ရှမ်းပြည်နယ်တောင်ပိုင်း ဖယ်ခုံမြို့နယ်နှင့် ညောင်ရွှေမြို့နယ်အစပ်တွင် ထိုးစစ်ဆင်လာသောစစ်ကောင်စီ တပ်နှင့် ပြည်သူ့ကာကွယ်ရေးပူးပေါင်းတပ်တို့ တိုက်ပွဲများပြင်းထန်ခဲ့ကြောင်း သိရသည်။
မေလ ၁၃ ရက်နေ့က ထီရိကင်းစခန်းတိုက်ခိုက်ခံရပြီးနောက် စစ်ကြောင်းထိုးလာသော စစ်ကောင်စီတပ် စစ်ကြောင်းကို PEKHON PDF တပ်ရင်း ၂ ၊ SSRY ၊ အင်းလေး PDF ၊ အလယ်ပိုင်းတိုင်းအထူးစစ်ဆင်ရေးအဖွဲ့၊ လွိုင်ကော် local PDF တပ်ရင်း ၁၀၀၅ ၊ KNDF နှင့်ဒေသခံကာကွယ်ရေးအဖွဲများပူးပေါင်းကာ တိုက်ခိုက်နေခြင်းဖြစ်ပြီး မေလ ၁၅ ရက်နေ့ နံနက် ၈ နာရီခန့်မှ ည ၇ နာရီအထိ ထိတွေ့တိုက်ပွဲများ ပြင်းထန်ခဲ့ကြောင်း ဖယ်ခုံ PDF တပ်ရင်း ၂ က ထုတ်ပြန်ထားသည်။
၎င်းတိုက်ပွဲအတွင်း စစ်ကောင်စီတပ်ဖွဲ့များအထိနာပြီး ဖယ်ခုံ စကခ-၇ မှလက်နက်ကြီးပစ်ကူအပါအဝင် ဂျက်လေယာဉ်နှစ်စီးဖြင့် ဗုံးကျဲတိုက်ခိုက်ခြင်းနှင့် ရဟတ်ယာဉ်ဖြင့်ပါ လာရောက်တိုက်ခိုက်ခဲ့ကြောင်း ထုတ်ပြန်ထားသည်။
ပြည်သူ့ကာကွယ်ရေးပူးပေါင်တပ်ဖွဲ့အနေဖြင့် ထိုးစစ်ဆင်လာသည့် စစ်ကောင်စီတပ်ကို ခုခံတိုက်ခိုက်ရင်း SSRY တပ်မှ CDM ရဲဝန်ထမ်း ရဲဘော်ချစ်ကောင်း တိုင်းပြည်အတွက် အသက်ပေးလှူသွားခဲ့ရပြီး တစ်ဦး ဒဏ်ရာရရှိခဲ့ကာ စစ်ကောင်စီဖက်မှ သေဆုံးမှုကို အတည်မပြုနိုင်သေးကြောင်း ဆိုသည်။
