အောက်တိုဘာ ၄
ကယား(ကရင်နီ)ပြည်နယ်တွင် ယနေ့ အောက်တိုဘာလ ၄ ရက်က ဖြစ်ပွားခဲ့သော တိုက်ပွဲများအတွင်း စစ်ကားတစ်စီးပျက်စီးပြီး အကြမ်းဖက်စစ်ကောင်စီတပ်သား လေးဦးသေဆုံးကာ ကရင်နီပူးပေါင်းပြည်သူ့ကာကွယ်ရေးတပ်များဘက်မှ ထိခိုက်သူမရှိကြောင်း ကရင်နီအမျိူးသားများကာကွယ်ရေးတပ်(KNDF)မှ ယနေ့ညပိုင်းတွင် သတင်းထုတ်ပြန်သည်။
ယနေ့ အောက်တိုဘာလ ၄ ရက် နေ့လည် ၁ နာရီခန့် က ဒေါပိုးစီကျေးရွာတွင် တစ်ကြိမ်၊ ညနေပိုင်း ၃ နာရီ မိနစ် ၃၀ ခန့်က ဒေါခလိုက်လင်းကျေးရွာတွင် တစ်ကြိမ် စုစုပေါင်း တိုက်ပွဲနှစ်ကြိမ်ဖြစ်ပွားခဲ့ခြင်းဖြစ်သည်။
ထို့အပြင် ယနေ့ ညနေပိုင်း ၅ နာရီခန့်တွင် လွိုင်ကော်မြို့မှ ဒီးမော့ဆိုမြို့နယ်ဘက်သို့ ဦးတည်လာသော စစ်ကား ၃၅ စီးပါသည့် အကြမ်းဖက် စစ်ကောင်စီတပ် ယာဉ်တန်းကို ဒီးမော့ဆိုမြို့နယ်၊ စံပြ (၆) မိုင်နှင့် (၅) မိုင် ကျေးရွာ အကြားတွင် ကရင်နီပူးပေါင်းတပ်များဖြစ်သည့် ကရင်နီတပ်မတော် (KA) နှင့် KNDF တို့မှ တိုက်ခိုက်ခဲ့ကြောင်း ထုတ်ပြန်ချက် ဖော်ပြထားသည်။
ထို့နောက် လွိုင်ကော်-ဒီးမော့ဆိုလမ်းမကြီး တစ်လျှောက် လမ်းကင်းချထားသော အကြမ်းဖက် စစ်ကောင်စီတပ်များနှင့် ကရင်နီပူးပေါင်းတပ်တို့ နှစ်ဘက်ထိတွေ့ တိုက်ပွဲများ ဖြစ်ပွားခဲ့သည်။
အကြမ်းဖက်စစ်ကောင်စီတပ်များသည် ဒီးမော့ဆိုမြို့နှင့် လွိုင်ကော်မြို့နယ်တို့တွင် အပြင်းအထန် ထိုးစစ်ဆင်ပြီးနောက် ဖရူဆို၊ ဘောလခဲနှင့် ဖားဆောင်းမြို့နယ်များဘက်သို့ လူ၊ လက်နက်၊ ရိက္ခာအပြည့်ပါသည့် အကြမ်းဖက်စစ်ကောင်စီယာဉ်တန်းများ ဦးတည်သွားနေသည့်အတွက် ယင်းမြို့နယ်များတွင် စစ်ကောင်စီတပ်က အင်အားဖြည့်တင်းမည့် အခြေအနေရှိကြောင်း KNDF၏ ထုတ်ပြန်ချက်တွင် ဖော်ပြထားသည်။
