စက်တင်ဘာ ၈ ။ ။ အမေရိကန် သမ္မတ ဘားရတ်အိုဘားမားနှင့် ဖိလစ်ပိုင် သမ္မတ ရိုဒရီဂို ဒူတာတေးတို့နှစ်ဦး စက်တင်ဘာ ၇ ရက်က အချင်းချင်းလက်ဆွဲနှုတ်ဆက်ပြီး စကားစမြည် ပြောဆိုမှုရှိခဲ့သည့် တာဝန်ရှိသူများက ပြောသည်။
လာအိုတွင် ကျင်းပသည့် အာဆီယံထိပ်သီးအစည်းအဝေး မတိုင်ခင်က "မိန်းမပျက်သား" ဟု အိုဘားမားအား ဒူတာတေးက ခေါ်ဆိုသုံးနှုန်းခဲ့သည့် စကားတစ်ခွန်းကြောင့် နှစ်ဘက်ခေါင်းဆောင်များအကြား ခပ်တန်းတန်းဖြစ်သွားခဲ့ကာ တွေ့ဆုံမည့်အစီအစဉ်ပင် ပျက်ခဲ့ရသည်။
ခေါင်းဆောင်နှစ်ဦးသည် စက်တင်ဘာ ၆ ရက်က တွေ့ဆုံရန် ကြိုတင်စီစဉ်ထားခဲ့သော်လည်း ဒူတာတေး၏ ပုဂ္ဂိုလ်ရေးစော်ကားသည့်စကားတစ်ခွန်းကြောင့် အိမ်ဖြူတော်က တွေ့ဆုံမည့် အစီအစဉ်ကို ဖျက်သိမ်းသွားခဲ့သည်။
ယခုအခါ ခေါင်းဆောင်နှစ်ဦးသည် လာအိုအစည်းအဝေးတွင် ညစာစားပွဲမတိုင်မီ အခိုက်အတန့် တွေ့ဆုံမှု ရှိခဲ့သည်ဟု သိရသည်။
" အစည်းအဝေးခန်းထဲမှာ သူတို့နှစ်ဦး တွေ့ခဲ့ကြပါတယ်၊ အဲဒီအခန်းထဲကနေ သူတို့နှစ်ယောက်ပဲ နောက်ဆုံးမှ ထွက်လာကြတာပါ၊ အပြန်အလှန်လက်ဆွဲနှုတ်ဆက်ပြီး စကားနည်းနည်းလောက် ပြောခဲ့ကြပါတယ်၊ ဒီလိုမျိုး တွေ့ရတော့ အရမ်းကို ဝမ်းသာရပါတယ်" ဟု ဖိလစ်ပိုင် နိုင်ငံခြားရေးဝန်ကြီး ပါဖက်တို ယေဆေးက ပြောသည်။
