တရုတ်နိုင်ငံသည် ဘဏ္ဍာရေးအကျပ်အတည်းကို အဆက်မပြတ် ရင်ဆိုင်နေရသောကြောင့် သမ္မတရှီကျင့်ဖျင်သည် အောက်တိုဘာ ၁၆ ရက်တွင်စတင်မည့် တရုတ်ကွန်မြူနစ်ပါတီ၏ ၂၀ ကြိမ်မြောက် ညီလာခံ၌ ပါတီ၏တိုးတက်မှုကို စီးပွားရေးအားဖြင့် အမွှမ်းတင်၍ ရနိုင်ဖွယ်မရှိကြောင်း Financial Postက ဖော်ပြသည်။

တရုတ်စီးပွားရေးသည် ဆိုးဆိုးရွားရွားကျဆင်းသောဖိအားများနှင့် အချိန်တိုတိုအတွင်း ကျော်လွှား၍မရနိုင်သည့် ပြဿနာများစွာကို ရင်ဆိုင်နေရသည်ဟု Financial Post က ဆိုသည်။

ကိုရိုနာဗိုင်းရပ်ကြောင့် အသွားအလာပိတ်ဆို့မှုများ၊ အိမ်ခြံမြေဈေးကွက်အတွင်း အဂတိလိုက်စားမှုနှင့် အကျပ် အတည်းများကို အာဏာပိုင်များက အသည်းအသန်တိုက်ဖျက်မှုတို့ကြောင့် တရုတ်၏စီးပွားရေး ပြိုလဲသွား နိုင်သည်" ဟု လေ့လာသူအများအပြားက မှတ်ချက်ပြုသည်။

ရှီသည် တရုတ်ကွန်မြူနစ်ပါတီ၏ ၂၀ ကြိမ်မြောက် အစည်းအဝေးမိန့်ခွန်း၌ တရုတ်စီးပွားရေးသည် အနောက်နိုင်ငံများ၏ ဒဏ်ခတ်ပိတ်ဆို့မှုများကိုသာမက ကိုဗစ်-၁၉ ကပ်ရောဂါကိုပါ တွန်းလှန်နိုင်ခဲ့ကြောင်းနှင့် ကျိုးကြောင်းဆီလျော်သော တိုးတက်မှုကို အောင်မြင်စွာ စီမံခန့်ခွဲနိုင်ခဲ့ကြောင်း ပြောဆိုလိမ့်မည်ဟု မျှော်လင့်ရကြောင်း သတင်းတွင် ဖော်ပြထားသည်။

သို့သော် ယခင်ကွန်ဂရက်များနှင့်မတူစွာ ယခုတစ်ခေါက်တွင် စီးပွားရေးအတွက် ကြွးလုံးထုတ်စရာမရှိကြောင်း Financial Post က ဖော်ပြသည်။

တရုတ်နိုင်ငံသည် ယခုနှစ် ပထမနှစ်ဝက်တွင် လွန်ခဲ့သည့်နှစ်ကထက် တိုးတက်မှု ၂ ဒသမ ၅ ရာခိုင်နှုန်းသာ ရှိခဲ့ပြီး ဆယ်စုနှစ် သုံးခုအတွင်း အနိမ့်ဆုံးတိုးတက်မှုဖြစ်သည်။လက်လီရောင်းချမှုမှာလည်း ဧပြီလတွင် ၁၁ ရာခိုင်နှုန်း ကျဆင်းပြီးနောက် ပထမနှစ်ဝက်တွင် ယခင်နှစ်ထက် ၀ ဒသမ ၇ ရာခိုင်နှုန်း လျော့နည်းခဲ့သည်။

တင်းကျပ်သော ကိုဗစ်-၁၉ မူဝါဒများကြောင့် နိုင်ငံ၏အိမ်ခြံမြေဈေးကွက် ထိုးကျကာ စားသုံးသူများ၏ အသုံးစရိတ်များ နည်းပါးလာစဉ်တွင် တရုတ်ရှိ ဥရောပကော်ပိုရိတ်ရင်းနှီးမြှုပ်နှံမှုများ ဆုတ်ယုတ်လာသလို ပထဝီနိုင်ငံရေးတင်းမာမှုများကြောင့် အမေရိကန်ရင်းနှီးမြှုပ်နှံမှုမှာ တုံ့ဆိုင်းလာခဲ့သည်။