အောက်တိုဘာ ၂၈
ရန်ကုန်တိုင်း၊ လှိုင်သာယာမြို့နယ်၊ ရန်ကုန်-ပုသိမ် လမ်းမကြီးဘေးတစ်လျှောက်ရှိ ကျူးကျော်နေအိမ် ၁,၀၀၀ ကျော်ခန့်ကို ယနေ့ အောက်တိုဘာလ ၂၈ ရက်နေ့အပြီးဖျက်သိမ်းရန် စစ်ကောင်စီမှအမိန့်ထုတ်ထားရာ ယနေ့မနက်တွင် အင်အားသုံးဖြိုဖျက်နေကြောင်း သိရသည်။
"တချို့ ကျူးကျော်တွေက မနေ့ညထဲက အကုန်ဖျက်သွားကြပြီ။ သူတို့အိမ်ကို သူတို့ကိုယ်တိုင်ဖျက်ရတာဗျာ ။ ဘယ်လောက် စိတ်မကောင်း ဖြစ်စရာကောင်းလဲ။ ဒီအချိန်ကြီးဗျာ နိုင်ငံရေးကလည်း မကောင်းရတဲ့ကြားထဲ ဘာတွေဆက်လုပ်စားပြီး ဘယ်မှာသွားနေမလဲမသိဘူး။ ဒီမနက်တော့ ကျန်တဲ့ကျူးကျော်နေအိမ်တွေကို ဆက်ပြီး ဖျက်နေတာတွေ့ခဲ့ပါတယ်။ လမ်းကြော အခြေအနေတွေလည်း တော်တော်ပိတ်နေပါတယ်" ဟု ဒေသခံတစ်ဦးက မဇ္စျိမကို ပြောသည်။
ကျူးကျော်နေအိမ်များကို ဖြိုဖျက်ရာတွင် ဘူဒိုဇာကားများ၊ အဓိကရုဏ်း နှိမ်နင်းရေးကားများ၊ အချုပ်ကား၊ စစ်ကား၊ ရဲကားများနှင့် စည်ပင်ကားများလည်း အမြောက်အမြားပါဝင်ကာ အင်အားသုံးဖျက်သိမ်းနေသည်ဟု မျက်မြင်သက်သေများက ဆိုသည်။
ယနေ့ မနက် ၆ နာရီမှ စတင်ပိတ်ထားသော လှိုင်သာယာ ဘုရင့်နောင်တံတားကို မနက် ၉ နာရီခန့်က ပြန်လည်ဖွင့်လှစ်ပေးခဲ့သော်လည်း လက်ရှိအချိန်ထိ ယာဥ်ကြောပိတ်နေကြောင်း ခရီးသွားများထံမှ သိရသည်။
ပုံစာ- ကျူးကျော်များဖယ်ရှားမည့် အစီအစဥ်ကြောင့် ဘုရင့်နောင်တံတား ပိတ်ဆို့ထားသည့်မြင်ကွင်း။ photo credit -Ko Arrman