ဒီဇင်ဘာလ ၁၈ ရက်
ချင်းပြည်နယ် မင်းတပ်မြို့နယ်အတွင်းရှိ ဝမ္မသူးကျေးရွာဘက်ခြမ်းကို စစ်ကောင်စီတပ်များကဆက်လက်စစ်ကြောင်းထိုးနေသည့်အတွက် ၀မ္မသူးရွာနှင့်အနီးဝန်းကျင်ရှိ ကျေးရွာမှပြည်သူများထွက်ပြေးတိမ်းရှောင်နေကြရသည်။
ယမန်နေ့ညက ဘုရားစခန်းရွာ တွင် ညအိပ်နားခဲ့သည့်စစ်ကောင်စီတပ်များသည်ယနေ့နံနက်ပိုင်းတွင် ရွာ၏ မြောက်ဖက်ခြမ်း ကျလှောင်ခင်ရိုးအတိုင်း တောတိုးပြီး ဝုမ်းခုံ၊ မရှိန်းလှော် ၊ ဝမ္မသူးမှ တက်လာနေခြင်းဖြစ်၍ တိမ်းရှောင်ရမှုဖြစ်သည်။
''ခုလောလောဆယ်တော့ ဝမ္မသူးကျေးရွာမှာဘယ်သူမှမရှိတော့ဘူး။ ဝမ္မသူးရွာဆိုတာက ရွာကြီးပါ၊ဒီမှာတိုက်နယ်ဆေးရုံလည်းရှိတယ်။ အခုတလောဒီရွာနားကထိခိုက်ဒဏ်ရာရတဲ့သူတွေ၊ဖျားနားတဲ့သူတွေအားလုံးကဒီတိုက်နယ်ဆေးရုံကိုပဲအားကိုးရတာ၊အခုတော့ ဆေးပစ္စည်းတွေသယ်ပြီးပြေးနေရပြီ။ ဆေးပစ္စည်းတွေကမသယ်လို့လည်းမရဘူးလေ။ အရင်တခါလာတုန်းကလည်းဆေးရုံထဲကဆေးပစ္စည်းတွေဖျက်ဆီးပစ်ခဲ့ကြပြီးပြီ''ဟု စစ်ဘေးရှောင်ရွာသားတစ်ဦးကပြောသည်။
အဆိုပါ စစ်ကောင်စီ စစ်ကြောင်းများသည် CDF မင်းတပ် ထိန်းချုပ်နယ်မြေထဲသို့ ဝင်ရောက်လာနိုင်သည့်အတွက်တိုက်ပွဲများပြင်းထန်လာနိုင်ကြောင်းကိုလည်း CDF မင်းတပ်အဖွဲ့မှ သတင်းထုတ်ပြန်ထားသည်။