ပါကစ္စတန်နိုင်ငံ ပါ့ရှ်ဝါမြို့ရဲလိုင်းခန်းရှိ ဗလီတစ်ခုတွင် ဇန်နဝါရီ ၃၀ ရက်က အသေခံဗုံးခွဲမှု ဖြစ်ပွားခဲ့ကာ ရဲတပ်ဖွဲ့ဝင် အများစု အပါအဝင် လူ ၁၀၀ ခန့် သေဆုံးခဲ့ရပြီးနောက် ပါကစ္စတန်အစိုးရက လုံခြုံရေးအတွက် ပုဂ္ဂလိကကုမ္ပဏီများကို ငှားရမ်းရန် တရုတ်နိုင်ငံသားများကို ညွှန်ကြားထားသည်ဟု Dawn သတင်းတွင် ဖော်ပြထားသည်။

ပန်ဂျပ်ပြည်ထဲရေးဌာနက ပြည်နယ်အတွင်းနေထိုင်သော သို့မဟုတ် ပုဂ္ဂလိက ကုမ္ပဏီတွင် အလုပ်လုပ်ကိုင်နေသော တရုတ်လူမျိုးများကို လုံခြုံရေးအတွက် ပထမတန်းအဆင့်ရှိ ပုဂ္ဂလိကလုံခြုံရေးကုမ္ပဏီများကို ငှားရမ်းရန် ညွှန်ကြားခဲ့သည်။

ခရိုင်အတွင်းရှိ အစိုးရနှင့် ပုဂ္ဂလိကစီမံကိန်းများတွင် လုပ်ဆောင်နေသည့် တရုတ်နိုင်ငံသားများ၏ လုံခြုံရေးကို ပြန်လည်သုံးသပ်ရန် ဇန်နဝါရီ  ၂ ရက်နေ့တွင် ပြည်ထဲရေးဌာနနှင့် ရဲတပ်ဖွဲ့တို့ တွေ့ဆုံဆွေးနွေးခဲ့ကြောင်း Dawn သတင်းတွင် ဖော်ပြထားသည်။
ပန်ဂျပ်ပြည်နယ်အစိုးရသည် ၂၀၁၄ ခုနှစ်တွင် နိုင်ငံတော်၏ အရေးပါသော စီမံကိန်းအမျိုးမျိုးတွင် လုပ်ဆောင်နေသော နိုင်ငံခြားသားများ၏ လုံခြုံရေးအတွက် အထူးကာကွယ်ရေးယူနစ် (SPU) ကို သီးသန့်အဖွဲ့အဖြစ် တည်ထောင်ခဲ့သည်။

လုံခြုံရေးရဲတပ်ဖွဲ့ဝင် ၃ ၃၃၆ ဦး၊ ယာဉ်မောင်း ၁၈၇ ဦး၊ ကြိုးမဲ့အော်ပရေတာ ၂၀ ခု ၊ အကြီးတန်းလုံခြုံရေးတပ်သားအဆင့်မှ လုံခြုံရေးအကြီးအကဲအဆင့်အထိ စစ်မှုထမ်းဟောင်း ၂၄၄ ဦးနှင့် ညွှန်ကြားရေးမှူးနှင့် ဒုတိယညွှန်ကြားရေးမှူးအဆင့်ရှိ စစ်မှုထမ်းဟောင်း ၇ ဦးတို့ကို SPU တွင် ခေါ်ယူခန့်ထားခဲ့သည် ဟု Dawn သတင်းက ဖော်ပြသည်။
လက်ရှိတွင် ခရိုင်များမှ လုံခြုံရေးတပ်ဖွဲ့ ၂ ၅၅၂ ဦးတို့နှင့်အတူ SPU မှ အရာရှိ ၃ ၈၂၉ ဦးသည်  ပြည်နယ်အတွင်းရှိ တရုတ်-ပါကစ္စတန်စီးပွားရေးစင်္ကြံ (CPEC) စီမံကိန်း ၄ ခုနှင့် CPEC မဟုတ်သော စီမံကိန်း ၂၇ ခုတွင် လုပ်ကိုင်နေသော တရုတ်နိုင်ငံသား ၇ ၅၆၇ ဦးအား လုံခြုံရေးဆောင်ရွက်ပေးလျက်ရှိသည်။ 

အဆိုပါတပ်ဖွဲ့ဝင်များသည် ပြည်နယ်အတွင်းရှိ လူနေအိမ် ၇၀ နှင့် စခန်း ၂၄ ခုတွင် နေထိုင်သည့် တရုတ်နိုင်ငံသားများကိုလည်း လုံခြုံရေးပေးထားကြောင်း Dawn သတင်းတွင် ဖော်ပြထားသည်။
နိုင်ငံတွင်း အကြမ်းဖက်မှု ဖြစ်စဉ်များ မြင့်တက်လာသောကြောင့် အစိုးရစီမံကိန်းများတွင် လုပ်ဆောင်နေသော တရုတ်အရာရှိများ၏ လုံခြုံရေးကို ပိုမိုတိုးမြှင့်ထားကြောင်း SPU ညွှန်ကြားရေးမှုးချုပ် အဂ္ဂါယူဆက်ဖ်က ပြောကြားခဲ့သည်။

SPU သည် CPEC နှင့် အခြားသော အစိုးရနှင့် ဆက်နွှယ်သည့် စီမံကိန်းများတွင် လုပ်ကိုင်နေသော တရုတ်လူမျိုးများ၏ လုံခြုံရေးအတွက် တာဝန်ယူထားပြီး ပုဂ္ဂလိက စီမံကိန်းများတွင် လုပ်ကိုင်နေသော သို့မဟုတ် နိုင်ငံသို့လာလည်သည့် တရုတ်နိုင်ငံသားများအား လုံခြုံရေးအတွက် လုံခြုံရေးကုမ္ပဏီများကို ငှားရမ်းရန် ညွှန်ကြားထားကြောင်း ၎င်းက ပြောသည်။ 

အစိုးရ စီမံကိန်းများတွင် လုပ်ဆောင်နေသော တရုတ်လူမျိုးများ၏ လုံခြုံရေးအတွက် စရိတ်ကို အစိုးရက ပေးဆောင်နေသော်လည်း SPU ဝန်ထမ်းများကို နေရာတိုင်းတွင် တာဝန်ချထားနိုင်ခြင်း မရှိသည့်အပြင် ပုဂ္ဂလိက ကုမ္ပဏီများတွင် လုပ်ကိုင်နေသော တရုတ်နိုင်ငံသားများ၏ လုံခြုံရေးအတွက် အစိုးရက ငွေကြေးစိုက်ထုတ်ပေးခြင်း မပြုနိုင်ကြောင်း ယူဆက်ဖ်က ပြောကြားခဲ့သည်။

ပုဂ္ဂလိက ကုမ္ပဏီများနှင့် လုပ်ကိုင်နေသည့် တရုတ်နိုင်ငံသားများသည် ကိုယ်ပိုင်လုံခြုံရေးအတွက် ငှားရမ်းရမည်ဖြစ်ပြီး ပြည်ထဲရေးဌာနက ကုမ္ပဏီများကို အကဲဖြတ်မည်ဖြစ်ကြောင်း SPU ညွှန်ကြားရေးမှုးချုပ် အဂ္ဂါယူဆက်ဖ်က ပြောသည်။