စက်တင်ဘာ ၁၅

ဧရာဝတီတိုင်းဒေသကြီး၊ ဇလွန်မြို့နယ်၊ ဇော်ဂျီကွင်းအုပ်စု တလိုင်းပုံးကျေးရွာရှိ ငါးကန် အလုပ်သမား ငါးဦးကို PDF များဟု အကြမ်းဖက်စစ်ကောင်စီတပ်များနှင့် ရဲများက စွပ်စွဲကာ စက်တင်ဘာ ၁၄ ရက် မနက် ၇ နာရီက ဖမ်းဆီးသွားကြောင်းသိရသည်။

အကြမ်းဖက်စစ်ကောင်စီ၏ ဝါဒဖြန့် သတင်းစာတွင် ငါးကန်၌ ပုန်းအောင်းနေသည့် PDF အမျိုးသား နှစ်ဦးနှင့် အမျိုးသမီး သုံးဦးကို လက်လုပ်သေနတ် ရှစ်လက်အပါအဝင် ဆက်စပ်ပစ္စည်းများနှင့်အတူ ဖမ်းဆီးရမိခဲ့သည်ဟု စွပ်စွဲဖော်ပြထားသည်။

တလိုင်းပုံးကျေးရွာ ဒေသခံများကမူ ဖမ်းဆီးခံထားရသူ ငါးဦးမှာ PDF များမဟုတ်ကြောင်း ပြောသည်။

"ဒလန်က သတင်းပေးလို့ လာဖမ်းသွားတာလို့ထင်တယ်။ သူတို့က PDF တွေလည်းမဟုတ်ပါဘူး ။ အလုပ်သမားတွေပါဗျာ။ မဆီမဆိုင်တွေ ဖမ်းနေတာလည်း မနည်းတော့ဘူး။ အမျိုးသမီးပုံတွေကိုလည်း ကြည့်ပါဦး ဘယ်လိုလုပ် PDF ဖြစ်နိုင်မှာလဲ"ဟု ဒေသခံတစ်ဦးက ပြောသည်။

လက်ရှိအချိန်တွင် မတရားစွပ်စွဲ ဖမ်းဆီးခံခဲ့ရသည့်အလုပ်သမား ငါးဦးကို အကြမ်းဖက်စစ်အုပ်စုနှင့် ရဲများက မည်သည့် နေရာသို့ ဖမ်းဆီးခေါ်ဆောင်သွားသည်ကို မသိရှိကြောင်း ဒေသခံများကပြောသည်။ ဖမ်းဆီးခံထားရသူများနှင့် အဆက်အသွယ်မရရှိသေးကြောင်းလည်း ၎င်းတို့၏ မိသားစုဝင်များထံက သိရ သည်။