ဇွန် ၂၀
စဉ့်ကူးမြို့နယ်၊လက်ပန်လှကျေးရွာမှာ ယနေ့ည၉နာရီဝန်းကျင်က လူငယ်နှစ်ဦးကိုစစ်ကောင်စီတပ်တွေကသေနတ်နဲ့ပစ်ခဲ့တာကြောင့် တစ်ဦးသေဆုံးပြီးတစ်ဦးဒဏ်ရာရရှိခဲ့ကြောင်းသိရသည်။
ည၈နာရီမိနစ်လေးဆယ်ခန့်မှာ လက်ပန်လှစာသင်ကျောင်းရှေ့မှာ သေနတ်သံလေးချက်ကြားလိုက်ရပြီး လူငယ်တစ်ဦးနေရာမှာတင်သေဆုံးကာ တစ်ဦးဟာပေါင်သေနတ်မှန်ဒဏ်ရာရရှိခဲ့ပြီး နှစ်ဦးစလုံးကို စစ်ကောင်စီတပ်တွေကခေါ်သွားခဲ့ကြောင်း ဒေသခံများကအတည်ပြုထားသည်။
လက်ပန်လှကျေးရွာတွင်မည်သည့်သပိတ်လှုပ်ရှားမှုများမှမရှိဘဲ ညမထွက်ရအမိန့်ကျော်တာကြောင့်ပစ်ခတ်ခြင်းဖြစ်သည်ဟုဒေသခံများကခန့်မှန်းထားကြသည်။
ပစ်ခတ်မှုဖြစ်ပွားခဲ့သည့် စာသင်ကျောင်းအနီးတွင် လက်ပန်လှနယ်မြေရဲစခန်းတည်ရှိနေပြီး စစ်ကောင်စီတပ်များတပ်ဆွဲထားကြောင်းသိရသည်။
သပိတ်လှုပ်ရှားမှုများမရှိသော်လည်း လက်ပန်လှကျေးရွာကို စစ်ကောင်စီတပ်များက တစ်ရက်ခြားက ကား၊ဆိုင်ကယ်များကို စစ်ဆေးမှုများပြုလုပ်နေကြောင်းသိရသည်။
ပြီးခဲ့သည့် မတ်လကလည်း လက်ပန်လှကျေးရွာအနီးချောင်းကြီးကျေးရွာနှင့် ကျည်ထောက်ပေါက်ကျေးရွာတို့ကို စစ်ကောင်စီတပ်တွေကဝင်ရောက်ပစ်ခတ်ခဲ့တာကြောင့် ကိုးတန်းကျောင်းသူတစ်ဦးအပါအဝင်လူသေဆုံးမှုများရှိခဲ့သေးသည်။ပြီးခဲ့သည့်ရက်ပိုင်းအတွင်းကလည်း လက်ပန်လှကျေးရွာအတွင်းက သံသယရှိသူလူငယ်သုံးဦးကို ညအချိန်တွင်စစ်ကောင်စီတပ်များဝင်ရောက်ဖမ်းဆီးသွားသေးသည်။