ကမ္ဘာ့ဖလားပြိုင်ပွဲဟာ လွန်ခဲ့တဲ့ လေးနှစ်အတွင်း စံချိန်တင် ဒေါ်လာ ၇.၅ ဘီလီယံအထိ ဝင်ငွေရအောင် ကူညီပေးခဲ့တယ်လို့ ကမ္ဘာ့ဘောလုံးအဖွဲ့ချုပ်ဥက္ကဋ္ဌက ထုတ်ဖော် ပြောကြားခဲ့သလို ဖီဖာက ကမ္ဘာ့ဖလား လက်မှတ်ပေါင်း သုံးသန်းနီးပါး ရောင်းချခဲ့ရတယ်လို့ တနင်္ဂနွေနေ့က ပြောပါတယ်။
လက်မှတ်ပေါင်း ၂.၉၅ သန်းကို တနင်္ဂနွေနေ့ အဖွင့်နေ့အထိ ရောင်းချခဲ့ရတယ်လို့ ဖီဖာ ပြောရေးဆိုခွင့်ရှိသူတစ်ဦးက AFP ကို ပြောကြားခဲ့ပါတယ်။
ကာတာရဲ့ အိမ်ရှင်အဖြစ် လက်ခံကျင်းပတာကို အပျက်သဘောဆောင်တဲ့ လူသိရှင်ကြားထုတ်ဖော်မှုတွေရှိနေပေမယ့်လည်း ၂၉ ရက်ကျော်အတွင်း ပွဲစဉ် ၆၄ ပွဲအပေါ် ကမ္ဘာ့ဖလားပြိုင်ပွဲ စတင်ချိန်မှာ စိတ်ဝင်စားမှု မြင့်တက်လာမှုကို ဦးဆောင်နေပါတယ်။
ဒိုဟာရှိ ဖီဖာလက်မှတ်စင်တာအပြင်ဘက်မှာ တန်းစီစောင့်ဆိုင်းနေကြပြီး တရားဝင်အွန်လိုင်းလက်မှတ်ပလပ်ဖောင်းပေါ် ရောက်ဖို့ အချိန်အကြာကြီး စောင့်ဆိုင်းနေရတယ်လို့ ပရိသတ်တွေက သတင်းပို့ပါတယ်။
၂၀၁၈ ရုရှားကမ္ဘာ့ဖလားတုန်းက လက်မှတ်ပေါင်း ၂.၄ သန်းကျော်သာ ရောင်းချခဲ့ရတာကြောင့် ရုရှားကို ကာတာက ကျော်ဖြတ်ပြီးဖြစ်ပါတယ်။
ကာတာ၊ ဆော်ဒီအာရေဗျ၊ အမေရိကန်၊ မက္ကဆီကို၊ ဗြိတိန်၊ အာရပ်စော်ဘွားများ ပြည်ထောင်စု၊ အာဂျင်တီးနား၊ ပြင်သစ်၊ အိန္ဒိယနှင့် ဘရာဇီးလ်တို့ဟာ ထိပ်တန်းဈေးကွက်တွေဖြစ်တယ်လို့ ပြောရေးဆိုခွင့်ရှိသူက ပြောပါတယ်။
ဖီဖာဥက္ကဋ္ဌ ဂီယန်နီ အင်ဖန်တီနိုက ကမ္ဘာ့ဘောလုံးအဖွဲ့ချုပ်ရဲ့ လေးနှစ်တာ ဝင်ငွေဟာ ဒီနှစ်ကုန်မှာ ဒေါ်လာ ၇.၅ ဘီလီယံအထိ ရှိမယ်လို့ ခန့်မှန်းထားကြောင်း အစောပိုင်းက ညီလာခံတစ်ခုမှာ ပြောကြားခဲ့ပါတယ်။
ဝင်ငွေဟာ လွန်ခဲ့တဲ့ လေးနှစ်က ခန့်မှန်းထားတာထက် ဒေါ်လာ ၁ ဘီလီယံကျော် ပိုပြီးမြင့်တက်လာပါတယ်။
"ကမ္ဘာတဝှမ်းက မတူညီတဲ့ အကျပ်အတည်းတွေ၊ ကိုဗစ်ကြားကနေ" "အံ့သြဖွယ်ကောင်းတဲ့ ကိန်းဂဏန်းတွေ"ဟာ ရောက်ရှိလာတယ်လို့ အင်ဖန်တီနိုက အဖွဲ့အသင်းဝင် ၂၁၁ နိုင်ငံကို ပြောကြားခဲ့ပါတယ်။
အင်ဖန်တီနိုဟာ ဥက္ကဋ္ဌ ရွေးကောက်ပွဲမှာ ပြိုင်ဖက်တွေ အချိန်မီ မပါဝင်ခဲ့တဲ့နောက် မတ်လမှာ ကျင်းပမယ့် ကွန်ဂရက်မှာ ကန့်ကွက်သူမရှိ ပြန်လည်အရွေးခံဖို့ ရှိနေပါတယ်။
ဘောလုံးအေးဂျင့်တွေ ထိန်းချုပ်တဲ့ စည်းမျဉ်းသစ်တွေကို ဒီနှစ်အတွင်း ထုတ်ပြန်မယ်လို့ သူက ဆိုပါတယ်။
အင်ဖန်တီနိုက မတူညီတဲ့ဒေသတွေနဲ့ ကြီးမားတဲ့ ကလပ်ကမ္ဘာ့ဖလားပြိုင်ပွဲကနေ နိုင်ငံအသင်းတွေကြား ကစားပွဲတွေ ပိုများလာကို မြင်ချင်တယ်လို့လည်း ပြောပါတယ်။ “ကျနော်တို့မှာ အကြံဉာဏ်ကောင်းတွေ ရှိပါတယ်” လို့ သူက ထည့်သွင်း ပြောကြားသွားခဲ့ပါတယ်။
(AFP)
