာဉ်နှင့် အလုပ်သမားများ တင်ဆောင်လာသည့် ယာဉ်တစ်စင်းတို့ ယာဉ်တိုက်မှု ဖြစ်ပွားခဲ့ကြောင်း သိရသည်။
ဖြစ်စဉ်တွင် ဒက္ခိဏသီရိမြို့နယ်၊ ဒက္ခိဏသီရိရပ်ကွက် မိုးသောက်ပန်းလမ်းအတိုင်း ရွှေအင်ကြင်း ရပ်ကွက်ဘက်မှ ဒက္ခိဏသီရိ ဘက်သို့ ယာဉ်မောင်း ဆန်းထွန်းအောင် မောင်းနှင်လာသည့် 6M/-------- မန္တလာမင်း Express ခရီးသည်တင်ယာဉ်နှင့် အာသာဝတီလမ်းအတိုင်း ရှမ်းလေး(ခ) လွင်မျိုးဟိန်း(၂၆)နှစ် (ဘ)ဦးချစ်ဦး သီရိမင်္ဂလာကျေးရွာ၊ ရွှေခဲအင်းအုပ်စု ဒက္ခိဏသီရိမြို့နယ်နေသူ မောင်းနှင်လာသည့် 7H/-------- ဖောကားအပြာရောင်ယာဉ်တို့သည် အာသာဝတီလမ်းနှင့် မိုးသောက်ပန်းလမ်း လမ်းဆုံတွင်တိုက်မိခဲ့ကြောင်း သတင်းနှင့်ပြန်ကြားရေးမှ ထုတ်ပြန်သည်။
ဖောကားအပြာရောင်ယာဉ်ပေါ်တွင်ပါရှိသူ ကျား(၁)ဦးနှင့် မ(၁)ဦးတို့မှာ အခင်းဖြစ်ပွားရာ နေရာတွင် သေဆုံးခဲ့ကြောင်းသိရသည်။
အဆိုပါယာဉ်တိုက်မှုကြောင့် ဖောကားအပြာရောင်ယာဉ်ပေါ်တွင်ပါရှိခဲ့သည့် သီရိမင်္ဂလာကျေးရွာမှ ပန်းရံလုပ်ကိုင်သူ အလုပ်သမား ၃၀ ဦးခန့် ထိခိုက်ဒဏ်ရာရရှိသဖြင့် နေပြည်တော် ကုတင် ၁၀၀၀ ဆေးရုံ နှင့်လယ်ဝေးမြို့နယ် ကုတင် ၁၀၀ ဆေးရုံသို့ ပို့ဆောင်ထားကြောင်း သိရသည်။
