တနင်္သာရီတိုင်း၊ မြိတ်မြို့ပေါ်ရှိရပ်ကွက်များသို့ လာရောက်တိမ်းရှောင်နေကြသည့် စစ်ဘေးရှောင်ပြည်သူများ ဖမ်းဆီးငွေညှစ် ခြိမ်းခြောက်ခံရနေကြောင်း ဒေသခံများထံမှ သိရသည်။
မြိတ်မြို့ မြိတ်တောင်ကျေးရွာအုပ်စု ဇေယျာသိရီ(၃)ရပ်ကွက်ရှိ ပေါ်ဦးလမ်းတွင် မတ်လ ၂၇ ရက်နေ့ ညပိုင်းက နေအိမ်သုံးလုံးကို ဧည့်စာရင်းစစ်ပြီး ဖမ်းဆီးကာ လူတစ်ဦးလျှင် ကျပ် ၅၀,၀၀၀ ဒဏ်ငွေဆောင် ခိုင်းကြောင်း ရပ်ကွက်နေသူအချို့ကပြောသည်။
“သိရသလောက်က စစ်ရှောင်တွေက ပုလောဖက်ကလို့ သိရတယ်။ ဧည့်စာရင်သွားတိုင်လည်း ရာအိမ်မှူး က ရေးမပေးဘူးတဲ့။ ညပိုင်းရောက်တော့ ဧည့်စာရင်းလာမတိုင်လို့ဆိုပြီး ဖမ်းသွားတယ် ”ဟု ပေါ်ဦးလမ်း နေ ဒေသခံတစ်ဦးကပြောသည်။
မြိတ်ခရိုင်အတွင်း စစ်အုပ်ချုပ်ရေးကြေညာထားသည့် တနင်္သာရီနှင့် ပုလောမြို့နယ်တို့မှ မြိတ်မြို့ပေါ်သို့ တိမ်းရှောင်လာပါက ရပ်ကွက်များတွင် နေထိုင်ခွင့်မပေးရန်နှင့် ရောက်ရှိလာပါကလည်း ရပ်ကျေးအုပ် ချုပ်ရေးမှူးများထံ သတင်းပို့ရန် စစ်ကောင်စီကညွန်ကြားထားကြောင်း မြို့ခံများထံမှ သိရသည်။
“ မြိတ်မှာ အခုရက်ပိုင်း ရပ်ကွက်တွေမှာ ညဖက်ဆို CDM နဲ့ NLD ပါတီဝင်တွေ လိုက်ဖမ်းနေသလို ဧည့် စာရင်းစစ် ဖမ်းဆီးမှုတွေ ပြန်လုပ်လာနေလို့ ဖမ်းဆီးခံနေရတာတွေ ရှိနေတယ်” ဟု မြိတ်တောင်နယ်မြေ ဘုရားကိုင်ရပ်နေ ဒေသခံတစ်ဦးကလည်း ပြောသည်။
စစ်ကောင်စီတပ်နှင့် လက်အောက်ခံအဖွဲ့စည်းများ၏ ဖမ်းဆီးခံရသူအများစုသည် ဒဏ်ငွေ ၅၀,၀၀၀ ကျပ် မှစ၍ သိန်းချီတောင်းယူခံနေရကြောင်း သိရသည်။
စာတည်း ။ ။Alden
စာမူတည်းဖြတ်။ ။စောဖေ
