နေပြည်တော်(ဒီဇင်ဘာ ၁၇)။ ။ NCAစာချုပ်တွင် လက်မှတ်ရေးထိုးခြင်းမရှိသည့်အပေါ် တိုင်းရင်းသားများ အနေဖြင့် အထင်မလွဲရန် အမျိုးသားဒီမိုကရေစီအဖွဲ့ချုပ်ဥက္ကဌ ဒေါ်အောင်ဆန်းစုကြည်က ဒီဇင်ဘာ ၁၇ရက်က နေပြည်တော်ရှိ လွှတ်တော်ဝင်းအတွင်း လက်မှတ်ရေးထိုးထားသော တိုင်းရင်းသားခေါင်းဆောင်များနှင့် တွေ့ဆုံစဉ် ရှင်းပြခဲ့သည်။
တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA)တွင် လွန်ခဲ့သော နှစ်လကျော်က လက်မှတ်ရေးထိုးခဲ့သော တိုင်းရင်းသားလက်နက်ကိုင်တော်လှန်ရေးအဖွဲ့(၈)ဖွဲ့ မှ ခေါင်းဆောင်များနှင့် တွေ့ဆုံစဉ် ဒေါ်အောင်ဆန်းစုကြည်က ရှင်းပြခဲ့ခြင်း ဖြစ်သည်။
"အဓိကအားဖြင့်တော့ ဒေါ်အောင်ဆန်းစုကြည်က NCAမှာ လက်မှတ်ရေးထိုးပွဲမှာတုန်းက NLDဘာ့ကြောင့် လက်မှတ်မရေးထိုးခဲ့ဘူးဆိုတာ အဓိကထားပြီး ရှင်းပြတာပါ။ ဘာလို့လည်းဆိုရင် တိုင်းရင်းသားတွေ အချင်းချင်း ကြားမှာ နားလည်မှုလွဲမှာစိုးတဲ့အတွက်၊ တိုင်းရင်းသားအချင်းချင်းကြားမှာ နားလည်မှု မလွဲစေချင်တဲ့အတွက် လက်မှတ်မထိုးတဲ့အကြောင်း ကျွန်တော်တို့ကို အဓိကထားပြီး ရှင်းပြခဲ့တာ ဖြစ်ပါတယ်" ဟု ဒေါ်အောင်ဆန်းစုကြည်နှင့် တွေ့ဆုံမှုအပြီးတွင် ပအိုဝ်း အမျိုးသားလွတ်မြောက်ရေးအဖွဲ့ချုပ် (PNLO) ဥက္ကဌ ခွန်မြင့်ထွန်းက သတင်းထောက်များကို ပြောသည်။
ပြည်တွင်းငြိမ်းချမ်းရေး ရရှိရန်မှာ တိုင်းရင်းသားအားလုံးပါဝင်ပြီး ပူးပေါင်းဆောင်ရွက်မှသာ အောင်မြင်မည်ဟု ဒေါ်အောင်ဆန်းစုကြည်က ပြောဆိုခဲ့ကြောင်းလည်း ခွန်မြင့်ထွန်းက ပြောသည်။
NLDအနေဖြင့် NCAစာချုပ်တွင် လက်မှတ်မရေးထိုးရသည့် အကြောင်းရင်းမှာ တစ်နိုင်ငံလုံး လွှမ်းခြုံမှုမရှိဘဲ တစ်စိတ်တစ်ပိုင်းသဘောသာ ဖြစ်ခြင်း၊ ဝင်ရောက်လက်မှတ်ရေးထိုးလိုက်ပါက စာချုပ်တွင်လက်မှတ်ရေးထိုး သော တိုင်းရင်းသားလက်နက်ကိုင်အဖွဲ့များနှင့် လက်မှတ်ရေးထိုးခြင်းမရှိသော အဖွဲ့များအကြား နားလည်မှု လွဲမှားနိုင်ခြင်းနှင့် လက်မှတ်မထိုးသော တိုင်းရင်းသားလက်နက်ကိုင်များအပေါ် ဖိအားပေးလာနိုင်ခြင်းတို့ကြောင့် ဖြစ်သည်ဟု NLDပါတီမှ ဒေါက်တာမေဝင်းမြင့်က လွှတ်တော်တွင် ပြောဆိုထားသည်။
ဒေါ်အောင်ဆန်းစုကြည်နှင့် တွေ့ဆုံခဲ့သူတစ်ဦးဖြစ်သည့် ကရင်အမျိုးသားအစည်းအရုံး(KNU)မှ အထွေထွေအတွင်းရေးမှူး ပဒိုကွယ်ထူးဝင်းကလည်း "NCAကို လက်မခံတာ မဟုတ်ပါဘူးတဲ့။ လက်မှတ်မရေးထိုးတာက လက်မှတ်ရေးထိုးတဲ့အဖွဲ့တွေက တိုင်းရင်းသားလက်နက်ကိုင်အဖွဲ့အစည်းတွေ အကုန်လုံး မပါတဲ့အတွက်ကြောင့် တိုင်းရင်းသားလက်နက်ကိုင် အဖွဲ့အစည်းတွေကြားမှာ ဝိဝါဒကွဲပြားမှု၊ စိတ်ဝမ်းကွဲပြားမှု ဖြစ်မှာစိုးလို့ မထိုးတာတဲ့" ဟု မဇ္ဈိမကို ပြောသည်။
ပြည်တွင်းငြိမ်းချမ်းရေး ရရှိရေးသည် အမျိုးသားဒီမိုကရေစီအဖွဲ့ချုပ်(NLD)ပါတီ၏ ဦးစားပေးလုပ်ဆောင်မည့် လုပ်ငန်းစဉ်ဖြစ်ပြီး အစိုးရဖွဲ့ပြီးချိန်တွင် အောင်မြင်အောင် ကြိုးစားဆောင်ရွက်သွားမည့်အကြောင်း ဒေါ်အောင်ဆန်းစုကြည်က ပြောဆိုခဲ့သည်ဟုလည်း ပဒိုကွယ်ထူးဝင်းက ဆိုသည်။
NLDအစိုးရအနေဖြင့် ငြိမ်းချမ်းရေးဖြစ်စဉ်ကို အောင်မြင်အောင်ဆောင်ရွက်နိုင်မည်ဟု ယုံကြည်သည်ဟု ခွန်မြင့်ထွန်းက မဇ္ဈိမကို ပြောသည်။