သင်္ဃန်းကျွန်းမြို့နယ်ရှိ သုဝဏ္ဏမြို့မရဲစခန်းအား ယနေ့ ဒီဇင်ဘာလ ၅ ရက် နံနက်ပိုင်းတွင် အဝေးထိန်းမိုင်းဖြင့် ဖောက်ခွဲတိုက်ခိုက်ခဲ့ကြောင်း ရန်ကုန်တိုင်းပကဖက သတင်းထုတ်ပြန်သည်။
အနောက်ပိုင်းခရိုင်ပြည်သူ့ကာကွယ်ရေးအဖွဲ့ နှင့် မဟာမိတ်များ ပူးပေါင်းကာ နံနက် ၇နာရီခန့်က တိုက်ခိုက်ခဲ့ခြင်းဟု ရန်ကုန်တိုင်းပကဖ စစ်ရေးဒုတိယတာဝန်ခံ ကိုမင်းရန်နိုင်က ပြောသည်။ ရဲစခန်းအဝင်ဝအနီး၌ မိုင်းထားကာ ဖောက်ခွဲတိုက်ခိုက်ခြင်းဟုဆိုသည်။
"အထိအခိုက်နည်းခြင်း၊များခြင်းထက် ငါတို့မလုံခြုံတော့ဘူးဆိုတဲ့အသိကို စစ်ကောင်စီအတွက် အလုပ်လုပ်ပေးနေသူတွေအနေနဲ့ ပြန်ခံစားစေချင်လို့ မြို့ပြပြောက်ကျားစစ်ဆင်ရေးကို အကွက်ချ စီမံနေတာပါ" ဟုကိုမင်းရန်နိုင်က ပြောသည်။
ပြင်းအားမြင့်အဝေးထိန်းမိုင်းသုံးလုံးဖြင့် ဖောက်ခွဲခဲ့ရာ နှစ်လုံးပေါက်ကွဲခဲ့ပြီး ရဲတဦးဒဏ်ရာရသွားသည်ဟု အနောက်ပိုင်းခရိုင်ပကဖ စစ်ဆင်ရေးတာဝန်ခံက ပြောသည်။
“သုဝဏ္ဏဈေးနားမှာ သုဝဏ္ဏရဲစခန်းရှိတယ်။ ၇ နာရီ ၂ မိနစ်လောက်က နှစ်ချက်ကြားလိုက်ရတယ်။ လူဘာညာထိတယ်လို့မကြားမိဘူး” ဟု ဒေသခံအမျိုးသမီးတဦးက ပြောသည်။
ထိုတိုက်ခိုက်မှုဖြစ်ပွားပြီးနောက် နံနက် ၈ နာရီခန့်တွင် စစ်ကောင်စီတပ်သားများက ရဲစခန်းနားအနီးတဝိုက်ကို လမ်းပိတ်ဆို့စစ်ဆေးခဲ့ပြီး နံနက် ၉ နာရီအချိန်တွင် လမ်းပြန်ဖွင့်ပေးခဲ့ကြောင်းဒေသခံများထံမှ သိရသည်။
ဒီဇင်ဘာ ၁ ရက်နေ့ ညပိုင်းကလည်း အနောက်ပိုင်းခရိုင်ပကဖနှင့် Yangon Army(YA)တို့ ပူးပေါင်းပြီး ရန်ကင်းမြို့မရဲစခန်းအား အင်အားပြင်းမိုင်းဖြင့် တိုက်ခိုက်ခဲ့သည်။ ထိုတိုက်ခိုက်မှုသည် ပေါက်ကွဲအား အလွန်ပြင်းထန်ကြောင်း ရန်ကုန်မြို့ခံများကပြောပြီး ရဲတပ်ဖွဲ့ဝင်အချို့ ထိခိုက်သေဆုံးမှုရှိခဲ့သည်ဟု Yangon Army(YA)က သတင်းထုတ်ပြန်သည်။
စာတည်း - အေးချမ်း