မ​ဇ္စျိမ။ ။ စစ်ကောင်စီ၏ နိုင်ငံရေးပါတီများမှတ်ပုံတင်ခွင့်ဥပဒေအရ စစ်ကောင်စီလက်အောက်ခံ ပြည်ထောင်စုရွေးကောက်ပွဲကော်မရှင်တွင် ပါတီဆက်လက်တည်ထောင်ခွင့်နှင့် မှတ်ပုံတင်ခွင့် ပြန်လျှောက်ထားသည့် နိုင်ငံရေးပါတီ ရှစ်ခု အထိ ရှိလာပြီဖြစ်ကြောင်း သိရသည်။

ယခင်က ကြံ့ခိုင်ရေးပါတီအပါအဝင် မှတ်ပုံတင်ခွင့်လျှောက်ထားသည့် ပါတီ ငါးပါတီရှိပြီး ယမန်နေ့ ဖေဖော်ဝါရီလ ၂၂ ရက်နေ့က ဒီမိုကရက်တစ်အင်အားစုလေဘာပါတီ၊ ဒီမိုကရေစီပါတီသစ် (ကချင်)နှင့် ပြည်သူ့အကျိုးပြုကျောင်းသားများပါတီတို့က ထပ်မံလျှောက်ထားလာခြင်းဖြစ်ကြောင်း ယနေ့ထုတ် စစ်ကောင်စီဝါဒဖြန့် မီဒီယာများတွင် ဖော်ပြထားသည်။

ဒီမိုကရက်တစ်အင်အားစုလေဘာပါတီကမူ နိုင်ငံရေးပါတီအသစ်အဖြစ် တည်ထောင်ရန် လျှောက်ထားခြင်းဖြစ်ကြောင်း သိရသည်။

ပါတီများတွင် ကြံ့ခိုင်ရေးပါတီက မှတ်ပုံတင်ခွင့်ကို အစောဆုံးလျှောက်ထားခဲ့ခြင်းဖြစ်ပြီး ထို့နောက်တွင် ဖက်ဒရယ်ဒီမိုကရက်တစ်ပါတီ၊ ပြည်ထောင်စုဒီမိုကရေစီပါတီ (UDP)၊ မြန်မာပြည်သူ့ဒီမိုကရက်တစ်ပါတီ (MPD)နှင့် ပအိုဝ်းအမျိုးသားအဖွဲ့ချုပ်ပါတီ (PNO) တို့က အသီးသီး လျှောက်ထားခဲ့ကြခြင်းဖြစ်သည်။

လက်ရှိ မှတ်ပုံတင်ခွင့် ပြန်လျှောက်ထားသည့် ပါတီများတွင် ၂၀၂၀ ပြည့်နှစ်အထွေထွေရွေးကောက်ပွဲရလဒ်နှင့် ပတ်သက်ပြီး စစ်ခေါင်းဆောင်မင်းအောင်လှိုင်ထံ သွားရောက်တိုင်တန်းခဲ့သည့် ပါတီအများစု ပါဝင်သည်။

ထို့အပြင် စစ်ကောင်စီခန့်ဝန်ကြီး ဒေါ်သက်သက်ခိုင်ဦးဆောင်သည့် PPP ပါတီကလည်း ပြန်လည်မှတ်ပုံတင်မည်ဖြစ်ကြောင်း ကြေညာထားသည်။ 

လက်ရှိတွင် နိုင်ငံရေးပါတီ ၉၀ ကျော်ရှိပြီး အဆိုပါ ပါတီများ ဇန်နဝါရီလ ၂၆ ရက်နေ့ကစပြီး နှစ်လအတွင်း မှတ်ပုံပြန်မတင်ပါက ပါတီအလိုအလျောက်ပျက်ပြယ်မည်ဟု စစ်ကောင်စီက ပြဋ္ဌာန်းထားသည်။

ပါတီများအတွက် ပြဋ္ဌာန်းသည့် ဥပဒေအသစ်သည် နိုင်ငံရေးပါတီများကို အကျပ်ဆိုက်စေပြီး ပါတီမှတ်ပုံပြန်တင်၊ မတင် ပါတီတွင်းဆွေးနွေးမှုများ ပြုလုပ်ရဦးမည်ဖြစ်ကြောင်း အင်အားကြီးပါတီအချို့က ပြောဆိုထားကြသည်။

ပြီးခဲ့သည့် ၂၀၂၀ ရွေးကောက်ပွဲတွင် အနိုင်ရခဲ့သည့် အမျိုးသားဒီမိုကရေစီအဖွဲ့ချုပ်ပါတီ (NLD) အနေဖြင့်မူ စစ်ကောင်စီ၏ ဆောင်ရွက်မှုမှန်သမျှသည်တရားဝင်မှုမရှိဘဲ စစ်ကောင်စီရွေးကောက်ပွဲကိုလည်း လက်မခံကြောင်း ထုတ်ပြန်ထားသည်။

စာတည်း - သန့်ဇော်(သန်လျင်)