ရန်ကုန်၊ အောက်တိုဘာလ ၃ ။ ။ ရန်ကုန်တိုင်းဒေသကြီး၊ လှိုင်မြို့နယ်၊ (၁၅) ရပ်ကွက်၊ ပါရမီလမ်းရှိ မီးရထားသံလမ်းအကျော်တွင် ခရီးသည် အမျိုးသမီးထံမှ ရွှေဆွဲသီးပါ ဆွဲကြိုးတစ်ကုံး လုယက်ထွက်ပြေးခဲ့သူ တက္ကစီယာဉ်မောင်းအား ဖမ်းဆီးရမိပြီ ဖြစ်ကြောင်း ရန်ကုန်တိုင်းရဲတပ်ဖွဲ့မှ ထုတ်ပြန်သည်။
ခရီးသည် အမျိုးသမီးထံမှ ရွှေဆွဲကြိုးအား လုယက်ထွက်ပြေးသွားသူမှာ သန်လျင်မြို့နယ်နေ အသက် ၃၆ နှစ်အရွယ် အောင်ကျော်ထွန်းဆိုသူဖြစ်ပြီး ၎င်းအား ရဲတပ်ဖွဲ့မှ အောက်တိုဘာလ၂ ရက်၊ နေ့လည် ၂ နာရီ အချိန်တွင် သက်သေခံပစ္စည်းနှင့်အတူ ဖမ်းဆီးရမိခဲ့ခြင်းဖြစ်သည်။
လုယက်ခံရသူ အမျိုးသမီးထွက်ဆိုချက်အရ အောက်တိုဘာလ ၁ ရက်၊ နံနက် ၃ နာရီခွဲကျော်အချိန်တွင် အဆိုပါယဉ်မောင်းက လှိုင်မြို့နယ်၊ (၁၅) ရပ်ကွက်၊ ပါရမီလမ်းရှိ မီးရထားသံလမ်းကျော် အရောက်တွင် ကားကိုလမ်းဘေးထိုးရပ်ပြီး နောက်ခန်းသို့ကူးကာ ရွှေဆွဲကြိုးကို လုယက်ဖြုတ်ယူခဲ့ခြင်းဖြစ်ကြောင်းသိရသည်။
ထို့နောက် ခရီးသည်အမျိုးသမီးကို တက္ကစီယာဉ်ပေါ်မှဆွဲချကာ မောင်းနှင်ထွက်ပြေးသွားခဲ့ခြင်း ဖြစ်သည်။
သက်သေခံပစ္စည်းနှင့်အတူ ဖမ်းဆီးရမိခဲ့သည့် အောင်ကျော်ထွန်းဆိုသူအား ပိတောက်ချောင်း နယ်မြေရဲစခန်းတွင် (ပ) ၅၇၃/ ၂ဝ၁၇၊ ရာဇသတ်ကြီး ပုဒ်မ ၃၈၂ ဖြင့် အမှုဖွင့်ထားသည်။