ဒီဇင်ဘာ ၅
ရန်ကုန်၊ ကြည့်မြင်တိုင် ပန်းပင်ကြီးလမ်းတွင် ငြိမ်းချမ်းစွာဆန္ဒပြခဲ့ကြသည့် ဆန္ဒပြသူများကို စစ်ကောင်စီတပ်က နောက်မှကားဖြင့်ဝင်တိုက်ပြီး သေနတ်ဖြင့်ပစ်ခတ်ဖြိုခွင်းမှုကြောင့် ဆန္ဒပြသူငါးဦးသေဆုံးကာ အနည်းဆုံး ၁၂ ဦးဒဏ်ရာရကာ ၁၅ ဦးဖမ်းဆီးခံရသည်ဟု သတင်းများထွက်ပေါ်လျက်ရှိသည်။
သပိတ်စစ်ကြောင်းတွင် လိုက်ပါသတင်းယူခဲ့သည့် Myanmar Pressphoto Agency (MPA) ၏ ဓာတ်ပုံ သတင်းထောက် ကိုကောင်းဆက်လင်းနှင့် ရုပ်သံသတင်းထောက် မမှူးရတနာခက်မို့မို့ထွန်းတို့ကိုလည်း စစ်ကောင်စီက ဖမ်းဆီးခဲ့သည်။ ဖမ်းခံရသည့် သတင်းထောက်နှစ်ဦးမှာ ယခုအချိန်ထိ မိသားစုနှင့် အဆက်အသွယ်မရသေးကြောင်း MPA သတင်းဌာနက ထုတ်ပြန်ထားသည်။
အဆိုပါအကြောင်းအရာနှင့် ပတ်သက်ပြီး မမှူးရတနာခက်မို့မို့ထွန်း၏ မိသားစုဝင်ကို မဇ္စျိမ သတင်းဌာနက ဆက်သွယ်မေးမြန်းခဲ့သည်။
Q1; မနက်က ကြည့်မြင်တိုင် ဆန္ဒပြပွဲမှာ အမ ညီမလည်း ပါတယ်။ ဖမ်းဆီးခံရတယ်လို့လည်း သိရတယ်။ ဖမ်းခံရတယ်ဆိုတာ မိသားစုက ဘယ်လိုသိလဲ ပြောပြပေးပါဦး။
A1; မနက်ကဖုန်းဆက်တော့ ဖုန်းတစ်လုံးကတော့ လုံးဝဆက်သွယ်လို့မရဘူးပေါ့နော်၊ သူ့အကောင့်တွေဘာတွေကလည်း Deactivate လုပ်ထားတော့ အော်...စိတ်ထဲမှာတော့ နည်းနည်းတော့ အေးသွားတာပေါ့နော်။ ထွက်ပြေးလို့များလွတ်လို့လားပေါ့နော်။ တဖြေးဖြေးနဲ့ ကိုယ်က နောက်ထပ်ဖုန်းတစ်လုံးကို ဆက်ကြည့်တဲ့အခါကြတော့ ဖုန်းကတော့ဝင်နေတယ်။ ဝင်နေပြီးမကိုင်ဘူးကြတော့ သူရှောင်နေတာဆိုပြီးတော့ပဲ ကိုယ်ကပေါ့ပေါ့လေးပဲ တွေးလိုက်မိတယ်။ ၁၁ နာရီလောက်ရောက်တဲ့အခါကြတော့ ဖုန်းကလုံးဝ အဆက်အသွယ်မရတော့ဘူး။ ပုံတွေလည်းတက်လာတော့ တော်တော်လေးလည်း ကိုယ့်အစ်မအတွက်ကို စိုးရိမ်တယ်ပေါ့နော်။
Q2; သူက ဘယ်အချိန်က အိမ်ကထွက်သွားတာလဲ။ အမတို့ အတူနေတာလား။
A2; အတူမနေတာတော့ တော်တော်ကြာပြီရှင့်။ ကိုယ်တွေကနယ်ဘက်ကဆိုတော့ ကိုယ်ကကိုယ့်ဘာသာကိုယ်နယ်ဘက်မှာပဲနေပေါ့နော်။ သူကတစ်နှစ်မှတစ်ခါ နှစ်နှစ်မှတစ်ခါပဲပြန်လာတယ်ရှင့်။
Q3; သူ ဆန္ဒပြပွဲသွားမယ်ဆိုတာကို သိလား။ ဘာတွေပြောသွားသေးလဲ။
A3; အရင်ကဆိုရင် သူသွားတော့မယ်၊ လိုက်ရိုက်ရတော့မယ်ဆိုရင် အမြဲတမ်းဖုန်းဆက်ပေးတယ်၊ ကိုယ်ကလည်း ဒီကအမြဲတမ်းဆုတောင်းပေးတယ်။ ပြန်ရောက်ပြီဆိုလို့ရှိရင်လည်း ပြန်ရောက်ပြီဆိုတဲ့အကြောင်းအမြဲပြောပေးတယ်ပေါ့နော်။ အခုတစ်ခေါက်ကတော့ လုံးဝကိုအဆက်အသွယ်မရဘူး။
Q4; ဘယ်အချိန်ကစပြီး အဆက်အသွယ်မရတော့တာလဲ။
A4; ၁၁နာရီမတိုင်ခင်တည်းက၊ အရင်ဆိုရင်ဘယ်သွားသွားပေါ့နော် ဖုန်းဆက်နေကြ၊ အခုကြတော့ မနက်မိုးလင်းထဲကနေ ဖုန်းလည်းမဆက်ဘူး၊ လုံးဝမဆက်ဘူး။ ကိုယ်ကစိုးရိမ်လို့ဆက်တော့လည်း လုံးဝအဆက်အသွယ်မရဘူး အခုအချိန်ထိပဲ။
Q5; အမ ညီမအကြောင်း နည်းနည်းပြောပြပါလား။
A5; ညီမလေးတို့က ငယ်ငယ်လေးထဲက အမေနဲ့ပဲနေခဲ့ရတာ၊ ညီမတစ်သက်ပဲ။ သူကသမီးကြီးဆိုတော့ တစ်အိမ်လုံးလည်းအားကိုးတာပေါ့၊ ညီမမှာလည်းအစ်မဆိုလို့ သူပဲရှိတာပေါ့နော်။ ညီအစ်မနှစ်ယောက်ထဲပဲရှိတာ။ ဆက်သွယ်လို့မရတော့ တော်တော်လေးကိုစိုးရိမ်နေကြတယ် တစ်အိမ်လုံးက။
Q6; သူဖမ်းခံရတယ်ဆိုတာကို ဘယ်သူက အကြောင်းကြားတာလဲ။
A6; သူ့သူငယ်ချင်းတစ်ယောက်က ပါသွားတာသေချာတယ်လို့ပြောတယ်ပေါ့နော်၊ ပါသွားတာသေချာလား ဘယ်ကိုလိုက်ရမှာလဲ ဖုန်းဆက်ပြီးမေးတဲ့အချိန်မှာကြတော့ ဘယ်ထဲပါလို့ပါသွားမှန်းလည်းမသိဘူး၊ ဘယ်လိုအခြေအနေမှာရောက်နေမှန်းလည်းမသိဘူး ၅၀၊ ၅၀ စီပဲ အဖမ်းခံရတာလား၊ သေဆုံးတဲ့အထဲပါတာလား။ ညီမတို့ကိုအဲ့လိုမျိုးပြောတော့ ပိုပြီးတော့ စိုးရိမ်တာပေါ့ မမြင်ရတဲ့အခါကြတော့၊ အခုကဘာအကြောင်းမှကို ဘယ်အဖွဲ့အစည်းမှလည်း လာပြီးတော့ ပြောခြင်းလည်းမရှိဘူး။ သူတို့ရဲ့ကုမ္ပဏီကလည်း ဘာမှပြောကြားခြင်းလည်းမရှိဘူးပေါ့နော်။ ဘယ်လိုပါသွားတယ်။ ဘယ်လိုဘယ်လိုလိုက်ရင်တော့ရတယ်ဆိုတဲ့ အဆက်ဆက်ကို ကွင်းဆက်ကို ညီမတို့တော့ ဘယ်ကနေစပြီး ဘယ်လိုလုပ်ရမှန်းကို မသိတော့ဘူး။ နယ်မှာလည်းနေတဲ့အတွက်ကြောင့်မို့ ရန်ကုန်လိုက်လာဖို့ကို စီစဥ်ရတယ်ပေါ့နော်။ အခုအချိန်မှာတော့။
ညီမလေးတို့ကိုတောင်မှ သူဘယ်သူနဲ့ဘယ်လိုတွေချိတ်ဆက်လုပ်နေတယ်ဆိုတာ လုပ်ငန်းပိုင်းဆိုင်ရာတွေကို ဘာမှပြောပြထားပါဘူး။ သူဒီအလုပ်လုပ်နေတယ်၊ ဒီလိုတွေလိုက်ရိုက်နေတယ်ဆိုတာလောက်ပဲသိရတယ်ရှင့်။
ညီမလေးတို့ကတော့ သတင်းတစ်ခုဆိုတစ်ခု သေသေချာချာသိချင်တာပေါ့နော်။ ကိုယ်ကလည်း အဲ့တော့မှ ဘာလုပ်ရမလဲ၊ နောက်ကနေလိုက်ရမှာလား ဘယ်ကိုလိုက်လို့လိုက်ရမှာလည်းဆိုတာလည်း စုံစမ်းလို့ရမှာပေါ့နော်။
Q7; အခုဖြစ်စဉ်အပေါ် မိသားစုဝင်တစ်ယောက်အနေနဲ့ ဘယ်လိုမှတ်ချက်ပေးချင်လဲ။
A7; အပြစ်မရှိတဲ့သူတွေကိုလိုက်သတ်ပြီးတော့ သူတို့စားဝင်အိပ်ပျော်တယ်ဆိုထဲက လူစိတ်မရှိဘူးဆိုတာ အစထဲကသိပြီးသားပါ။ ဒါပေမယ့် လုပ်တယ်ဆိုတာ သူတို့လိုလက်နက်ရှိတဲ့သူတွေလည်းမဟုတ်ဘူး၊ အကာအကွယ်ရှိတဲ့သူတွေလည်းမဟုတ်ဘူး။ ဖမ်းတယ်ဆိုလည်း ဖမ်းတယ်ဆိုတဲ့အကြောင်းတော့ပြောပြသင့်တာပေါ့နော်။ ကြားထဲကနေ ဒလန်ရှိလို့ဆိုလည်း အဲ့ဒလန်ကရော သူတို့မိသားစုအကျိုးအတွက်ဘာတွေများရှိသွားလို့ သူများမိသားစု မျက်ရည်ပေါက်ကြီးငယ်ကျအောင်လုပ်ရတာလဲဆိုတာကိုတော့ လူစိတ်မရှိတဲ့ဟာတွေဆိုတော့၊ လူလို့ကိုမတွေးပါဘူး အစောကြီးထဲက။