ပဲခူးတိုင်း၊ ကျောက်ကြီးမြို့နယ်၊ မုန်းမြို့တွင် စစ်ကောင်စီတပ်စွဲထားသည့် စစ်ကောင်စီ၏ ခြေမြန်တပ်ရင်း ဖြစ်သည့် ခမရ (၅၉၉ ) နှင့် မြို့မရဲစခန်းနှင့် မုန်းသံတံတားရှိ စစ်ကောင်စီတပ်ကို ပြည်သူ့ကာကယ်ရေးတပ်က သိမ်းပိုက်ထားပြီး လက်ရှိတွင် မြို့၌ စစ်ကောင်စီက လျှပ်စစ်မီးနှင့် အင်တာနက်များ ဖြတ်တောက်ထားကြောင်း သိရသည်
မုန်းမြို့ရှိ စစ်ကောင်စီတပ်များအား ယမန်နေ့ ဒီဇင်ဘာ ၂ ရက်နေ့မှ စတင်ကာ တပြိုင်နက် ထိုးစစ်ဆင်တိုက်ခိုက်နေပြီး ခြေမြန်တပ်ရင်း (၅၉၀) မှလွဲ၍ ကျန်စစ်စခန်းနေရာများအား သိမ်းပိုက်ရရှိထားပြီးဖြစ်ကြောင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန အမှတ် (၂) စစ်ဒေသခွဲ၏ ဒုတိယ စစ်ဒေသခွဲမှူးထံက ပြောသည်။
"၅၉၀ ရဲ့ ဗဟိုကင်းကျန်သေးတယ်။ ကျန်တာ ရ။ လေယာဉ် ညကကတည်းက တောက်လျှောက်။ မြို့တမြို့ကို ဝင်ရောက်တိုက်ခိုက်နေတာဖြစ်ပါတယ်" ဟု NUG-MOD အမှတ် (၂) စစ်ဒေသခွဲ၏ ဒုတိယ စစ်ဒေသခွဲမှူး ရဲဘော်တင်ဦးက မဇ္ဈိမကိုပြောသည်။
လက်ရှိအချိန်အထိ တိုက်ပွဲများ ပြင်းထန်နေဆဲဖြစ်ပြီး MPT ဖုန်းလိုင်း တခုသာရတော့ပြီး ကျန်ဖုန်းလိုင်းများနှင့် အင်တာနက်များမှာ မရရှိသည့် အပြင် လျှပ်စစ်မီးလည်း ပြတ်တောက်နေကြောင်း ဒေသခံများက ပြောသည်။
" ဖုန်းလိုင်းက MPT ပဲ ရတော့တယ်။ ကျန်တာ အကုန်ပျောက်နေတာ။ မီးက တိုက်ပွဲစဖြစ်ကတည်းက ပျက်နေတာ။ ညကနေ အခုနေ့လယ်ထိ လေယာဥ်တွေဝဲနေတယ်။ လေယာဥ်ပေါ်က စက်သေနတ်နဲ့ရော ဒုံးကျည်နဲ့ပါ ပစ်နေတာ" ဟု မုန်းမြို့ပေါ်မှ ဒေသခံတဦးက မဇ္ဈိမကိုပြောသည်။
မုန်းမြို့တဝိုက်ကို စစ်ကောင်စီက တိုက်ပွဲစဖြစ်ချိန်မှစ၍ လျှပ်စစ်မီး ဖြတ်တောက်ထားပြီး ATOM၊ Ooredoo ဖုန်းလိုင်းများ တိုင်ပျောက်နေပြီး MYTEL နှင့် MPT သည်လည်း လိုင်းပျောက်လိုက် ပေါ်လိုက် ဖြစ်နေကြောင်း သိရသည်။
ထို့ပြင် တိုက်ပွဲဖြစ်ပွားနေရာ ဒေသများနှင့် အနီးတဝိုက်သို့ စစ်ကောင်စီတပ်က ဒီဇင်ဘာလ ၃ ရက်နေ့၊ နံနက် ၂ နာရီဝန်းကျင်မှစ၍ နေ့လယ်၂ နာရီအထိ လေကြောင်းတိုက်ခိုက်မှု ၁၅ ကြိမ်ထက် မနည်း ပြုလုပ်ခဲ့ပြီး အောင်းကြီးကျေးရွာ၊ ညောင်ပင်သာကျေးရွာ၊ တုံးတောကျေးရွာ၊ မုန်းမြို့ပေါ်သို့ ဗုံးသီးကျရောက်ပေါက်ကွဲမှုများရှိကြောင်း၊ စစ်ကောင်စီ၏ ကင်းထောက်လေယာဉ်လည်း ညနေ ၄ နာရီအချိန်အထိ ဆက်တိုက်ဝဲပျံနေကြောင်းသိရသည်။
တိုက်ပွဲဖြစ်ပွားမှုများနှင့် လေကြောင်းတိုက်ခိုက်မှုများကြောင့် မုန်းမြို့ပေါ်မှ ဒေသခံများသည် နေရပ်စွန့်ခွာ၍ ဘေးလွတ်ရာသို့ ထွက်ပြေးတိမ်းရှောင်လိုကြသော်လည်း အပြင် မထွက်ရဲကြသဖြင့် နေအိမ်အတွင်း၌ပင် ပုန်းခိုနေကြရကြောင်း သိရသည်။
" တစ်မြို့လုံး ဘယ်သူမှ မထွက်ရဲဘူး။ လမ်းပေါ်မှာလည်း လူရှင်းနေရော။ မြို့ထဲကလူအကုန်လုံး ဘယ်မှသွားလို့ မရဘူး။ အိမ်ထဲမှာပဲ နေနေကြရတာ။ ကျနော်တို့က မြို့လယ်ခေါင်ဆိုတော့ နည်းနည်းတော်သေးတယ်။ စခ ဂိတ်တွေနားက အိမ်တွေကိုပဲ ပိုစိုးရိမ်မိတယ်ဗျာ။ လေယာဥ်က ၁၅ မိနစ် တစ်ခါ နာရီဝက်တစ်ခါ လာပြီး ပစ်တယ်။ " ဟု အခြားဒေသခံတဦးက မဇ္ဈိမကိုပြောသည်။
တိုက်ပွဲဖြစ်ပွားသည့် အချိန် ၁၅ နာရီကျော် အတွင်း ရေအိုးစဉ်ရွာရှိ ခမရ (၅၉၀) တပ်ရင်း ထပ်မံသိမ်းပိုက်ပြီး မုန်းမြို့ကိုပါ တော်လှန်ရေးအင်အားစုများက ထိန်းချုပ်ထားကြောင်း သတင်းများ ထွက်ပေါ်လာသော်လည်း မဇ္ဈိမအနေဖြင့် ပဲခူးတိုင်း PDF တာဝန်ရှိသူများထံ ဆက်သွယ်အတည်ပြုနေဆဲဖြစ်သည်။
မုန်းမြို့သည် ပဲခူးတိုင်း ၊ ကျောက်ကြီးမြို့နယ်အတွင်းရှိ မြို့တခုဖြစ်သကဲ့သို့ ကရင်အမျိုးသားအစည်းအရုံး KNU ၏ နယ်မြေပိုင်းခြားသတ်မှတ်မှုအရ ကော်သူးလေအုပ်ချုပ်နယ်မြေလက်အောက်ရှိ ခလယ်လွီထူ (ညောင်လေးပင်)ခရိုင်၊ တပ်မဟာ (၃) မူးမြို့နယ်ဖြစ်သည်။
စာတည်း။ ။အောင်ကျော်ဖြိုး
