ဇူလိုင် ၂၄၊ ဆန်းဒါးလန်း။ ။ ဆန်းဒါးလန်းအသင်းသည် ဒေးဗစ်မိုယက်စ်ကိုနည်းပြသစ်အဖြစ် လေးနှစ်စာချုပ်ဖြင့်ခန့်အပ်လိုက်သည်။
အင်္ဂလန်အသင်းကိုနည်းပြရန် ဆမ်အလာဒိုက်ထွက်ခွာသွားပြီးနောက် အဲဗာတန်နှင့်မန်ချက်စတာယူနိုက်တက်နည်းပြဟောင်း အသက် ၅၃ နှစ်အရွယ် မိုယက်စ်က ဆန်းဒါးလန်းနည်းပြဖြစ်လာခဲ့သည်။
“အားပေးထောက်ခံမှုကောင်းတဲ့ ဗြိတိန်ကလပ်အသင်းကိုကိုင်တွယ်ရမှာဖြစ်ပြီး ပရီးမီးယားလိဂ်မှာ အလုပ်ပြန်လုပ်ဖို့လည်း စိတ်လှုပ်ရှားနေပါတယ်”ဟု မိုယက်စ်က ပြောသည်။
စကော့တလန်လူမျိုးမိုယက်စ်သည် နိုဝင်ဘာတွင် ဆိုစီဒက်အသင်းမှထုတ်ပယ်ခံရပြီးနောက် အသင်းလက်မဲ့နေသူဖြစ်သည်။ ၎င်းသည် ၁၀ နှစ်အတွင်း ၁၀ ယောက်မြောက်ဆန်းဒါးလန်းအသင်းနည်းပြဖြစ်လာခဲ့ခြင်းဖြစ်သည်။
ဆန်းဒါးလန်းနည်းပြဖြစ်လာပြီး ငါးနာရီအကြာတွင် ဆန်းဒါးလန်းအသင်းသည် ခြေစမ်းပွဲ၌ ရော့သာဟမ်အသင်းကို ၂-၁ ဂိုးဖြင့် အနိုင်ရခဲ့သည်။
Ref; Daily Mail
