ဒီဇင်ဘာလ ၁၅ ရက်
ထားဝယ်မြို့နယ်၊ မောင်မယ်ရှောင်ကျေးရွာအုပ်စု၊ ရေဝိုင်းရွာအနီးတွင် စစ်ကောင်စီ သတင်းပေးဟု စွပ်စွဲခံရသူ အမျိုးသား နှစ်ဦး ယမန်နေ့ ဒီဇင်ဘာ ၁၄ ရက် ညနေပိုင်းတွင် သေနတ်ဖြင့် ပစ်ခတ်ခံရကာ သေဆုံးသွားကြောင်း သိရသည်။
ဒေသခံများက စစ်ကောင်စီ သတင်းပေး ဒလန်ဟု ထင်ကြေးပေးခံထားရသူ နှစ်ဦးဖြစ်သည့် ဦးမြမွေး အသက် (၄၅) နှစ်နှင့် ဦးဇော်မင်းသူ အသက် (၃၅) နှစ်တို့သည် ဒီဇင်ဘာလ ၁၄ ရက်နေ့ ညနေ ၅ နာရီခန့်က ရွာထဲတွင် မူးယစ်ဆေးများသွား ယူစဉ် လမ်းတွင် သေနတ်ပစ်ခံရကာ သေဆုံးခဲ့ကြောင်း ရွာသား တစ်ဦးက ဆိုသည်။
"ဒီလူ နှစ်ဦးက စစ်ကောင်စီ သတင်းလည်း လုပ်တယ်။ နောက်ပြီး မူးယစ်ဆေးဝါး ရောင်းဝယ်တွေလည်း လုပ်တယ် ဆိုပြီး သတင်းတွေ ထွက်နေတဲ့သူတွေပါ"ဟု ၎င်းကပြောသည်။
ထို့အပြင် ပစ်ခံရသူများ၏ လွယ်အိတ်ထဲတွင် မူးယစ်ဆေးဝါး အများအပြား ပါလာကြောင်းလည်း ရေဝိုင်းရွာသားများ၏ ပြောဆိုချက်အရ သိရသည်။
လက်ရှိတွင် ၎င်းတို့ နှစ်ဦးပစ်သတ်ခံရမှုနှင့် ပတ်သက်ပြီး မည်သည့် အဖွဲ့စည်းမှ လုပ်ဆောင်ခဲ့သည်ကို ထုတ်ပြန်ထားခြင်း မရှိသေးပေ။