The Eldersအဖွဲ့က ထုတ်ပြန်သည့် မစ္စတာဘန်ကီမွန်း၏ မြန်မာခရီးစဥ် ထုတ်ပြန်ချက်မှာ ဆွေးနွေးချက်များနှင့် ကွဲလွဲပြီး လိုရာဆွဲဖော်ပြသည်ဟု အာဏာသိမ်းစစ်ကောင်စီက ဧပြီလ ၂၈ ရက်နေ့က ကြေညာချက်ထုတ်ပြီး ဝေဖန်ခဲ့သည်။
The Eldersအဖွဲ့၏ ဒုတိယဥက္ကဋ္ဌဖြစ်သူ ကုလသမဂ္ဂအထွေထွေအတွင်းရေးမှူးချုပ်ဟောင်း မစ္စတာ ဘန်ကီမွန်း၏ ဧပြီလ ၂၃ ရက်နေ့မှ ၂၄ ရက်နေ့အထိ မြန်မာ့ခရီးစဥ်နှင့် ပတ်သက်ပြီး The Eldersအဖွဲ့က ကြေညာချက်ထုတ်ပြန်ပြီး သုံးရက်အကြာတွင် စစ်ကောင်စီဘက်က အထက်ပါအတိုင်း ထုတ်ပြန်လာခြင်းဖြစ်သည်။
The Eldersအဖွဲ့ အပါအဝင် နိုင်ငံတကာ အသိုက်အဝန်းအနေဖြင့် တစ်ဖက်သတ် အကြံပြုတိုက်တွန်းချက်များအစား မြန်မာနိုင်ငံအတွက် မှန်ကန်သောအဆိုပြုတိုက်တွန်းချက်များ၊ လက်တွေ့ကျသည့် ပူးပေါင်းဆောင်ရွက်မှုများကိုသာ ပြုလုပ်ရန်လိုသည်ဟု စစ်ကောင်စီက တုံ့ပြန်သည်။
ထို့ပြင် မစ္စတာ ဘန်ကီမွန်းနှင့် ဆွေးနွေးချက်များမှာ အပြုသဘောဆောင်ခဲ့ပြီး စစ်ကောင်စီ တာဝန်ရှိသူများ၏ ရှင်းလင်းပြောကြားမှုများကြောင့် မစ္စတာဘန်ကီမွန်းအနေဖြင့် မြန်မာနိုင်ငံအရေးရှုပ်ထွေးသည်ကို ပိုမိုနားလည်သဘောပေါက်လာသည်ဟု စစ်ကောင်စီက ဖော်ပြသည်။
စစ်ကောင်စီ၏ ထုတ်ပြန်ချက်တွင် မစ္စတာ ဘန်ကီမွန်း၏ တောင်းဆိုချက်များနှင့် ပတ်သက်၍ ဖော်ပြထားခြင်း မရှိပေ။
စစ်ကောင်စီခေါင်းဆောင်များနှင့် တွေ့ဆုံမှုတွင် အကြမ်းဖက်မှုများကို ချက်ချင်းရပ်တန့်ရန်နှင့် အာဆီယံ၏ သဘောတူညီချက် ငါးရပ်ကို အကောင်အထည်ဖော်ရန် တောင်းဆိုခဲ့သည်ဟု The Eldersအဖွဲ့၏ ဧပြီလ ၂၅ ရက်နေ့ ကြေညာချက်တွင် ပါရှိသည်။
ယင်းထုတ်ပြန်ချက်အပေါ် မြန်မာ့အရေးသည် ပြည်တွင်းရေးသာဖြစ်သည်ဟုလည်း စစ်ကောင်စီက ပြန်လည်တုံ့ပြန်သည်။
စစ်ကောင်စီအနေဖြင့် နိုင်ငံတကာက အကောင်းမြင်စေရန်အတွက် The Elders အဖွဲ့ကို ခေါ်ယူဆွေးနွေးခြင်းသာဖြစ်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က ပြောသည်။
"နိုင်ငံတကာနဲ့ စစ်ကောင်စီနဲ့ ဆက်စပ်ပြီး လုပ်ဆောင်မှုရှိတယ်ဆိုတဲ့ ပုံရိပ်ကို ဖော်ပြဖို့အတွက်သာ အသုံးချတာဖြစ်ပြီး လက်တွေ့အားဖြင့် မြန်မာပြည်ပြဿနာဖြေရှင်းရေးအတွက် ဒီအဖွဲ့အစည်းရော ဘန်ကီမွန်းရဲ့တောင်းဆိုချက်ကိုရော လိုက်လျောဖို့ သဘောထားမရှိဘဲနဲ့ အကြမ်းဖက်မှုတွေ ဆက်လုပ်နေတာပါ။ အဲ့ဒီတော့ သိပ်ပြီးတော့ အကြောင်းမထူးပါဘူး"ဟု ဆိုသည်။
မြန်မာခရီးစဉ်အတွင်း မစ္စတာ ဘန်ကီမွန်းအနေဖြင့် ရေရှည်တည်တံ့သည့် အဖြေရရှိရေးအတွက် အမျိုးသားညီညွတ်ရေးအစိုးရ( NUG )အပါအဝင် ပါတီအားလုံး၏ ပါဝင်မှုကို လိုအပ်ကြောင်း အလေးပေးပြောကြားခဲ့ကြောင်း သိရသည်။
အာဆီယံ ဘုံသဘောတူညီချက် ငါးရပ်နှင့် ပြီးခဲ့သည့် ဒီဇင်ဘာလက ကုလသမဂ္ဂလုံခြုံရေးကောင်စီ ဆုံးဖြတ်ချက် အမှတ် ၂၆၆၉ ကို အကောင်အထည်ဖော်ရာတွင် တိုးတက်မှုကို အရေးတကြီးလိုအပ်ကြောင်း၊ မတရားဖမ်းဆီးထားသော အကျဥ်းသားအားလုံးကို ချက်ချင်းပြန်လွှတ်ရန်၊ အပြုသဘောဆောင်သည့် တွေ့ဆုံဆွေးနွေးမှုများ ပြုလုပ်ရန်နှင့် ပါတီများအားလုံးအနေဖြင့် အစွမ်းကုန်ထိန်းထိန်းသိမ်းသိမ်း ပြုလုပ်ကြရန် နိုင်ငံတကာ အသိုင်းအဝိုင်း၏ တောင်းဆိုချက်များကို မစ္စတာ ဘန်ကီမွန်းက ထောက်ခံအားပေးခဲ့သည်ဟု The Eldersအဖွဲ့က ဖော်ပြသည်။
ထို့ပြင် လက်ရှိ အခြေအနေအရ ရွေးကောက်ပွဲကျင်းပခြင်းက အကြမ်းဖက်မှုနှင့် သွေးကွဲမှုများကို ပိုမိုဖြစ်ပေါ်စေပြီး ရလဒ်များကို မြန်မာနိုင်ငံသားများ၊ အာဆီယံနှင့် နိုင်ငံတကာ အသိုင်းအဝိုင်းက အသိအမှတ်ပြုမည် မဟုတ်ကြောင်း ပြောကြားခဲ့သည်ဟုလည်း ပါရှိသည်။
ကုလသမဂ္ဂ အထွေထွေအတွင်းရေးမှူးချုပ်ဟောင်း မစ္စတာ ဘန်ကီမွန်း၏ မြန်မာခရီးစဥ်တွင် စစ်ကောင်စီ ခေါင်းဆောင် မင်းအောင်လှိုင်၊ သမ္မတဟောင်း ဦးသိန်းစိန်၊ ကာကွယ်ရေးဝန်ကြီးဌာန ပြည်ထောင်စုဝန်ကြီး ဗိုလ်ချုပ်ကြီး မြထွန်းဦး၊ စစ်ကောင်စီ နိုင်ငံခြားရေးဝန်ကြီး ဦးသန်းဆွေတို့
နှင့်လည်း တွေ့ဆုံခဲ့သည်။
အဆိုပါ တွေ့ဆုံမှုနှင့်ပတ်သက်ပြီး NUG ယာယီသမ္မတ ဒူဝါလရှီးလက ကန့်ကွက်ရှုတ်ချထားကာ ပြည်သူလူထု၏ အသက် အိုးအိမ်စည်းစိမ်ကို လက်လွတ်စပယ် သတ်ဖြတ်ညှဥ်းဆဲနေသည့် အကြမ်းဖက်စစ်ကောင်စီကို နိုင်ငံတကာ ဇာတ်ခုံတွင် လူမိုက်ကို ပွဲထုတ်နေသည်ဟု ယူဆကြောင်း ပြောကြားထားသည်။
စာတည်း - သန့်ဇော်(သန်လျင်)
