မေ ၂၀
ရန်ကုန်မြို့၊ ၈ မိုင်လမ်းဆုံ ရန်ကုန်တိုင်းစစ်ဋ္ဌာနချုပ် ဝင်ပေါက်ကင်းအနီး ယနေ့ မေ ၂၀ ရက်နံနက်က ပေါက်ကွဲမှုတစ်ခုဖြစ်ပြီး သေနတ်သံကြားရကြောင်း ဒေသခံများက မဇ္ဈိမကိုပြောသည်။
နံနက် ၈ နာရီခွဲ ဝန်းကျင်အချိန်ခန့်တွင် ပေါက်ကွဲမှုနှင့်ပစ်ခတ်မှုသည် စစ်ကောင်စီတပ်လုံခြုံရေးများတင်းကြပ်လေ့ရှိသည့် ဇေယျာသီရိစစ်ရုံးဝင်ပေါက်အနီး ဖြစ်ပွားခဲ့ခြင်းဖြစ်သည်။
“ ပစ်ခတ်သံတွေတော့ ကြားလိုက်တယ်။ ပေါက်ကွဲသံ တစ်သံလည်းကြားတယ်။ အဲ့လိုအသံကြားပြီးနောက်ပိုင်း ကားတွေ ပြည်လမ်းတစ်လျှောက် ပိတ်တော့တာပဲ။ တိုင်းစစ်ဋ္ဌာနချုပ် အပေါက်ဝ ဘယ်ဘက်နဲ့ ညာဘက်အခြမ်းတွေမှာ ကင်းတွေရှိတယ်လေ။ အဲ့ဒီမှာ ဖြစ်တာ။ မိုးကလည်းရွာနေတော့ အလစ်ကို ဝင်တွယ်တာလည်းဖြစ်နိုင်တယ်။” ဟု ဆိုသည်။
လက်ရှိတွင် ၇ မိုင်ခွဲ နှင့် ၈မိုင်လမ်းဆုံအကြားတွင် လုံခြုံရေးများ ချထားသည်ကိုတွေ့ရှိရပြီး၊ ယာဉ်တန်းများပိတ်ဆို့မှုဖြစ်ပေါ်နေကြောင်း၊ ၈ မိုင် တံတားပေါ်တွင်လည်း လုံခြုံရေးများချထားသည်ကို တွေ့ရကြောင်း ယင်းအနီး မောင်းနှင်ခဲ့သည် တက္ကစီယာဉ်မောင်တစ်ဦးက ဆိုသည်။
“ တံတားကိုတော့ ပိတ်ထားတယ်ကြားတယ်။ လုံခြုံရေးမှာ အမည်းဝတ်စုံတွေနဲ့ ကျွန်တော့်အထင် SWAT တွေလို့တော့ ထင်တာပဲံဗျ။ အခုထိရှိနေတယ်။ ကင်းတွေစောင့်နေတာက လွဲလို့ ကျန်တာက ပုံမှန်အတိုင်း ပါဘဲ။ အချို့ယာဉ်တွေကို စစ်ဆေးခံနေရတာတွေ့တယ်” ဟု သူမြင်တွေ့ခဲ့ပုံကို ရှင်းပြသည်။
ပုံမှန်အားဖြင့်လည်း လမ်းဆုံဂုံးကျော်တံတားအောက်ဘက်တွင် သဲအိတ်ဘန်ကာများဖြင့် စစ်ကောင်စီတပ်ကတပ်စွဲလေ့ရှိသည်။
အဆိုပါနေရာတွင် ယမန်နေ့ညနေကတည်းက လုံခြုံရေးစစ်ဆေးမှုများ စစ်ကောင်စီတပ်က လုပ်ဆောင်ခဲ့သေးသည်။
Archive ဓာတ်ပုံ
