ဒီဇင်ဘာ ၂၄
နိုင်ငံရေးအတွက် ဘာသာရေးကို ခုတုံးလုပ်ကာ သံဃာအတုများဖန်တီးပြီး သင်္ကန်းဝတ်များဖြင့် အကြမ်းဖက် လုပ်ဆောင်နေသည့် အဖွဲ့အစည်း၊ လူပုဂ္ဂိုလ်များကို တားမြစ်ပေးရန် နိုင်ငံတော် သံဃမဟာနာယကအဖွဲ့ထံ သံဃသမဂ္ဂ (မန္တလေး)က စာပေးပို့လျှောက်ထားကြောင်း သိရသည်။
“ဘုန်းကြီး အတုယောင်များ ဖန်တီးကာ သင်္ကန်းများကို အသုံးချလျက် အကြမ်းဖက်မှု လုပ်ဆောင်နေခြင်းများနှင့် သာသနိကအဆောက်အအုံများအတွင်း တပ်စွဲနေထိုင်ခြင်းများကို တားမြစ်ပေးတော်မူကြပါ ” ဟု သံဃသမဂ္ဂ (မန္တလေး)က သတင်းထုတ်ပြန်ကြေညာချက်တွင် ရေးသားထားသည်။
ဂန့်ဂေါ ၊ ယော ၊ ကလေးမြို့နယ် နှင့် အရာတော်မြို့နယ်ရှိ ဒေသပြည်သူ့ကာကွယ်ရေးတပ်ဖွဲ့ များ၏ သတင်းထုတ်ပြန်ချက်အရ အကြမ်းဖက်စစ်ကောင်စီတပ်မှာ ဘုန်းကြီးအတုအယောင်များ ဖန်တီးကာ သင်္ကန်းဝတ်များဖြင့် အကြမ်းဖက်မှုများ လုပ်ဆောင်နေလျက်ရှိနေကြောင်းကို သံဃသမဂ္ဂ(မန္တလေး)က ဒီဇင်ဘာလ ၂၄ ရက် ရက်စွဲဖြင့် ထုတ်ပြန်ချက်တွင် ဖော်ပြထားသည်။
အကြမ်းဖက်စစ်ကောင်စီတပ်များက ဒေသအသီးသီးရှိ သာသနိက အဆောက်အအုံများ ၊ ဘုန်းကြီးကျောင်းတိုက်များ၊ ဓမ္မာရုံများ စေတီပရိဝုဏ်များ ၊သာသနာ့ဗိမာန်များ၊ သာသနာ့နယ်မြေများအတွင်း တပ်စွဲနေထိုင်စားသောက်လျက် အကြမ်းဖက်မှုများ ကျုးလွန်နေကြသည်ကို တားမြစ်ပေးရန် နိုင်ငံတော် သံဃမဟာနာယကအဖွဲ့ထံ ပေးပို့သည့်စာတွင် ရေးသားထားသည်။
ဘုန်းကြီးအတုများဖန်တီးကာ သင်္ကန်းဝတ် များဖြင့် အကြမ်းဖက်လုပ်ဆောင်နေခြင်းများအား မည်သည့်အဖွဲ့အစည်း ၊ မည်သည့်ပုဂ္ဂိုလ်က ကျူးလွန်သည်ဖြစ်ပါစေ သာသနာအရေး မျှော်တွေးတော်မူကြလျက် လျှင်လျှင်မြန်မြန် တားမြစ်ပေးတော်မူကြပါ ဟု သံဃသမဂ္ဂ ( မန္တလေး )က ပြောသည်။
