နိုဝင်ဘာ ၁၈
စစ်ကောင်စီတပ်များနှင့် ကလေးပြည်သူ့ကာကွယ်ရေးတပ်များအကြား တိုက်ပွဲပြင်းထန်နေသည့်အတွက် ကလေး-ဂန့်ဂေါလမ်းပိုင်းကို ဖြတ်သန်းသွားလာခြင်းမပြုကြရန် Ranger Kalay Defend Force က သတိပေးထုတ်ပြန်လိုက်သည်။
စစ်ရေး တင်းမာနေသောကြောင့် နိုဝင်ဘာလ ၁၈ ရက်မှ စတင်၍ နိုဝင်ဘာလ ၂၄ ရက်အထိ တစ်ပတ်အတွင်း မော်တော်ယာဉ်များ ဖြတ်သန်းခြင်း မပြုရန် ထုတ်ပြန်ရခြင်းဖြစ်သည်ဟုဆိုသည်။
ဖြတ်သန်းသွားလာသည့် မော်တော်ယာဉ်များအနေဖြင့် အချိန်မရွေး ဖြစ်ပေါ်လာနိုင်သည့် တိုက်ပွဲများအတွင်း မှားယွင်းပစ်ခတ်၊ ဖောက်ခွဲတိုက်ခိုက်ခံရနိုင်သောကြောင့် ယခုထုတ်ပြန်ချက်ကို အထူး အလေးထားကြရန်လည်း မေတ္တာရပ်ခံထားသည်။
ကလေးမြို့၊ အနောက်တောင်ပိုင်းရှိ PDF Kalay တပ်ရင်း (၃)၏ လက်အောက်ခံ စခန်းတစ်ခုကို စစ်ကောင်စီတပ်မှ ဝင်ရောက်စီးနင်းတပ်စွဲပြီး နောက်ပိုင်း စစ်ရေးပိုမိုတင်းမာနေခြင်း ဖြစ်သည်။
