စစ်ကိုင်းတိုင်း၊ ကနီမြို့ တောင်ဘက် ၁၂ မိုင်ခန့်အကွာရှိ သင့်ဝင်ကျေးရွာအနီးတွင် မေလ ၁၅ ရက်နေ့ နံနက် ၁၀ နာရီခန့်က စစ်ကောင်စီတပ်နှင့် ပြည်သူ့ကာကွယ်ရေးတပ်များ တိုက်ပွဲဖြစ်ပွားခဲ့ကြောင်း သိရ သည်။
အဆိုပါတိုက်ပွဲတွင် စစ်ကောင်စီတပ်သား ၁ဝ ဦးခန့်သေဆုံးပြီး ပြည်သူ့ကာကွယ်ရေးတပ်များ အထိ အခိုက်မရှိ ဆုတ်ခွာနိုင်ခဲ့ကြောင်း KLG PDF ရဲဘော်က မဇ္ဈိမကို ပြောသည်။
“ နံနက် ၁ဝ နာရီ လောက်မှာ ချောင်းမကျေးရွာကနေ သင့်ဝင်ကျေးရွာဘက်ကို စစ်ကောင်စီစစ်ကြောင်း စထွက်လာပါတယ်၊ ချောင်းမကျေးရွာအထွက်မှာ တစ်ကြိမ် လက်နက်ကြီးတွေနဲ့ ပစ်ခတ်တိုက်ခိုက်ခဲ့ ပါတယ်။ နေ့လည် ၂ နာရီလောက်မှာ စစ်ကောင်စီတပ်သားတွေ၊ ဗိုလ်တွေနေထိုင်တဲ့နေရာကို အတိတကျ သတင်းရတာနဲ့ လက်နက်ကြီးငယ်တွေနဲ့ အချီကြီး ဝင်ရောက်တိုက်ခိုက်ခဲ့တယ်ဗျ။ စစ်ကောင်စီတပ်သား ၁ဝ ဦး အထက်မှာ အသေဆုံး ရှိပါမယ်” ဟု KLG PDF ရဲဘော်က ဆိုသည်။
ယင်းတိုက်ပွဲကို ကျောက်လုံးကြီးပြည်သူ့ကာကွယ်ရေးတပ် (KLG PDF )၊ မြန်မာ့တော်ဝင်နဂါးတပ်တော် (MRDA)၊ MPDF ၊ Dragon Brothers Task Force ၊ ကနီမြို့နယ် ပကဖ ၊ ချင်းတွင်းတော်လှန်ရေးတပ်နှင့် ကနီ-ယင်းမာပင် မဟာမိတ်များအဖွဲ့တို့ ပူးပေါင်း တိုက်ခိုက်ခဲ့ကြောင်း သိရသည်။
လက်ရှိတွင် စစ်ကောင်စီတပ်များက နယ်မြေရှင်းလင်းရေးဟုဆိုကာ စစ်ကြောင်းထိုးမှုများကြောင့် ကနီ မြို့နယ် ချောင်းမ၊ သင့်ဝင်၊ သမင်ခြံ၊ အောင်မင်္ဂလာ စသည့်ကျေးရွာများနေ ပြည်သူများဘေးလွတ်ရာသို့ တိမ်းရှောင်နေရကြောင်း သိရသည်။
