စစ်အုပ်ချုပ်ရေး ကြေညာထားသည့် ကောလင်းမြို့နယ် ကျောက်တန်းရွာရှိ ဒေသခံများ၏  နေအိမ်ကို  စစ်ကောင်စီတပ်က ဝင်ရောက်ဖျက်ဆီးကာ ၎င်းတို့အလိုရှိသည့် ပစ္စည်းများကို ခိုးယူသွားကြောင်း ကောလင်း အခြေစိုက် Kawlin Revolution-KRအဖွဲ့ က ယနေ့ မေလ ၃၁ ရက်တွင် သတင်းထုတ်ပြန်သည်။

မေ ၂၆ ရက်က ကောလင်းမြို့မှ စတင်ထွက်ခွာလာသည့် စစ်ကောင်စီတပ်သည် မေ ၂၈ ရက်တွင် ကျောက်တန်းရွာသို့  ဝင်ရောက်လာခဲ့ခြင်းဖြစ်သည်။ 

စစ်ကောင်စီတပ်သည်  ပစ္စည်းများကို ကားကြီး၊ ကားငယ်များဖြင့် တင်ဆောင်ပြီး ၎င်းတို့ အထိုင်ချရာ သစ်ဖုလတောင်ကုန်း (အရပ်ခေါ် ဒေါ်ချစ်ဘုရား)သို့ သယ်ဆောင်သွားကြောင်း  Kawlin Revolution-KR အဖွဲ့ တာဝန်ရှိသူက ဆိုသည်။

ပြီးခဲ့သည့် မေလ ၂၈ ရက် မနက် ၉ နာရီတွင် သစ်ဖုလှတောင်ကုန်း မှ ကောလင်း-ကျောက်တန်းလမ်း အတိုင်း ကျောက်တန်းရွာသို့ ဆင်းလာသည့် စစ်ကောင်စီတပ်သည် ကျောက်တန်း အ.ထ.က စာသင်ကျောင်းရှေ့တွင် လည်း ကျောက်တန်းရွာသားတစ်ဦးကိုလည်း  ပစ်သတ်သွားကြောင်းမဇ္ဈိမရဲ့မြေပြင်အဖွဲ့က စုံစမ်းသိရှိထားသည်။

လက်ရှိတွင် ကောလင်းမြို့နယ် အင်ငူ - စံလယ် - ကျောက်တန်း - ခံသာ - ဆင်ကုန်းရွာများသို့ စစ်ကောင် စတပ်အင်အား ၁၅၀ ကျော်က ဖြန့်ကျက်နေရာယူထားပြီး တိုက်ပွဲအခြေအနေအသေးစိတ်ကို မဇ္ဈိမရဲ့ မြေပြင် သတင်းအဖွဲ့က ဆက်လက်စုံစမ်းနေဆဲ ဖြစ်သည်။

ကောလင်းမြို့နယ်  ကျောက်တန်းရွာသည် စစ်ကိုင်းတိုင်းအထက်ပိုင်း ကချင်ပြည်နယ်အစပ်တွင် တည်ရှိသည်။ 

စာတည်း။ ။အောင်ကျော်ဖြိုး