စစ်ကိုင်းတိုင်း၊ရွှေဘိုမြို့ ကားကြီးကွင်းအနီးတွင် မတ် ၂၈ရက်၊ နံနက်ပိုင်းက နေရာ နှစ်ခု၌ ဗုံးပေါက်ကွဲမှုဖြစ်ပွားခဲ့ရာ ကလေးငယ် နှစ်ဦးအပါအဝင် ၂၀ဦး ထိခိုက် ဒဏ်ရာရရှိခဲ့ပြီး ၎င်းအထဲမှ ဆေးရုံ အရောက်တွင် အမျိုးသား တစ်ဦး သေဆုံးသွားကြောင်းသိရသည်။
ကာကြီးကွင်းအနီးက တံတားပေါ်နှင့် ကားကြီးကွင်း မြောက်ဘက်လမ်းတွင် ပေါက်ကွဲမှုဖြစ်ပွားခဲ့ခြင်းဖြစ်သည်။
"တံတားပေါ် က အရင်ပေါက်ကွဲတာ။ အဲဒီမှာ ထိခိုက်သူတွေကို ကူညီပေးနေတုန်း မြောက်ဘက်က ထပ်ပေါက်တာပဲ။"ဟု ဒေသခံတစ်ဦးကပြောသည်။
ကလေးငယ် နှစ်ဦးအပါအဝင် အမျိုးသား ၁၂ဦး၊အမျိုးသမီး ရှစ်ဦးတို့ကိုရွှေဘို ဆေးရုံကြီးသို့ လူမှုကူညီရေး အသင်းတစ်ခုက ကူညီပို့ဆောင်ပေးခဲ့ပြီး ဆေးရုံအရောက်တွင် တစ်ဦးသေဆုံးခဲ့ပြီး စိုးရိမ်ရသည့် လူနာ ခြောက်ဦးကို မန္တလေးပြည်သူ့ဆေးရုံကြီးသို့ လွှဲပြောင်းပေးခဲ့ကြောင်းသိရသည်။
မန္တလေး - ရွှေဘိုလမ်းပိုင်းတွင် အကြမ်းဖက်စစ်ကောင်စီတပ်နှင့်ပြည်သူ့ကာကွယ်ရေးတပ်ဖွဲ့တို့ တိုက်ပွဲများ နေ့စဥ်နီးပါး ဖြစ်ပွားလျှက်ရှိကြောင်းသိရသည်။
စာတည်း - သန့်ဇော်(သန်လျင်)
