ပင်လယ်ရေအောက် အင်တာနက် ကေဘယ်လ်ဆက်ကြောင်း ချို့ယွင်းမှုကြောင့် ပါကစ္စတန်တွင် အင်တာနက်မြန်နှုန်းများ ကျင်းဆင်းနေခြင်းကို ပြင်ဆင်မည်ဟု ပါကစ္စတန် ဆက်သွယ်ရေးအာဏာပိုင်အဖွဲ့(PTCL) က ကတိပြုထားသော်လည်း အဆင်ပြေခြင်း မရှိသေးပေ။

PTCL က စီမံခန့်ခွဲနေသည့် နိုင်ငံတကာ ပင်လယ်ရေအောက် ကေဘယ်လ်ဆက်ကြောင်း SMW4 တွင် ချို့ယွင်းမှု ဖြစ်ပေါ်နေသဖြင့် အင်တာနက် အသုံးပြုမှုအများဆုံး အချိန်များအတွင်း မြန်နှုန်းကျဆင်းခြင်းကို ကြုံတွေ့ရနိုင်ကြောင်း News International က ဖော်ပြသည်။

ပါကစ္စတန်၌ အင်တာနက်မြန်နှုန်းများအပေါ် ထိခိုက်စေခဲ့သည့် ကေဘယ်လ်ဆက်ကြောင်း ချို့ယွင်းမှုတစ်ခုကို ယမန်နှစ် ဒီဇင်ဘာလက ထုတ်ပြန်ခဲ့ခြင်းဖြစ်ပြီး ယင်းနောက် PTCL သည် အင်တာနက်ကို အခြားသော ကေဘယ်လ်များနှင့် စတင် ပြောင်းလဲချိတ်ဆက်ထားခဲ့သည်။

ထို့ပြင် လိုင်းအားပိုမိုကောင်းမွန်စေရန် အခြားသော ဆက်ကြောင်းများကို စီစဉ်လုပ်ဆောင်ထားကြောင်း PTCL ၏ ထုတ်ပြန်ချက်တစ်ရပ်တွင် ပြောသည်။

"လာမယ့် ရက်အနည်းငယ်အတွင်း အင်တာနက်လိုင်းတွေကို ချဲ့ထွင်သွားမှာဖြစ်ပါတယ်" ဟု ထုတ်ပြန်ချက်တွင် ဖော်ပြသည်။

ယခုကာလတွင် အင်တာနက်မြန်နှုန်းများအပေါ် အနည်းငယ် သက်ရောက်ထိခိုက်မှု ရှိလိမ့်မည်ဟု ထုတ်ပြန်ချက်တွင် ပါရှိသည်။

ပါကစ္စတန်သည် အရှေ့တောင်အာရှ-အရှေ့အလယ်ပိုင်း-အနောက်ဥရောပ ၄ (SEA-ME-WE 4) ဆက်ကြောင်းနှင့် ချိတ်ဆက်ထားသည်။ အဆိုပါ ဖိုင်ဘာ ရေအောက် ဆက်သွယ်ရေး ကေဘယ်လ် ဆက်ကြောင်းသည် စင်ကာပူ၊ မလေးရှား၊ ထိုင်း၊ ဘင်္ဂလားဒေ့ရှ်၊ အိန္ဒိယ၊ သီရိလင်္ကာ၊ ပါကစ္စတန်၊ ယူအေအီး၊ ဆော်ဒီအာရေးဗျ၊ ဆူဒန်၊ အီဂျစ်၊ အီတလီ၊ တူနီးရှား၊ အယ်လ်ဂျီးရီးယားနှင့် ပြင်သစ်တို့အကြား ဆက်သွယ်ချိတ်ဆက်သည့် ကေဘယ်လ်စနစ် ဖြစ်သည်။