မတ်လ ၄ ရက်
စစ်ကောင်စီက လေကြောင်းတိုက်ခိုက်မှုများ ပြုလုပ်နေသည့် စစ်ကိုင်းတိုင်းဒေသကြီးအတွင်း ယမန်နေ့ညပိုင်းလောက်ကစ၍ မိုလ်ဘိုင်းအင်တာနက်လိုင်းများ ပြတ်တောက်လျက်ရှိသည်။
မြို့နယ်ပေါင်း ၃၇ မြို့နယ်ရှိသည့် စစ်ကိုင်းတိုင်းတွင်မြို့ နယ် ၂၃မြို့နယ်တွင်စစ်ကောင်စီက အင်တာနက်ဖြတ်တောက်မည်ဖြစ်ကြောင်းလူမှုကွန်ရက်တွင်ပျံံ့နှံ့ခဲ့ပြီးနောက် အင်တာနက်ပြတ်တောက်မှုပေါ်ထွက်လာခဲ့သော်လည်း စစ်ကောင်စီဘက်က ယင်းကိစ္စနှင့် ပတ်သတ်၍ ထုတ်ပြန်ကြေညာခြင်းမပြုဘဲထားသည်။
စစ်ကိုင်းတိုင်း၊ ကျွန်းလှမြို့နယ် အေးချမ်းသာရွာမှ ဒေသခံတစ်ဦးက" အရင်နေ့တွေက သုံးလို့ရတယ်။ မနေ့က ည ၁၀နာရီထိုးပြီးကတည်းက လိုင်းတွေဖြတ်သွားတာ အခုအချိန်ထိမရသေးဘူး"ဟုပြောသည်။
၎င်းတို့ရွာတွင် MPTအသုံးများပြီး လက်ရှိတွင် MPTအပြင် အခြားဆင်းကတ်များမှာလည်း အင်တာနက်လိုင်းများ အသုံးပြု၍မရဟု သိရကြောင်း အဆိုပါ ဒေသခံကပြောသည်။
အင်တာနက်ဖြတ်တောက်မည်ဟု သတင်းထွက်ပေါ်သောမြို့နယ်များမှာ ချောင်းဦး၊ ဆားလင်းကြီး၊ မြောင်၊ ခင်ဦး၊ ဒီပဲယင်း၊ ဝက်လက်၊ ရေဦး၊မြင်းမူ၊ ဗန်းမောက်၊ ကသာ၊ ထီးချိုင့်၊ ကန့်ဘလူ၊ တန့်ဆည်၊ မင်းကင်း၊ ကလေးဝ၊ တမူး၊ မော်လိုက်၊ အင်းတော်၊ ဟုမ္မလင်း၊ ကျွန်းလှ၊ ဖောင်းပြင်၊ ခန္တီးနှင့် လဟယ်တို့ဖြစ်သည်။
ဒေသခံကာကွယ်ရေးတပ်များနှင့် စစ်ကောင်စီလက်အောက်ခံတပ်များ တိုက်ပွဲဖြစ်ပွားသည့်ဒေသများတွင် စစ်ကောင်စီက လေကြောင်းဖြင့် တိုက်ခိုက်ခြင်း၊ ကျေးရွာများကို မီးရှို့ခြင်း၊ ဒေသခံများကို ဖမ်းဆီးသတ်ဖြတ်ခြင်းနှင့် အင်တာနက်ဖြတ်တောက်ခြင်းများပြုလုပ်လျက်ရှိသည်။
ပြီးခဲ့သည့် ၂၀၂၁ခုနှစ် သြဂုတ်လ ၂၀ရက်နေ့မှ နိုဝင်ဘာလ ၃ရက်နေ့အထိ စစ်ကောင်စီက စစ်ကိုင်းတိုင်းတွင် မြို့နယ် ၁၃မြို့နယ်၊ ချင်းပြည်နယ်တွင် ကိုးမြို့နယ်၊ မကွေးတိုင်းတွင် လေးမြို့နယ်၊ မန္တလေးတိုင်းနှင့် ကချင်ပြည်နယ်တို့တွင် နှစ်မြို့နယ်စီ အင်တာနက်ဖြတ်တောက်ခဲ့ကြောင်း အသံအဖွဲ့က ပြီးခဲ့သည့် ဒီဇင်ဘာလတုန်းက ထုတ်ပြန်ခဲ့သည်။
ထို့အပြင် စစ်တပ်ကအာဏာသိမ်းပြီးနောက်ပိုင်း စစ်ကိုင်းတိုင်းတွင် ဒီပဲယင်း၊ ကျွန်းလှအပါအဝင် မြို့နယ် ၁၇ မြို့နယ်ကို စစ်ကောင်စီက လေကြောင်းတိုက်ခိုက်မှုများပြုလုပ်ခဲ့ကြောင်း အမျိုးသားညီညွတ်ရေးအစိုးရ (NUG) လူ့အခွင့်အရေးဆိုင်ရာဝန်ကြီးဌာနက ဇန်နဝါရီလကုန်ပိုင်းက ထုတ်ပြန်ထားသည်။