မတ် ၃၀၊ ရန်ကုန်။ ။ မြန်မာလက်ရွေးစင်ယူ-၂၀ ဖူဆယ်အသင်းပါဝင်ယှဉ်ပြိုင်မည့် အာရှယူ-၂၀ ဖူဆယ်ချန်ပီယံရှစ်ပြိုင်ပွဲအတွက် အုပ်စုခွဲဝေမှု ထွက်ပေါ်လာပြီဖြစ်ပြီး မြန်မာအသင်းမှာ အုပ်စု (ဂ)တွင် ကျရောက်နေသည်။
ပြိုင်ပွဲကို ထိုင်းနိုင်ငံ၊ ဘန်ကောက်မြို့တွင် မေ ၁၆ မှ ၂၆ ရက်အထိ ကျင်းပသွားမည်ဖြစ်ပြီး ခြောက်သင်းပါဝင်သော အုပ်စုတစ်စု၊ ငါးသင်းပါဝင်သောအုပ်စု သုံးစု၊ စုစုပေါင်း အုပ်စု လေးစုခွဲကာ ပြုလုပ်မည်ဖြစ်သည်။
မြန်မာလက်ရွေးစင်ယူ-၂၀ ဖူဆယ်အသင်းမှာ အုပ်စု (ဂ)တွင် ဥဇဘက်ကစ္စတန်၊ ကာတာ၊ လက်ဘနွန်၊ ဟောင်ကောင်အသင်း တို့နှင့် ယှဉ်ပြိုင်ရမည်ဖြစ်သည်။
အုပ်စုလေးစုမှ ပထမနှင့် ဒုတိယ ရသောအသင်းရှစ်သင်းမှာ ကွာတားဖိုင်နယ်အဆင့်သို့ တက်ရောက်ယှဉ်ပြိုင်ခွင့်ရမည်ဖြစ်သည်။