မန္တလေးတိုင်း၊ မြင်းခြံခရိုင်၊ ငါန်းဇွန်မြို့နယ်၊ ငါန်းမြှားရဲစခန်းကို ဒရုန်းဖြင့် တိုက်ခိုက်ခဲ့ရာ စစ်ကောင်စီဘက်မှ အများအပြားထိခိုက်သေဆုံးသည်ဟု Myingyan District Drone Strike အဖွဲ့မှ ယမန်နေ့ သြဂုတ်လ ၁၈ရက်တွင် သတင်းထုတ်ပြန်သည်။
ဩဂုတ် ၁၇ ရက် နံနက် ၇ နာရီကျော်ခန့်တွင် စစ်ကောင်စီတပ်သားများနှင့် ရဲအင်အား ၂၀ ကျော်ရှိနေသော ငါန်းမြှားရဲစခန်းအား ဝေဟင်မှ ဒရုန်းဖြင့် ဗုံးသီးနှစ်လုံးချတိုက်ခိုက်ခဲ့ခြင်းဖြစ်သည်ဟု ယင်းအဖွဲ့တာဝန်ခံက မဇ္စျိမသို့ပြောသည်။
“ စ-(စစ်ကောင်စီတပ်သား) တကောင် နဲ့ ပျူ အုပ်ချုပ်ရေးမှူးတယောက် ပေါင်းနှစ်ယောက် သေဆုံးသွားပါတယ်ဗျ။ ၁၇ ရက်နေ့ မနက်ပိုင်း ၇နာရီ မှာ ဒရုန်းနှစ်စီးနဲ့ စတင်တိုက်ခိုက်ခဲ့တာပါ။ အဲဒီနေ့ ညပိုင်း ၈နာရီမှာ စ-(စကစတပ်သား)ကား သုံးစီး၊ နာရေးကားတစီး ဝင်လာတယ် ။ အလောင်းနှစ်လောင်းသယ်ပြီး ပြန်ထွက်သွားတယ်လို့ မြေပြင်သတင်းပို့လာပါတယ်ဗျ။ စခန်းမှာလည်း တပ်ကူတွေလည်း ချန်ခဲ့တယ်။ ခက်ခက်ခဲခဲ ရေတွေကျော်ဖြတ်သွားခဲ့ပြီး ညအိပ်စောင့်ပြီး လေငြိမ်တဲ့ မနက်မှ ဒရုန်းတိုက်ခိုက်မှုစတင်ခဲ့ရတာပါဗျ။” ဟု Myingyan District Drone Strike အဖွဲ့ တာဝန်ခံမှ မဇ္စျိမကို ပြောသည်။
ဗုံးသီးချတိုက်ခိုက်မှုကြောင့် စစ်ကောင်စီတပ်ဘက်မှ ထိခိုက်သေဆုံးမှုနှင့် ပတ်သက်ပြီး မဇ္စျိမအနေဖြင့် သီးခြားအတည်မပြုနိုင်သေးပေ။
မြင်းခြံခရိုင်၊ ငါန်းဇွန်မြို့နယ် ၊ အလယ်သောင်ရွာတွင် စစ်ကောင်စီတပ်သားများ စစ်ကြောင်းထိုးဝင်ရောက်ကာ သြဂုတ်လ ၁၆ရက်နေ့တွင် အိမ်ခြေ ၃၀ခန့်ကို မီးရှို့ဖျက်ဆီးနေကြောင်းလည်း ထိုတာဝန်ခံထံမှ သိရသည်။
အဆိုပါစစ်ကောင်စီတပ် စစ်ကြောင်းအား ဒရုန်းဖြင့်တိုက်ခိုက်ရန်သွားခဲ့ခြင်းဖြစ်သော်လည်း အခွင့်မသာခဲ့၍ ငါန်းမြှားရဲစခန်းကို ဒရုန်းဖြင့်တိုက်ခိုက်ခဲ့ခြင်းဖြစ်သည်ဟု ဆိုသည်။
ယမန်နေ့ သြဂုတ်လ ၁၈ရက် မွန်းလွဲ ၁နာရီအချိန်တွင်လည်း မြောင်မြို့နယ်၊ ကျောက်ရစ်ရဲစခန်းမှ စစ်ကောင်စီတပ်များသည် စစ်သဘော လုံခြုံရေးပေးရန် ပရိမ္မကျေးရွာသို့ စီးနင်းဝင်ရောက်ပြီး နေရာယူနေစဉ် ဝေဟင်မှ ဒရုန်းဖြင့် တိုက်ခိုက်မှု နှစ်ကြိမ်ပြုလုပ်ခဲ့ဟု ၎င်းတာဝန်ခံက ပြောသည်။
အဆိုပါတိုက်ခိုက်မှုများကို Myingyan District Drone Strikeနှင့်အတူ မြင်းခြံခရိုင်အမှတ် (၄) တပ်ရင်း Natogyi People Defence Force၊ Shar Htoo Waw နည်းပညာတပ်ဖွဲ့ Team 2၊ 27Revolution Forces(မြင်းခြံခရိုင်အမှတ်-၁ တပ်ရင်း)၊ မြင်းခြံခရိုင်အမှတ် (၁)တပ်ရင်း တပ်ခွဲ(၂)၊ မြင်းခြံခရိုင်အမှတ် (၃ )တပ်ရင်း ၊ မိတ္ထီလာခရိုင်ဒရုန်းတပ်ဖွဲ့၊ ညောင်ဦးခရိုင် ဒရုန်းတပ်ဖွဲ့တို့မှ ပူးပေါင်းတိုက်ခိုက်ခဲ့ခြင်းဖြစ်ကြောင်း သိရသည်။
စာတည်း - သန့်ဇော်(သန်လျင်)
#mizzima
#ငါန်းမြှားရဲစခန်း
#ဒရုန်း
#တိုက်ခိုက်
