ပါကစ္စတန်အစိုးရက ရူပီး ၈၆ ဘီလီယံကျော်ကို ချက်ချင်းပေးချေရန် တရုတ်ကုမ္ပဏီတစ်ခုက တောင်းဆို လိုက်သည်။

ရက် ၃၀ အတွင်း ငွေပေးချေရမည့် အာမခံချက်နှင့်အညီ ပါကစ္စတန် Central Power Purchasing Agency Guarantee (CPPA-G) သို့ China Huaneng က မကြွေးမဆပ်သေးသည့်ကိစ္စအပေါ် အသိပေးစာပေးပို့ခဲ့ကြောင်း Business Recorder က သတင်းဖော်ပြခဲ့သည်။

အဆိုပါ ငွေတောင်းခံစာကို ၂၀၂၂ခုနှစ်၊ ဇူလိုင်လ ၁၅ရက်နေ့စွဲဖြင့် ရေးသားပေးပို့ခဲ့ခြင်း ဖြစ်သည်။

တရုတ်ကုမ္ပဏီ၏ ဒုတိယဥက္ကဋ္ဌ ဖန်ကျင်းဒါက PPIB ၏ မန်နေးဂျင်းဒါရိုက်တာသို့ ပေးပို့သောစာတွင် ၂၀၁၇ ခုနှစ်၊ ဇန်နဝါရီ ၂၃ ရက်က Huaneng Shandong Ruyi (Pakistan) Energy (private) Limited (HRS) နှင့် Private Power & Infrastructure Board (PPIB) အကြား ချုပ်ဆိုထားသော အာမခံချက်၏ အပိုင်း ၁.၅.၁ အရ CPPA-G က ရူပီး ၈၆ ဘီလီယံကျော် ပေးချေခြင်းမရှိသည့်ကိစ္စနှင့် ပတ်သက်၍ ပါကစ္စတန်အစိုးရအား PPIB မှတဆင့် အကြောင်းကြားခဲ့သည်ဟု သတင်းတွင် ဖော်ပြထားသည်။

ပေးစာတင်သွင်းပြီး ရက်ပေါင်း ၃၀ အတွင်း ရက်လွန်ငွေပမာဏကို အကျေမပေးချေပါက အာမခံချက် အရ ပါကစ္စတန်အစိုးရထံမှ ယင်းငွေများကို တောင်းဆိုရန်မှတပါး အခြားရွေးချယ်စရာမရှိတော့ကြောင်း ကုမ္ပဏီက CPPA-G ကို သတိပေးထားသည်။

HRS ၏ အဆိုအရ ၂၀၂၂ခုနှစ် ဇူလိုင် ၁၄ ရက်အထိ စွမ်းအင်ပေးချေမှုနှင့် စွမ်းရည်ငွေပေးချေမှုများအတွက် ရက်လွန်ငွေတောင်းခံလွှာ စုစုပေါင်းပမာဏမှာ ရူပီး ၇၀,၈၈၉,၆၉၀,၄၉၉ ဖြစ်ပြီး နှောင့်နှေးကြန့်ကြာသွား သောငွေပေးချေမှုကြောင့် အတိုးနှုန်း ထပ်တိုးသည့်ငွေပမာဏမှာ ရူပီး ၁၅,၃၈၇,၅၄၅,၇၀၉ ဖြစ်သည်။ ထို့ကြောင့် စုစုပေါင်း ရက်လွန်ကြေးပေးသွင်းရငွေပမာဏသည် ရူပီး ၈၆,၂၇၇,၂၃၆,၂၀၈ ဖြစ်သည် ဟု Business Recorder က ဖော်ပြခဲ့သည်။

'ရက်လွန်ငွေပမာဏ ရူပီး ၈၆,၂၇၇,၂၃၆,၂၀၈ ကို အရေးပေါ်အခြေအနေဖြင့် ဖြေရှင်းပေးရမည်' ဟု HRS ၏ ဒုတိယဥက္ကဋ္ဌက ပြောကြားခဲ့သည့်အပြင် ကျောက်မီးသွေးမလုံလောက်မှုကြောင့် စက်ရုံပိတ်လိုက်ရခြင်း၏ နောက်ဆက်တွဲအကျိုးဆက်များ/ ပျက်စီး ဆုံးရှုံးမှုများကို CPPA-G မှ ပေးဆောင်ရမည်ဟုလည်း ဖော်ပြထားသည်။

ကုမ္ပဏီသည် ယင်းစာကို အစ္စလာမာဘတ်မြို့ရှိ တရုတ်သံရုံး၊ CEPC အာဏာပိုင်အဖွဲ့ဥက္ကဋ္ဌနှင့် သက်ဆိုင်ရာ ဝန်ကြီးဌာနများမှ အကြီးတန်းအရာရှိများကိုလည်း ပေးပို့ထားသည်။