ဇူလိုင် ၂၉
အိန္ဒိယနိုင်ငံတွင် ထိန်းသိမ်းခံထားရသည့် မြန်မာနိုင်ငံမှ နိုင်ငံရေးခိုလှုံခွင့်တောင်းသူအားလုံးကို အမြန်ဆုံး ပြန်လွှတ်ပေးရန်အတွက် နိုင်ငံတကာလူ့အခွင့်အရေးစောင့်ကြည့်အဖွဲ့ HRW (Human Rights Watch) က အိန္ဒိယအာဏာပိုင်များကို ဇူလိုင် ၂၈ ရက်က တိုက်တွန်းတောင်းဆိုခဲ့သည်။
အလားတူ မြန်မာနိုင်ငံကနေ ထွက်ပြေးခိုလှုံလာသည့် အမျိုးသမီးနှစ်ဦး အိန္ဒိယတွင် ထိန်းသိမ်းခံထားရစဉ်အတောအတွင်း ပြီးခဲ့သည့် ဇွန်လက ကိုဗစ်-၁၉ ကူးစက်ခံရပြီး သေဆုံးခဲ့မှုကို စုံစမ်းစစ်ဆေးပေးရေးအတွက် HRW က အိန္ဒိယတာဝန်ရှိသူများကို တောင်းဆိုခဲ့သည်။
မြန်မာနိုင်ငံကနေ နိုင်ငံရေးခိုလှုံခွင့်တောင်းသူများကို အိန္ဒိယတွင် ဘေးကင်းလုံခြုံသည့် ခိုလှုံရာနေရာတစ်ခု ကမ်းလှမ်းပေးသင့်ကြောင်း၊ ၎င်းတို့ကို ဖမ်းဆီးထိန်းသိမ်းပြီး အခွင့်အရေးများ ပိတ်ပင်ခြင်းတို့ မလုပ်သင့်ကြောင်း HRW ၏ တောင်အာရှရေးရာ ညွှန်ကြားရေးမှူး မီးနက်ခ်ရှီး ဂန်ဂူလီက ပြောသည်။
အိန္ဒိယအစိုးရအနေဖြင့် အကျပ်အတည်းဒုက္ခတွေ့ကြုံသူများ၏ ကောင်းကျိုးအတွက် ကာကွယ်ရန်အလို့ငှာ ကုလ ဒုက္ခသည် အေဂျင်စီနှင့် နီးနီးကပ်ကပ် ပူးပေါင်းလုပ်ဆောင်ရန် လိုသလို နိုင်ငံတကာ ဥပဒေတာဝန်ဝတ္တရားများကို ထိန်းသိမ်းရန် လိုကြောင်း သူမက ပြောခဲ့သည်။
တချိန်တည်းမှာပင် HRW အဖွဲ့က မြန်မာ အာဏာသိမ်းစစ်အုပ်စု၏ အကြမ်းဖက်မှုနှင့် ဖိနှိပ်မှုများကို ထုတ်ဖော်သွားခဲ့ပြီး အဆိုပါ အာဏာသိမ်းစစ်အုပ်စုသည် နိုင်ငံတဝန်း အာဏာသိမ်းမှုဆန့်ကျင်သော လှုပ်ရှားမှုများကို ဖိနှိပ်ရန်နှင့် အမြင်သဘောထားမတူသူများကို နှိပ်ကွပ်ရန် ဖေဖေါ်ဝါရီလက သေဒဏ်ချမှတ်မှု ၆၅ ခု လုပ်ဆောင်ထားခဲ့သည်။ ထို့ပြင် စစ်အုပ်စုသည် အာဏာသိမ်းပြီးနောက် တက်ကြွလှုပ်ရှားသူများ၊ ဂျာနယ်လစ်များ၊ အစိုးရဝန်ထမ်းများနှင့် နိုင်ငံရေးသမားများကို မတရား ဖမ်းဆီးမှုများ၊ သတ်ဖြတ်မှုများလည်း လုပ်ဆောင်ထားကြောင်း ယင်းက ထုတ်ဖော်သွားခဲ့သည်။
