ဖေဖေါ်ဝါရီ ၂၁၊ ရန်ကုန် ။ ။ ရန်ကုန်ယူနိုက်တက်အသင်းနည်းပြချုပ် မာယန်က မြန်မာယူ-၂၀အသင်းနောက်ခံလူ သီဟထက်အောင် အနေဖြင့် ခြေစွမ်းပိုမိုတိုးတက်လာနိုင်ပြီး ရန်ကုန်အသင်းအတွက်အားထားရသည့် ကစားသမားတစ်ဦးဖြစ် လာနိုင်သည်ဟု ချီးကျုးပြောကြားခဲ့သည်။
မြန်မာယူ-၂၀အသင်းနှင့်အတူယူ-၂၀ကမ္ဘာ့ဖလားဝင်ရောက်ယှဉ်ပြိုင်ခဲ့သော နောက်ခံလူသီဟထက်အောင်မှာ စည်းကမ်းဖောက်ဖျက်မှုများကြောင့် မြန်မာနိုင်ငံဘောလုံးအဖွဲ့ချုပ်မှ ပွဲပယ်ပြစ်ဒဏ်ချမှတ်ခဲ့သလို ရန်ကုန်အသင်းတွင်လည်း အရန်ကစားသမားအဖြစ်သာပါဝင်ကစားနေရသည်။
၂၀၁၆ မြန်မာနေရှင်နယ်လိဂ် ပွဲစဉ်(၇)ပွဲစဉ်ဖြစ်သော ရခိုင်ယူနိုက်တက်ကို ၃-၁ဂိုးဖြင့်နိုင်ခဲ့သောပွဲတွင် နည်းပြမာယန်က သီဟထက်အောင်ကို ရန်ကုန်ကစားသမားဘဝပထမဆုံးအဖြစ် ပွဲထွက်စာရင်းတွင်ပါဝင်ခွင့်ပေးခဲ့သည်။
“သီဟထက်အောင်က ခြေစွမ်းကောင်းတဲ့လူငယ်ကစားသမားတစ်ဦးပါ။ နောက်ထပ်သူ့ဆီက အကောင်းဆုံးတွေကို မျှော်လင့်နိုင်ပါသေးတယ်။ သူက ရန်ကုန်အသင်းအနာဂတ်အတွက် အားထားရမယ့်ကစားသမားဖြစ်လာမှာပါ။”ဟု မာယန်ကဆိုသည်။
ရန်ကုန်ယူနိုက်တက်အသင်းတွင် အဓိကနောက်ခံလူများဖြစ်သော ဇော်မင်းထွန်း၊ ယာမာရှီတို တို့ဒဏ်ရာပြဿနာ ရှိနေသည့်အတွက် ဟောင်ကောင်ကလပ် တောင်တရုတ်နှင့်ကစားမည့်ပွဲတွင် သိန်းဇော်နှင့် သီဟထက်အောင်တို့ကို ပွဲထုတ်အသုံးပြုဖွယ်ရှိနေသည်။
