ဒီဇင်ဘာလ ၁၃ ရက်

မြင်းခြံခရိုင်၊ တောင်သာမြို့နယ် မင်္ဂလာဦးရပ်ကွက် စာသင်ကျောင်းအတွင်း တပ်စွဲထားသည့် စစ်ကောင်စီတပ်ကို ယမန်နေ့ ဒီဇင်ဘာလ ၁၂ ရက် နံနက်ပိုင်းတွင် တိုက်ခိုက်ခဲ့ရာ စစ်ကောင်စီ တပ်သား လေးဦး သေဆုံးကြောင်း ဒေသကာကွယ်ရေးတပ်ဖွဲ့ Seven People Defense Force မှ ဗိုလ်မူတူးက ပြောသည်။

“ညီနောင် မဟာမိတ် တပ်ဖွဲ့ လေးဖွဲ့ ပေါင်းပြီး စာသင်ကျောင်းမှာ တပ်စွဲထားတဲ့ စစ်ကောင်စီတပ်ကို လက်နက်ကြီးတွေနဲ့ အရင်ပစ်တယ်၊ အဲ့ဒီနောက် လက်နက်ငယ်နဲ့ ထပ်ပစ်တယ်၊ စစ်တပ်ကလည်း အထဲကနေ ပြန်ပစ်တယ်။ စစ်သားလေးဦးနဲ့ ပျူစောထီးတစ်ဦး သေတယ်” ဟု ၎င်းက မဇ္ဈိမကို ပြောသည်။

မြင်းခြံခရိုင် အခြေစိုက် 27 Revolution၊ Natogyi Regional PDF ၊ မြေလတ် PDF နှင့် Seven People Defense Force ညီနောင် မဟာမိတ်တပ်များက ဝင်ရောက် တိုက်ခိုက်ခဲ့ခြင်း ဖြစ်သည်။

စစ်ကောင်စီဘက်က သေဆုံးသူများတွင် ပျူစောထီး ခေါင်းဆောင်ဆိုသူ အမျိုးသား တစ်ဦး ပါဝင်ပြီး အရာရှိတစ်ဦးလည်း  ထိခိုက်ဒဏ်ရာ ရရှိသည်ဟု ဆိုသည်။