မဇ္ဈိမကတင်ဆက်နေသည့် သတင်းမှားများကိုတိုက်ဖျက်ခြင်း - Misinformation Buster အစီ အစဉ်သို့ သတင်းတုစစ်ဆေးရန် လာရောက်ပေးပို့သည့်အထဲတွင် လူမှုကွန်ရက်စာမျက်နှာများဖြစ်သော ချေးငွေလုပ်ငန်း၊ ငွေအတုအရောင်းအဝယ်၊ ဆိုင်ကယ်အရောင်းအဝယ် စသည့်ဖြင့် အင်တာနက်အသုံးပြု သူများထံမှ ပုံစံအမျိုးမျိုးဖြင့် လိမ်လည်နေသည့် အကြောင်းဖြစ်သည်။ 

ယခုဆောင်းပါးတွင် လာရောက်မေးမြန်းမှုများအနက်မှတခုဖြစ်သည့် မြစိမ်းရောင်ငွေချေးလုပ်ငန်း လူမှု ကွန်ရက်စာမျက်နှာအကြောင်းကို ဖော်ပြသွားမည် ဖြစ်သည်။
မဇ္ဈိမသို့ ပေးပို့မေးမြန်းထားသည့် လူမှုကွန်ရက်စာမျက်နှာမှာ “မြစိမ်းရောင် ချေးငွေလုပ်ငန်း (ချေးငွေထုပ် ပေးသည့်ရုံ)” ဖြစ်သည်။ ၂၀၂၂ ခုနှစ် ဇန်နဝါရီလ၌စတင်အသုံးပြုခဲ့ပြီး “မြစိမ်းရောင် ချေးငွေလုပ်ငန်း” အမည်မတိုင်မီ လေးကြိမ်အမည်ပြောင်းလဲထားကာ စီမံခန့်ခွဲသူ(Adimn) ၁၁ ဦီးရှိပြီး အားလုံးမှာ မြန်မာ နိုင်ငံအတွင်းမှဖြစ်သည်။ 

အဆိုပါ လူမှုကွန်ရက်စာမျက်နှာမှာ ကြိုက်နှစ်သက်သူ ၁၀,၀၀၀ နှင့် စောင့်ကြည့်နေသူ ၁၃,၀၀၀ အထိ ရှိနေသည်။ ၎င်းတို့အကြောင်းဖော်ပြသည့်နေရာတွင် “စီးပွားဖြင့် ဘဝမြင့်တင်ပါ ယုံကြည်စိတ်ချဆုံး . မြစိမ်းရောင်.. ချေငွေလုပ်ငန်း. ” ဟု ရေးသားထားသည်။ 
ယင်းစာမျက်နှာတွင် ၎င်းတို့ပိုက်ဆံလာရောက်ချေးသူများဆိုပြီး ဘယ်နေ့တွင် ဘယ်သူ့ကိုတော့ ပိုက်ဆံ ဘယ်လောက် ပမာဏထုတ်ပေးလိုက်ပြီဟုရေးသားကာ လူအများ၏ အလှဓာတ်ပုံတစ်ပုံ၊ ၎င်းတို့၏ မှတ်ပုံတင်၊ အိမ်ထောင်စုစာရင်းတို့အား တပါတည်းဖော်ပြထားသည်ကို တွေ့ရသည်။ 
အဆိုပါစာမျက်နှာ၌ ဖော်ပြထားသည့်ဖုန်းနံပါတ်အားဆက်သွယ်ကြည့်ခဲ့ရာတွင် ငွေချေးသူ၏ မှတ်ပုံတင်၊ အိမ်ထောင်စုစာရင်းအပြင် အာမခံပေးမည့်သူ၏ မှတ်ပုံတင်လိုအပ်ပြီး ဝန်ဆောင်ခအနေဖြင့် အပြီးအစီး ၄၅,၀၀၀ ကျပ် ပေးရမည်ဖြစ်ကြောင်း ပြန်လည်ဖြေဆိုသည်။ 
ယခု ဆောင်းပါးရေးသားနေစဉ် ၎င်းတို့နောက်ဆုံးဖော်ပြထားသည့်ပိုစ့်၌ “ ချေးငွေထုပ်သူကိုသီဟဇင်. ပုသိမ်းမြို့မှချေးငွေအား မထုပ်ကြောင်းအတုအလင်ကြော်ညှာပါတယ်” (မူရင်းအရေးအသားအတိုင်း)ဟု ဖော်ပြထားသည်။ စာအရေးအသား၊ အဖြတ်အတောက်၊ စာလုံးပေါင်းများလည်း မှားယွင်းနေသလို မည် သည့်အကြောင်းကြောင့် ထိုသို့ကြေညာသည်ကိုလည်း မဖော်ပြပေ။ 

အဆိုပါ လူမှုကွန်ရက်စာမျက်နှာတွင် စစ်ကောင်စီလက်အောက်ခံမီဒီယာဖြစ်သည့် MRTV မှ မြစိမ်းရောင် ကျေးရွာစီမံကိန်းအကြောင်းဖော်ပြထားသည့် ရုပ်သံဖိုင်ပေါ်တွင် ၎င်းတို့၏ဖုန်းနံပါတ်ကို ထည့်သွင်းဖော် ပြထားသည်။ အခြား မြစိမ်းရောင်ချေးငွေလုပ်ငန်း စာမျက်နှာလေးခုနှင့် “SME ချေးငွေလုပ်ငန်း” တို့တွင် လည်း ဆက်သွယ်ရန်အတွက် ထိုဖုန်းနံပါတ်ကိုပင် ဖော်ပြသည်။ 

မဆိုင်းဂျာအမည်ဖြင့် ၎င်းတို့ငွေထုတ်ချေးထားသည်ဟု ကာယကံရှင်၏ပုံနှင့်အတူ အချက်အလက်များ ဖော်ပြထားသေးသည်။ ထိုအမည်ဖြင့်ပင် ၂၀၂၃ ခုနှစ်အတွင်း ငွေထုတ်ချေးထားကြောင်း ဖော်ပြခံရမှု ၁၀ ခုထက် မနည်းရှိနေသည်။ “SME Online ချေးငွေလုပ်ငန်း” ၊ “မြစိမ်းရောင် အွန်းလိုင်းချေးငွေ” ၊ “မြစိမ်း ရောင် ချေးငွေလုပ်ငန်း” ၊ “SME ချေးငွေလုပ်ငန်း” ၊ “ဆောနစ်စတား ချေးငွေလုပ်ငန်း” ၊ “SME တရားဝင် လိုင်စင်ရ Online ချေးငွေလုပ်ငန်း” ၊  “ SME.online ချေးငွေလုပ်ငန်း” စသည့် စာမျက်နှာများ၌ ဖော်ပြ ထားခြင်းဖြစ်သည်။ ထိုဖော်ပြမှုများတွင် ရက်စွဲနှင့် ငွေပမာဏမှလွဲ၍ စာအရေးအသားနှင့် ကာတွန်းပုံ (emoji) များမှာလည်း အတူတူပင်ဖြစ်သည်။ 

အလားတူပင် မသိမ့်သိမ့်သူအမည်ဖြင့် မှတ်ပုံတင်နှင့်တကွဖော်ပြမှု အခု ၂၀ ကျော်ရှိနေသည်။ အခြား အမည်များဖြစ်သော မငုဝါဝါထွန်း၊ မအိအိဝင်း၊ မစိုးမြတ်သူဇာ၊ မဖြူဖြူသက် စသည်ဖြင့် ငွေထုတ်ချေး ထားသည်ဟုဆိုကာ ဖော်ပြမှုများစွာရှိနေသည်။ 
လူတဦးတည်း၏ပုံဖြင့် ပေ့ချ်များစွာမှ ငွေထုတ်ချေးထားကြောင်း အကြိမ်ကြိမ်ဖော်ပြထားခြင်းဖြစ်သည်။ ထိုသို့ဖော်ပြမှုတွင် အများစုသည် အမျိုးသမီးများဖြစ်ပြီး အမျိုးသားများကိုမူ ရံဖန်ရံခါမှ တွေ့ရသည်။ 

မဇ္ဈိမသို့ သတင်းပေးပို့လာရာတွင် “မြစိမ်းရောင်ငွေချေးလုပ်ငန်းမှ စာရွက်စာတမ်းဖိုး ၄၇၅၀၀/ နောက် ဘဏ်လွှဲရန် ကိုယ်စားလှယ်ခ ၁၅၀,၀၀၀ ၊ (kpay ထဲလွှဲရန်ပြောတော့ ၁၀၀,၀၀၀) နောက်တော့ wave account သို့လွှဲပြီးမှ (မူလရပြီ လွှဲလိုက်မည်‌ပြောပြီးမှ ၁၀၀,၀၀၀ လက်ခံရပြီးမှ)ထပ်ပြီး ရှေ့နေခ ၄၀၀,၀၀၀ အဆင့်ဆင့်တောင်းပါတယ်။ မယုံတော့ပါ။ ရုံးခန်းလာပေးမယ်ပြောတော့ မြဝတီမှာတဲ့” ဟု ငွေလိမ်ခံခဲ့ရမှုကို ပြောပြထားသည်။
 
မဇ္ဈိမက ထိုကဲ့သို့ ငွေလိမ်သည့် လူမှုကွန်ရက်စာမျက်နှာများအကြောင်း အစဉ်တစိုက် ဖော်ပြခဲ့ပြီးဖြစ် သည်။ ၂၀၂၂ ခုနှစ် ဩဂုတ်လတွင် “အွန်လိုင်းကတဆင့် ငွေကြေးလိမ်လည်သူများအကြောင်း တစေ့ တစောင်း” ဟု ငွေလိမ်လည်မှုများအကြောင်းကို ဖော်ထုတ်ခဲ့ပြီးဖြစ်သည်။ ယခု ၂၀၂၃ ခုနှစ် ဩဂုတ်လ အထိလည်း ထိုသို့ ငွေလိမ်နေသည့် စာမျက်နှာများ ရှိနေဆဲပင်။ 
လင့်- https://bit.ly/3P08qGa 

အဆိုပါ မြစိမ်းရောင်ချေးငွေလုပ်ငန်းကို မဇ္ဈိမကမေးမြန်းခဲ့ရာ ၎င်းတို့အနေဖြင့် ပုဂ္ဂလိကပိုင်ဖြစ်ပြီး အစိုးရ ပိုင်လည်းရှိသည်ဟု ပြောသည်။ 
အမှန်မှာ မြစိမ်းရောင်ဟူသည့်အမည်ဖြင့် ကျေးရွာစီမံကိန်းတခုသာရှိပြီး မြစိမ်းရောင်ချေးငွေလုပ်ငန်းဟူ သည့် လုပ်ငန်းမျိုး မရှိပေ။ 
၂၀၁၄-၂၀၁၅ ဘဏ္ဍာနှစ်မှစတင်ကာ နိုင်ငံတော်အစိုးရက “မြစိမ်းရောင်ကျေးရွာစီမံကိန်း”အား စတင် အကောင်အထည်ဖော်ခြင်းဖြစ်သည်။ ယင်းစီမံကိန်းသည် ရန်ပုံငွေမတည်ကာ ကျေးရွာများရှိ အိမ်ထောင် စုများ လိုအပ်နေသော ငွေကြေးအား သက်သာသောအတိုးနှုန်းဖြင့် ထုတ်ချေးသည့် စီမံကိန်းဖြစ်သည်။ 
စီမံကိန်းအနေဖြင့် ငွေချေးခွင့်ပြုရန်ရွေးချယ်ရာတွင် အချက်ငါးချက်ဖြင့်ရွေးချယ်ပြီး ယခု လူမှုကွန်ရက် စာမျက်နှာကဖော်ပြသကဲ့သို့ ကြုံရာလူကို ချေးပေးခြင်းမဟုတ်ပေ။ 

ရန်ပုံငွေများအား အဆင့်လေးဆင့်ဖြင့်သတ်မှတ်ထားပြီး (၁) အိမ်ခြေ ၁၀၀ နှင့်အထက်ကို ကျပ်သိန်း ၃၀၀ ၊ (၂) အိမ်ခြေ ၅၀ နှင့် ၁၀၀ ကြားကို ကျပ်သိန်း ၂၀၀ ၊ (၃) အိမ်ခြေ ၅၀ နှင့်အောက် ကျပ်သိန်း ၁၀၀ ၊ (၄) အိမ်ခြေ ၈၀ အောက် ကျပ်သိန်း ၁၀၀ စသည်ဖြင့် ရန်ပုံငွေထားရှိကာ ယင်းရန်ပုံငွေမှတဆင့် ချေးငွေ ပြန် လည်ချေးပေးခြင်းဖြစ်သည်။ ထိုအကြောင်းကို စစ်ကောင်စီ၏ MWD သတင်း ဝက်ဆိုက်တွင် ဖော်ပြထား သည်။ လင့် - https://bit.ly/3Z2sPPv , https://bit.ly/3Zc8Eig 
မဇ္ဈိမအနေဖြင့် ငွေချေးလုပ်ငန်းတစ်ခုဖြစ်သည့် အေယွန်ချေးငွေလုပ်ငန်း (Aeon Microfinance Myanmar)ကိုမေးမြန်းရာတွင်  ချေးငွေလျှောက်ထားသူအနေဖြင့် ချေးငွေအား ကိုယ်တိုင် ရုံးတွင်သွား ရောက်ထုတ်ယူရခြင်းဖြစ်ပြီး ဘဏ်မှတဆင့် ချေးငွေကို လွှဲပေးခြင်းမရှိကြောင်း ပြောသည်။ 
မန္တလေးတိုင်း၊ ကျောက်ပန်းတောင်းမြို့နယ်ရှိ ကျေးရွာတခုမှ ချေးငွေ ချေးယူဖူးသူတဦးကလည်း ၎င်းတို့ ရွာသို့ လာရောက်ပြီး ကုမ္ပဏီမှ တိုက်ရိုက်ပေးခြင်းမျိုးသာရှိသည်ဟု မဇ္ဈိမသို့ ပြောသည်။ 

ထို့ကြောင့် မြစိမ်းရောင်ချေးငွေလုပ်ငန်းဆိုသည်မှာ အမှန်တကယ်မရှိဘဲ မြစိမ်းရောင်ကျေးရွာစီမံကိန်းမှ လုပ်ဆောင်ချက်အား ချေးငွေလုပ်ငန်းအယောင်ဆောင်ကာ ပြည်သူများထံမှ ငွေကြေးလိမ်လည်ရန်နှင့်  အချက်အလက်များရယူနေခြင်းများအား လုပ်ဆောင်နေခြင်းဖြစ်သည်။ 
ထို့ကြောင့် အင်တာနက်အသုံးပြုသူများအနေဖြင့် လူမှုကွန်ရက်တွင် ချေးငွေလုပ်ငန်းစာမျက်နှာအတုများ ရှိနေခြင်းကြောင့် အလိမ်မခံရအောင် သတိပြုနိုင်ဖို့လိုအပ်ကြောင်း အသိပေးအပ်ပါသည်။

မဇ္ဈိမ၏သတင်းဖတ်ရှုသူများအနေဖြင့် သတင်းတုဟုသံသယရှိသည့် အချက်အလက်များ၊ သတင်းဆောင်း ပါးများ၊ သတင်းမှားများကို ယခုလင့် - https://bit.ly/3x5qnf5 သို့ ဝင်ရောက်ဖြည့်စွက် ရေးသားပေးပို့ မေးမြန်းနိုင်ပါသည်။

စာတည်း။  ။စောဖေ

#Misinformation_Buster
#Fake_News 
#မြစိမ်းရောင်ချေးငွေလုပ်ငန်း