အမျိုးသားညီညွတ်ရေးအစိုးရ (NUG) ကျန်းမာရေးဝန်ကြီးဌာနှင့် ပညာရေးဝန်ကြီးဌာန ပြည်ထောင်စုဦးဝန်ကြီး ဒေါက်တာဇော်ဝေစိုးသည် ဩစတေးလျနိုင်ငံ အာဒီလိတ်မြို့(Adelaide) မြို့တွင် ကျင်းပသည့် မြန်မာမိသားစုများနှင့် တွေ့ဆုံပွဲ၌ ရန်ပုံငွေ ဩစတေးလျဒေါ်လာ ၂၀,၀၀၀ (နှစ်သောင်း) ဝန်းကျင်ရရှိ ကြောင်းသိရသည်။

ဩစတေးလျနိုင်ငံ တောင်ပိုင်းပြည်နယ် အာဒီလိတ်မြို့တွင် CRPH/NUG Support Group (South Australia) နှင့် United Myanmar Community South Australia (UMCSA) တို့မှ စက်တင်ဘာလ ၁၆ ရက်နေ့တွင် အဆိုပါတွေ့ဆုံပွဲကို ကြီးမှူးကျင်းပခဲ့ခြင်းဖြစ်သည်။

“ကျနော်တို့ ဒီတွေ့ဆုံပွဲမှာ တက်ရောက်လာသူတွေနဲ့ အမေးအဖြေလုပ်တာရှိတယ်၊ ဂီတာနဲ့ ပန်းချီကားလေလံတင်တာနဲ့ တက်ရောက်လာတဲ့သူများက ထည့်ဝင်တဲ့ အလှူငွေကောက်ခံတာလုပ်ခဲ့ပါတယ်” ဟု UMCSAတာဝန်ရှိသူ နှင့် အခမ်းအနားဖြစ်မြောက်ရေး တာဝန်ခံ Judah K Thang က မဇ္စျိမ ကိုပြောသည်။

ဂီတာတလက်လျှင် ၂,၅၀၀ ဒေါ်လာဖြင့် လေလံအောင်ခဲ့ကြပြီး ဒေါ်အောင်ဆန်းစုကြည် ပုံတူပန်းချီကားမှာ ဒေါ်လာ ၇၀၀ ရရှိခဲ့ကာ တက်ရောက်လာသူများက ရန်ပုံငွေများ ထည့်ဝင်ခဲ့ကြခြင်းဖြစ်ကြောင်း ဆိုသည်။

ဝန်ကြီး ဒေါက်တာဇော်ဝေစိုးနှင့် အတူ ဩစတေးလျနိုင်ငံ NUG ကိုယ်စားလှယ် ဒေါက်တာ ထွန်းအောင်ရွှေ တက်ရောက်ခဲ့ပြီး မြန်မာနွေဦးတော်လှန်ရေးနှင့်ပတ်သက်ပြီး ရှင်းလင်းပြောကြားကာ တက်ရောက်လာသူများမှ သိလိုသောမေးခွန်းများ ဖြေကြားခဲ့ကြောင်းသိရသည်။

လွန်ခဲ့သည့် နှစ်နှစ်ကျော်က သုံညနှင့်စတင်ခဲ့ပြီး ယနေ့အချိန်တွင် နေပြည်တော်ရှိ လေတပ်စခန်းကိုပင် ဗုံးကြဲနိုင်နေပြီဖြစ်သဖြင့် တော်လှန်ရေးကို မေးခွန်းထုတ်နေစရာမလိုအပ်ဘဲ အောင်ကို အောင်မြင်ရမည်ဖြစ်ကြောင်း ဝန်ကြီးက ပြောဆိုခဲ့သည်ဟု Judah K Thang က ဆက်ပြောသည်။

အဆိုပါတွေ့ဆုံပွဲတွင် ရုပ်ရှင်သရုပ်ဆောင်နှင့်အဆိုတော် အကယ်ဒမီ မင်းမော်ကွန်း ကလည်း တေးသီချင်းများဖြင့် သီဆိုတီးခတ်ဖျော်ဖြေခဲ့ကြောင်းသိရသည်။

ဝန်ကြီးသည် ဩစတေးလျရောက် မြန်မာနိုင်ငံသားကျန်းမာရေးဝန်ထမ်းများနှင့်လည်း တွေ့ဆုံခဲ့ပြီး ၎င်းတို့မှလည်း ရန်ပုံငွေများထည့်ဝင်ခဲ့ကြကြောင်းသိရသည်။

ဒေါက်တာဇော်ဝေစိုးသည် ဩစတေးလျနိုင်ငံသို့ ရောက်ရှိနေချိန်တွင် ပြည်နယ်အသီးသီးရှိ မြန်မာနိုင်ငံသားများနှင့် တွေ့ဆုံသွားမည်ဖြစ်ကြောင်း UMCSA တာဝန်ရှိသူထံက သိရှိရသည်။

စာတည်း - သန့်ဇော်(သန်လျင်)