ရန်ကုန်၊ မေလ ၇ ။ ။ တရားမဝင်သယ်ဆောင်လာသော ပစ္စည်းများကို နေ့စဉ်ဖမ်းဆီးနေသည့် မန္တလေး-မူဆယ် ပြည်ထောင်စုလမ်းမကြီးရှိ ရေပူအမြဲတမ်းစစ်ဆေးရေးစခန်းအား ပစ်ခတ်မည်ဟု ခြိမ်းခြောက်မှုများရှိနေကြောင်း ယင်းစခန်းမှ တာဝန်ရှိသူက မဇ္ဈိမသို့ပြောသည်။
အဆိုပါ ရေပူစခန်းမှ ဧပြီလ ၂၈ ရက်က ၁၂ ဘီးကား ၅ စီးဖြင့် အရည်အသွေးမြင့်သစ်များ ဖမ်းဆီးရမိခဲ့သည့် အချိန်မှစ၍ ဖုန်းဖြင့်လည်းကောင်း၊ ရေပူစခန်း တရားဝင် လူမှုကွန်ယက်စာမျက်နှာတွင် လည်းကောင်း မကြာခဏ စခန်းအား ပစ်ခတ်မည်ဟု ခြိမ်းခြောက်နေခြင်းဖြစ်ကြောင်း ရေပူအမြဲတမ်းစစ်ဆေးရေးစခန်း ပူးပေါင်းစစ်ဆေးရေးအဖွဲ့ တာဝန်ခံ၊ အကောက်ခွန်ဦးစီးဌာနရုံးချုပ် ဒုတိယညွှန်ကြားရေးမှူး ဦးတက်ထွန်းအောင်က ပြောသည်။
"ခြိမ်းခြောက်နေတဲ့သူတွေက ကိုယ်တို့ဖမ်းဆီးရမိတာတွေနဲ့ ပတ်သက်နေသူတွေ ဖြစ်မှာပေါ့။ အဲ့ဒါတွေက သာမာန်ပါ။ ကိုယ်တို့ဆီမှာ လုံခြုံရေးပိုင်းက တပ်တွေလည်းရှိတယ်။ ပိန်းဆာပြည်သူစစ်တွေနဲ့ ရဲတွေလည်းရှိပါတယ်။ စိုးရိမ်စရာမရှိပါဘူး" ဟု ဦးတက်ထွန်းအောင်က လုံခြုံရေးပိုင်းနှင့်ပတ်သက်ပြီး ရှင်းပြသည်။
မန္တလေး-မူဆယ် ပြည်ထောင်စုလမ်းမကြီးရှိ ရေပူအမြဲတမ်းစစ်ဆေးရေးစခန်းဂိတ်မှ နေ့စဉ် ကုန်တင်ကားပေါင်း ၅ဝဝဝမှ ၆ဝဝဝထိ ဖြတ်သန်းသွားလာနေပြီး အဆိုပါ ကားများမှ တရားမဝင် သယ်ဆောင်လာသည့် မူးယစ်ဆေးဝါးများ၊ မှောင်ခိုကျောက်စိမ်းများနှင့် သစ်များ၊ အရည်အသွေးမမှီသည့် စားသောက်ကုန်များ၊ အခွန်မဲ့စားသောက်ကုန်စည်များနှင့် အသုံးအဆောင်ပစ္စည်းများကို ရေပူအမြဲတမ်းစစ်ဆေးရေးစခန်း ပူးပေါင်းစစ်ဆေးရေးအဖွဲ့ ၁၂ ဖွဲ့မှ ဇန်နဝါလ ၁၆ ရက်မှ စတင်ကာ စစ်ဆေးဖမ်းဆီးနေခြင်းဖြစ်သည်။