ဩဂုတ် ၂၉
မဇ္ဈိမ။ ။ စစ်ကိုင်းတိုင်း၊ ကနီမြို့နယ်၊ ဇီးပင်တွင်းကျေးရွာကို စစ်ကောင်စီတပ်က သြဂုတ်လ ၂၅ရက် ညနေ ၃နာရီ အချိန်ခန့်တွင် မီးတင်ရှို့ခဲ့ကြောင်း ဒေသခံထံမှ သိရသည်။
အဆိုပါမီးရှို့ဖျက်ဆီးမှုတွင် အိမ်ခြေ ၉၀၀ ခန့်ရှိသည့် ဇီးပင်တွင်းကျေးရွာမှ လူနေအိမ် ၄၉လုံး မီးလောင်ပြာကျသွားကြောင်း ဒေသခံပြည်သူတစ်ဦးက ဆိုသည်။
" စုစုပေါင်း မီးလောင်ခဲ့တဲ့ အိမ်အရေအတွက် က ၄၉ လုံး ရှိပါတယ်၊ လေးလုံးကတော့ အိမ်အတွင်း ပစ္စည်းတွေ လောင်သွားပြီး မီးဖိုချောင် လောက်ပဲ လောင်သွားတယ်၊ ကျန်တဲ့ ၄၅လုံးကတော့ ရစရာ မရှိဘူးဗျ၊ အိမ်မွေးတိရစ္ဆာန် ဖြစ်တဲ့ ဝက် နှစ်ကောင် သတ်သွားတယ် ၊ အိမ်တွေ မွှေနှောက် သွားတာတော့ ရစရာမရှိဘူး ၊ အဝတ်အစားတွေ စောင်တွေ စုပြီး မီးရှို့ထားတာတော့ အိမ်တိုင်းနီးပါးလိုပဲ”ဟု လုံခြုံရေးအရ အမည်မဖော်လိုသည့်ဒေသခံ ပြည်သူတစ်ဦးက မဇ္ဈိမကို ပြောသည်။
စစ်ကောင်စီတပ်အင်အား ၁၃၀ ခန့်သည် ကနီမြို့နယ် သရက်ပင်ကျေးရွာတွင် တပ်စွဲထားခြင်းကြောင့် ကျေးရွာခုနစ်ရွာမှ လူဦးရေ ထောင်နှင့်ချီ၍ စစ်ရှောင်နေရကြောင်း သိရသည်။
စာတည်း။ ။ ဖူးသိမ်ကျ
စာမူတည်းဖြတ်။ ။ သန့်ဇော်(သန်လျင်)