စစ်ကိုင်းတိုင်း၊ ရေဦးမြို့နယ် မြင်းပေါက်ကျေးရွာရှိ မိုင်တဲ တာဝါတိုင်ကို ယမန်နေ့ ဒီဇင်ဘာလ ၂ ရက် ည ၁၀ နာရီတွင် မီးရှို့ ဖျက်ဆီးခဲ့ကြောင်း ရေဦးမြို့နယ် အခြေစိုက် ဝေဟင်စွန်ရဲ အဖွဲ့ဝင် တစ်ဦးက ပြောသည်။
"တိုင်ကတော့ ဘေးကအိမ်တွေနဲ့ မလွတ်လို့ မဖျက်ခဲ့ရဘူး။ မီးစက်တွေ အားလုံးကိုတော့ မီးရှို့ဖျက်ဆီးခဲ့တယ်။ ဘက်ထရီအိုးတွေကိုတော့ သိမ်းလာခဲ့တယ်။ စစ်တပ်က အသုံးပြုနေတဲ့ အရာတွေ၊ ထောက်တိုင်တွေကို ဘယ်လို နည်းလမ်းနဲ့မဆို ဖျက်ဆီးတိုက်ခိုက်သွားမှာပါ " ဟု အဆိုပါ အဖွဲ့ဝင်က မဇ္ဈိမကို ပြောသည်။
ဝေဟင်စွန်ရဲအဖွဲ့သည် တိုက်ခိုက်ရေးပိုင်းကို ဦးစားပေး လုပ်ဆောင်နေပြီး မိုင်တဲ တာဝါတိုင် ဖျက်ဆီးခြင်းသည် ယခု ပထမဆုံးအကြိမ် ဖြစ်သည်ဟု ၎င်းက ဆိုသည်။
စစ်အာဏာ သိမ်းပြီးနောက်ပိုင်းတွင် တစ်နိုင်ငံလုံးရှိ စစ်အုပ်စုပိုင် မိုင်တဲတာဝါတိုင်များ ဖျက်ဆီး ခံနေရပြီး ရေဦးမြို့နယ်တွင် မိုင်တဲတာဝါတိုင် ၁၀ တိုင်ထက်မနည်း ဖျက်ဆီးခံထားရသည်ဟု သိရသည်။
