မြန်မာ့အရေး ၃ နှစ်တာကာလအတွင်းရောက်လာချိန် တရုတ်ရဲ့ဝင်ရောက်စွက်ဖက်မှုတွေလည်း သိသိသာသာ တွေ့လာရပါတယ်။ ၂၀၂၂ ဒီဇင်ဘာလကုန်ပိုင်းလောက်မှာ တရုတ်အစိုးရဟာ အာရှရေးရာ အထူးသံတမန်သစ် အဖြစ် မစ္စတာ တိန့်ရှီကျွန်း ကိုခန့်အပ်ပြီး မြန်မာ့အရေးကို ထဲထဲဝင်ဝင် ဝင်ရောက်ဖြေရှင်းလာခဲ့တာတွေ့နေရ ပါတယ်။
တရုတ်အစိုးရရဲ့ တရားဝင်ခေါ်ဆိုမှုအရ “အာရှရေးရာ အထူးသံတမန်” လို့ဆိုပေမယ့် တကယ်တမ်းမှာ အဲဒီအထူးသံတမန်ဟာ မြန်မာ့အရေးကိုသာ အလေးထားကိုင်တွယ်ရတဲ့ အထူးသံတမန်တစ်ဦးသာဖြစ်ပါတယ်။
ဒါကြောင့်လည်း အဲဒီတရုတ်သံတမန်ကို မြန်မာနိုင်ငံဆိုင်ရာ အထူးသံတမန်၊ တရုတ်နိုင်ငံခြားရေးဝန်ကြီးဌာနရဲ့ အထူးသံတမန်ဆိုပြီး ခေါ်ဝေါ်သုံးနှုန်းလာကြတာတွေ့ရပါတယ်။
တကယ်တော့ တရုတ်အစိုးရဟာ ၂၀၁၁ ခုနှစ် ကတည်းက မြန်မာ့အရေးနဲ့ပတ်သက်ပြီး စောင့်ကြည့်ပါဝင်ပတ်သက်ဖို့ သံတမန်တစ်ဦးကို စတင်ခန့်အပ်ခဲ့တာပါ။
အဲဒီအချိန်က တရုတ်သံတမန်ရဲ့ အခန်းကဏ္ဍတွေ ထူးထူးခြားခြားမရှိခဲ့တာမို့ လူသိပ်မသိခဲ့တာဖြစ်ပါတယ်။
၂၀၁၅ ခုနှစ်မှာ ဝါရင့်သံတမန်တစ်ဦးဖြစ်တဲ့ မစ္စတာ ဆွန်ကော့ရှန် အာရှရေးရာ အထူးသံတမန် ဖြစ်လာချိန်မှသာ တရုတ် သံတမန်ရဲ့လှုပ်ရှားမှုတွေကို ထင်ထင်ရှားရှား တွေ့လာရတာဖြစ်ပါတယ်။
မစ္စတာ ဆွန်ကော့ရှန်ဟာ နိုင်ငံတချို့မှာ သံအမတ်ကြီးအဖြစ် တာဝန်ထမ်းဆောင်ခဲ့ဖူးတဲ့ ဝါရင့်သံတမန်ဖြစ်တာနဲ့အညီ မြန်မာနိုင်ငံရဲ့ ငြိမ်းချမ်းရေးလမ်း ကြောင်းမှာ အဓိကအခန်းကဏ္ဍကနေ ပါဝင်ခဲ့တာကြောင့်လည်းဖြစ်ပါတယ်။