မုတ်သုံလေဆက်လက်အားကောင်းနေပြီး လတ်တလော ရေဘေးရင်ဆိုင်နေရသော ဒေသများ၌ မိုးကြီးနိုင်ပြီး ရေကြီးရေလျှံမှုဘေး ဆက်လက်သတိပြုရန် အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာစီမံခန့်ခွဲရေး၀န်ကြီးဌာန (MOHADM)က သတင်းထုတ်ပြန်သည်။
သြဂုတ်လ ၇ ရက်နေ့မှ ၁၃ ရက်နေ့အထိ မိုးလေ၀သအခြေအနေကို MOHADM က သတိပေးထားရာ၌ ယခုရက်ပိုင်းအတွင်း ချင်းပြည်နယ်နှင့် ရခိုင်ပြည်နယ်တို့တွင် မိုးသည်းထန်နိုင်ပြီး ကျန်တိုင်းနှင့် ပြည်နယ်များတွင် မိုးကောင်းနိုင်သည်ဟု ပါဝင်သည်။ ဖြစ်ပေါ်လာနိုင်သည့် နောက်ဆက်တွဲ ရေကြီး ရေလျှံမှုနှင့် မြေပြိုမှုဘေးများအတွက် အထူးသတိထား ပြင်ဆင်နေထိုင်ရန် အသိပေးထားသည်။
ဩဂုတ်လဆန်းမှစတင်ကာ မြန်မာနိုင်ငံအနှံအပြားတွင် မိုးကောင်းနေပြီး ကရင်ပြည်နယ်၊ ရခိုင်ပြည်နယ်နှင့် မွန်ပြည်နယ်တွင် မြို့နယ်အချို့၍ ရေကြီးနစ် မြုပ်မှုရင်ဆိုင်နေရသည်။ ယင်းဒေသများမှ မြစ်ချောင်းများတွင်လည်း စိုးရိမ်ရေမှတ်အထက်သို့ မြင့်တက်နေသည်။
ရခိုင်ပြည်နယ်တွင် ဩဂုတ်လ ၁၀ရက်နောက်ပိုင်း မိုးအားအနည်းငယ်လျော့နိုင်သော်လည်း သြဂုတ်လ ၁၄ ရက်နေ့နှင့် ၁၅ ရက်နေ့များတွင် မိုးသည်းထန်နိုင်သည့်အတွက် ဒေသခံများအနေဖြင့် အလေးထားပြင်ဆိုင်နေထိုင်သင့်ကြောင်း MOHADM ၏ ထုတ်ပြန်ချက်တွင် ဖော်ပြထားသည်။
စစ်ကောင်စီလက်အောက်ခံ မိုးဇလဌာနက ယနေ့ သြဂုတ်လ ၉ ရက် ရာသီဥတုအခြေအနေအရ
ရခိုင်ပြည်နယ်၊ပဲခူးတိုင်း၊ ဧရာဝတီတိုင်း၊ ကရင်ပြည်နယ်နှင့် မွန်ပြည်နယ်တွင် မိုးကြီးနိုင်သည်ဟု သတိပေးထားသည်။
စာတည်း - မောင်ကြီး
