နိုဝင်ဘာ ၅
ရန်ကုန်တိုင်း၊ လှိုင်သာယာမြို့နယ်၊ အမှတ် (၇) ရပ်ကွက်၊ တေးဥယျာဉ် ( ၃ ) လမ်းထိပ် အနီးရှိ ပါရမီဆေးခန်းအတွင်း၌ ယနေ့ နိုဝင်ဘာလ ၅ ရက်နေ့ နံနက် ၁၀ နာရီ ၁၅ မိနစ်အချိန်က သေနတ်ဖြင့် ဝင်ရောက်ပစ်ခတ်မှု ဖြစ်ပွားခဲ့သည်။
ပစ်ခတ်ခံရသူမှာ အဆိုပါဆေးခန်းမှ အမျိုးသမီးသူနာပြုဆရာမ ဒေါ်စမ်းသီတာဆိုသူဖြစ်ပြီး ပစ်ခတ် ခံရမှုကြောင့် ဆေးရုံအရောက်တွင် သေဆုံးသွားကြောင်း ဒေသခံတစ်ဦးက ပြောသည်။
"သူက သတင်းပေးပေါ့။ စကစကို ထမင်းတောင်ခေါ်ကျွေး၊ ငွေပေးတာနဲ့ဆေးဝါးထောက်ပံ့ပေးတာတွေလုပ်တယ်။ သူ့အဆောင်က နွေဦးတော်လှန်ရေးလုပ်သူတွေကို သတင်းပေးဖမ်းခိုင်းတာ နှစ်ယောက်ဖမ်းခံရတယ်။ အဲဒါကြောင့်လည်း အသတ်ခံရတာ။ အပစ်ခံရတာ သေနတ်ဒဏ်ရာ နှစ်ချက်၊ ရင်ဘတ်နဲ့ ကျော ထိတယ်လို့ ကြားတယ်။ ဆေးရုံ (ပြည်သူ့ဆေးရုံကြီး-လှိုင်သာယာ)ကို ပို့ပေမဲ့လည်း ဆေးရုံရောက်တော့ သေသွားပြီလို့ သတင်းကြားတယ်"ဟု ရပ်ကွက်နေ ပြည်သူတစ်ဦးက မဇ္စျိမ ကို ပြောသည်။
ထို့နောက် ပစ်ခတ်မှုဖြစ်ပွားပြီး ခဏအကြာတွင် စစ်ကောင်စီတပ်သားများ ရောက်ရှိလာပြီး လူငယ်တစ်ဦးအား လက်ပြန်ကြိုးတုပ်၊ မျက်နှာအုပ်ကာ အမှတ် (၇) ရပ်ကွက်ရုံးသို့ ဖမ်းဆီးခေါ်ဆောင်သွားသည့်အပြင် အနီးရှိ CCTV မှတ်တမ်းများလည်း ရယူသွားခဲ့သည်။
"ဖြစ်စဉ် ဖြစ်တာက ဆိုင်ကယ်နဲ့ ဆေးဝယ်သလိုပစ်သွားတာ၊ ပစ်သွားတဲ့သူတွေက လွတ်သွားတယ်။ အဲဒါကို မဆိုင်တဲ့ လူငယ်တစ်ဦးက ထွက်ကြည့်လို့ဆိုပြီး ဖမ်းသွားတယ်။ ရိုက်နှက်ခံခဲ့ရတဲ့သူတွေလည်း ရှိတယ်။ လမ်းထဲမှာ တော်တော်သောင်းကျန်းသွားတာ"ဟု မျက်မြင်တွေ့ရှိသူတစ်ဦးက ပြောသည်။၊