နိုဝင်ဘာ ၁
သရုပ်ဆောင် ပိုင်ဖြိုးသုအား မိဘများက အမွေပြတ်စွန့်လွှတ်လိုက်ကြောင်း နိုဝင်ဘာ ၁ရက်ထုတ် စစ်ကောင်စီ၏ သတင်းစာတွင် ကြေညာထားသည်ကို တွေ့ရသည်။
အဆိုပါ ကြေညာချက်တွင် "ဦးစိုးဝင်းနှင့် ဒေါ်နွယ်ဦးတို့၏ သမီးဖြစ်သူ မပိုင်ဖြိုးသု[၁၂/အစန (နိုင်) ၁၈၈၉၇၁]သည် မိဘများ၏ ဆိုဆုံးမမှုကို မနာခံဘဲ မိဘများ စိတ်ဆင်းရဲစေသော ကိစ္စရပ်များအား အကြိမ်ကြိမ်အခါခါပြုလုပ်ခဲ့ပါသဖြင့် ယနေ့မှစ၍ သမီးအဖြစ်မှ အမွေပြတ် စွန့်လွှတ်လိုက်ပါကြောင်းနှင့် နောက်နောင် ၎င်းနှင့် ပတ်သက်သော ကိစ္စအဝဝအား တာဝန်ယူဖြေရှင်းပေးမည် မဟုတ်ပါကြောင်းအများသိစေရန်ကြေညာအပ်ပါသည်" ဟုပါရှိသည်။
သရုပ်ဆောင် ပိုင်ဖြိုးသုသည် စစ်အာဏာရှင်ဆန့်ကျင်ရေးလှုပ်ရှားမှုများတွင် ပြည်သူများနှင့်အတူ တသားတည်းရပ်တည်ပြီး ဆန္ဒပြပွဲများ၌တောက်လျှောက်ပါဝင်ခဲ့ခြင်းကြောင့် စစ်ကောင်စီမှ နိုင်ငံတော်အကြည်ညို ပျက်စေမှု ၅၀၅-က ဖြင့် ဧပြီလမှစတင်ကာ ဖမ်းဝရမ်းထုတ်တရားစွဲဆိုခဲ့ရာ လက်ရှိအချိန်ထိလွတ်မြောက်ရာဒေသတစ်ခုသို့ ရှောင်တိမ်းနေရဆဲဖြစ်သည်။
