ဒီမိုကရေစီသည် တိဗက် ပြည်သူများအတွက် ဒလိုင်းလားမား ပေးအပ်သည့် အကောင်းဆုံးလက်ဆောင်များထဲမှ တစ်ခုဖြစ်ကြောင်း လန်ဒန်အခြေစိုက် တိဗက်အရေး တက်ကြွလှုပ်ရှားသူ ဆာရင်ပါဆန်က ပြောကြားသည်။

သို့သော် တရုတ်၊ တိဗက်နှင့် အရှေ့တာကစ္စတန်တို့တွင် ဖိနှိပ်မှုများ ဆက်လက်ကျူးလွန်နေသဖြင့် တရုတ် ကွန်မြူနစ်ပါတီသည်ဒီမိုကရေစီ၊ လွတ်လပ်မှုနှင့် တရားမျှတမှု၏ နံပါတ် ၁ ရန်သူဖြစ်လာကြောင်း ၎င်းက ပြောသည်။

 ၁၉၆၀ ခုနှစ် စက်တင်ဘာလ ၂ ရက်နေ့တွင် ဒလိုင်းလားမားမှ စတင်မိတ်ဆက်ခဲ့သည့် အခြေခံကျကျ နိုင်ငံရေး ပြုပြင်ပြောင်းလဲမှုများသည် တိဗက်လူမျိုးများအတွက် အရေးပါသော ကာလဖြစ်လာခဲ့သည်။ နောက်ပိုင်းတွင် ယင်းနေ့ကို အဝေးရောက်တိဗက်လူမျိုးစုများအကြားတွင် တိဗက်ဒီမိုကရေစီနေ့အဖြစ် သတ်မှတ်ကျင်းပခဲ့သည်။

ကမ္ဘာတစ်ဝန်းရှိ တိဗက်လူမျိုးများသည် စက်တင်ဘာ ၂ ရက်က ၆၂ နှစ်မြောက် တိဗက်ဒီမိုကရေစီနေ့ကို ကျင်းပခဲ့ကြသည်။ တိဗက်ဒီမိုကရေစီနေ့ အခမ်းအနား၏ တစ်စိတ်တစ်ပိုင်းအနေဖြင့် မိန့်ခွန်းများနှင့် ရိုးရာယဉ်ကျေးမှု ဖျော်ဖြေပွဲများကို နှစ်စဉ်ကျင်းပလျက်ရှိသည်။

ပြည်သူများအတွက်ပေးသော ဒလိုင်းလားမား၏လက်ဆောင်ကို ဂုဏ်ပြုသည့်အနေဖြင့် ရေးစပ်ထားသည့် တိဗက်ဒီမိုကရေစီသီချင်း Mangtso Sar-zheကိုလည်း သီဆိုကြသည်။ တိဗက်များသည် ရွေးကောက်ပွဲများ ကျင်းပ၍ နိုင်ငံရေးခေါင်းဆောင်များကို တိုက်ရိုက်ရွေးချယ်ကြသည်။

တိဗက်နှင့်ဖိနှိပ်ခံလူနည်းစုများအတွက် ကမ္ဘာလုံးဆိုင်ရာမဟာမိတ်အဖွဲ့ကို တည်ထောင်သူ ဥက္ကဋ္ဌ ဆာရင်ပါဆန်က “ဒီနေ့ စက်တင်ဘာ ၂ ရက်နေ့ တိဗက်ဒီမိုကရေစီနေ့မှာ ဒလိုင်းလားမားကို ကျေးဇူးတင်ကြောင်းနဲ့ သတိရအောက်မေ့ကြောင်း ပြောကြားလိုပါတယ်” ဟု တွစ်တာ၌ ရေးသားခဲ့သည်။

လန်ဒန်တွင် တိဗက်အသိုက်အဝန်းအဖွဲ့က တိဗက်ဒီမိုကရေစီနေ့ကို ကျင်းပခဲ့ကာ လူ ၅၀ နီးပါးခန့် တက်ရောက်ခဲ့ကြသည်။